Հա

Քաղաքական

06/02/2018

Թեւան Պօղոսեան. «Ալիեւը հասկանում է, որ ապրիլն «իր ամիսն է», իւրայատուկ ամիս է»

Ադրբեջանի նախագահ Իլհամ Ալիեւի հրամանագրով այդ երկրում ապրիլի 11-ին արտահերթ նախագահական ընտրութիւններ անցկացնելն, ամենայն հաւանականութեամբ, ներքին խնդիրներով է պայմանաւորւած։ Ակնյայտ է, որ այս կարճ ժամանակահատւածում նրա յետագայ պլանները խախտող յուժկու ընդդիմադիր որեւէ միաւոր չի կարող ձեւաւորւել։

«alikonline.ir» - Ադրբեջանի նախագահ Իլհամ Ալիեւի հրամանագրով այդ երկրում ապրիլի 11-ին արտահերթ նախագահական ընտրութիւններ անցկացնելն, ամենայն հաւանականութեամբ, ներքին խնդիրներով է պայմանաւորւած։ Ակնյայտ է, որ այս կարճ ժամանակահատւածում նրա յետագայ պլանները խախտող յուժկու ընդդիմադիր որեւէ միաւոր չի կարող ձեւաւորւել։ «panorama.am»-ի թղթակցի հետ զրոյցում նման տեսակէտ յայտնեց «Մարդկային զարգացման միջազգային կենտրոնի» նախագահ, փորձագէտ Թեւան Պօղոսեանը։

«Նոյնիսկ եթէ պատկերացնեինք, որ այլ երկրներ կը ցանկանային սեփական ռեսուրսներով Ադրբեջանում ինչ-որ միջամտութիւն կատարել, ընդդիմադիր բեւեռ ձեւաւորել, դրա համար եւս ժամանակ էր պէտք»,- ասաց նա՝ չբացառելով, որ եթէ նախագահական ընտրութիւնները տեղի ունենային ըստ նախատեսւածի՝ 2018-ի հոկտեմբերին, հնարաւոր է՝ ընդդիմադիր միաւորներ ձեւաւորելու փորձեր կատարւէին։ Խօսքը, մասնաւորապէս, արտասահմանում բնակւող, ֆինանսական որոշակի միջոցների տիրապետող ադրբեջանցիների մասին է, որոնք կարող էին փորձել երկրի ներսում ընդդիմադիր շարժում ձեւաւորել։

Թեւան Պօղոսեանի խօսքով, արտահերթ ընտրութիւններն ապրիլի 11-ին նշանակելով՝ Ալիեւը փորձելու է նախընտրական պայքարի ընթացքում 2016 թւականի ապրիլեան քառօրեայ պատերազմն իր համար ներկայացնել որպէս «յաղթական» իրադարձութիւն, քողարկել սեփական անյաջողութիւնները։

«Ալիեւը հասկանում է, որ ապրիլն «իր ամիսն է», իւրայատուկ ամիս է։ Նա փորձելու է ժամանակ շահել եւ իր մեսիջները ներկայացնել։ Նա մտածում է, որ թէ անգամ ընդդիմադիր ուժերը խօսեն ապրիլեան պատերազմի մասին, ինքը կասի, որ այդ պատերազմում յաղթանակ է տարել։ Ամէն դէպքում, որեւէ մէկը չի կասկածում, որ Ադրբեջանում ընտրութիւններ տեղի չեն ունենում»,- ասաց փորձագէտը՝ նշելով, որ արտահերթ նախագահական ընտրութիւններ նշանակելով՝ Իլհամ Ալիեւը փորձում է ժամանակից առաջ ընկնել եւ սահուն կերպով անցում կատարել նախագահական կառավարման հերթական շրջափուլին։

Յիշեցնենք, որ Ադրբեջանի նախագահ Իլհամ Ալիեւը հրամանագիր է ստորագրել երկրում ապրիլի 11-ին արտահերթ նախագահական ընտրութիւններ անցկացնելու մասին: Ադրբեջանում նախագահական հերթական ընտրութիւնները պէտք է կայանային հոկտեմբերի 17-ին:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։