Հա

Քաղաքական

Երեքշաբթի, 06 Օգոստոսի 2013 11:20

Հայերը զաւթե՞լ են Վրաստանի տարածքը

altՀիմա էլ վայնասուն են բարձրացրել Վրաստանի ադրբեջանցիները

«hraparak.am» - Վրաստանաբնակ ադրբեջանցիները բողոքով դիմել են Վրաստանի վարչապետ Իւանիշւիլիին: Նրանց յայտատարութիւնն ընդունւել է որպէս բողոքի նշան՝ հայ սահմանապահների կողմից իբր թէ Վրաստանում ադրբեջանական հողերի զաւթման դէմ:

«Հայաստանը խախտում է «Ազգային փոքրամասնութիւնների իրաւունքների պաշտպանութեան մասին շրջանակային համաձայնութիւնը» հայ-վրացական սահմանի մօտ գտնւող Բորչալի տարածքի Մառնէուլիի եւ Դմանիսիի շրջաններում: Ադրբեջանական բնակչութեան իրաւունքները Վրաստանի Բորչալի տարածքի ադրբեջանաբնակ սահմանամերձ գիւղերում յաճախ են խախտւում Հայաստանի սահմանապահ զօրքերի զինծառայողների կողմից, տեղի է ունենում այդ գիւղերի տարածքների աստիճանական զաւթում՝ Հայաստանի զինուժի կողմից: Իրաւունքների խախտումը տեղի է ունենում երկրի արեւելեան մասում, հայ-վրացական սահմանի երկայնքով տեղաբաշխւած ադրբեջանաբնակ եօթ գիւղերում»: Այդ մասին յայտարարւել է Վրաստանում տեղի հասարակական կազմակերպութիւնների եւ մտաւորականութեան ներկայացուցիչների կողմից կազմակերպւած «կլոր սեղան»-ի ժամանակ:
Նշենք, որ այս շրջանների գիւղերը, ինչպիսիք են՝ Բէյթարաբչին, Թեզեքենդը, Բուրման եւ միւսները, հիմնականում բնակեցւած են ադրբեջանցիներով: Կազմակերպւած «կլոր սեղան»-ի մասնակիցները նշել են, թէ իբր վերջին տարիներում յաճախացել են հայ սահմանապահների կողմից ադրբեջանցիների իրաւունքների խախտման դէպքերը, գրանցւել են մարդկանց առեւանգման դէպքեր, նրանց վրայ ճնշումների, ինչպէս նաեւ խոշոր եղջերաւոր անասուններ գողանալու դէպքեր:
Նշւել է նաեւ այն մասին, որ իբր հայ սահմանապահները ուժով զաւթել են աւելի քան 150 հեկտար ցանքատարածութիւն, նաեւ իրենց վերահսկողութեան տակ վերցրել ջրամբարը, իսկ 1948-1949 թթ. սկսած գիւղական բնակչութիւնն օգտւել է հէնց այդ ջրամբարից: Այժմ, ըստ ներկաներից մէկի պատմածի, հայ սահմանապահները կանգնեցնում են ադրբեջանցիներին ջրամբարից 500 մետր հեռաւորութեան վրայ, եւ սահմանը խախտելու պատրւակով արգելում օգտւել ջրամբարից: Ըստ նրա՝ դուրս է գալիս, որ իրենք չեն կարող մշակել իրենց հողատարածքները, որոնց համար արդէն 20 տարուց աւելի հարկ են վճարում:
Ելոյթ ունեցողները նշել են, թէ իբր հայերը հեռացրել են սահմանը՝ դէպի Վրաստանի խորքը՝ 100-150 մետրով: «Հայ սահմանապահները ազատ մտնում են գիւղերը, եւ խախտելով գիւղացիների իրաւունքները՝ նրանց համար ստեղծում են լուրջ խնդիրներ: Մեզ համար մինչ օրս յստակեցւած չեն չէզոք գօտու սահմանները»,- ասում են նրանք:
Իսկ, օրինակ, «Գարապապագ» բարեգործական ընկերութեան նախագահ Էլշադ Ալիեւը պատմել է, թէ իբր ինչպէս որոշ գիւղերից բնակիչներ հայ սահմանապահների կողմից բռնի տարւել են Հայաստան, որտեղ ենթարկւել են տանջանքների: Այժմ ընդունւել է դիմում Վրաստանի վարչապետ Բիձինա Իւանիշւիլիին, որը ստորագրել են Վրաստանում գործող 15 հասարակական կազմակերպութիւնների նախագահներ: Դիմումի մէջ կոչ է արւել պետական սահմանին ապահովել Վրաստանի քաղաքացի հանդիսացող ադրբեջանցիների իրաւունքների պաշտպանութիւնը, ինչպէս նաեւ ճշգրտել Հայաստանի հետ սահմանները:

 

Ամենաշատ ընթերցւած

Քւէարկութիւն

Ապրիլի 24-ի առիթով իր ելոյթում կարտասանի՞ արդեօք Թրամփը Հայոց Ցեղասպանութիւն եզրոյթը:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։