Հա

Քաղաքական

15/08/2018

Մաքսատուրք՝ մաքսատուրքի հետեւից. Թուրքիան ԱՄՆ-ի հետ «առեւտրային պատերազմի» մէջ է ներքաշւել

Թուրքիան միացել է այն երկրներին, որոնք մասնակցում են ԱՄՆ-ի հետ «առեւտրային պատերազմին»։ Թուրքիայի նախագահ Ռեջեբ Թայիբ Էրդողանի կարգադրութեամբ չորեքշաբթի, ի պատասխան ԱՄՆ-ի սահմանած պատժամիջոցների, կտրուկ բարձրացւել են մի շարք ամերիկեան ապրանքների ներկրման համար մաքսատուրքերը։

«alikonline.ir» - Թուրքիան միացել է այն երկրներին, որոնք մասնակցում են ԱՄՆ-ի հետ «առեւտրային պատերազմին»։ Թուրքիայի նախագահ Ռեջեբ Թայիբ Էրդողանի կարգադրութեամբ չորեքշաբթի, ի պատասխան ԱՄՆ-ի սահմանած պատժամիջոցների, կտրուկ բարձրացւել են մի շարք ամերիկեան ապրանքների ներկրման համար մաքսատուրքերը։ ԱՄՆ-ից ծխախոտի ներկրման մաքսատուրքն աւելացել է 60%-ով, ալկոհոլինը՝ 140%-ով, մեքենաներինը՝ 120%-ով: Բացի այդ, աւելացել են բրնձի, մրգերի, կոսմետիկ պարագաների եւ մի շարք այլ ապրանքների ներկրման համար մաքսատուրքերը: Գրում է «tert.am»-ը:

Նախօրէին Էրդողանը յայտարարել էր, որ երկիրը կը բոյկոտի Միացեալ Նահանգներում արտադրւող էլեկտրատեխնիկան:

Յիշեցնենք, որ ԱՄՆ-ն կրկնապատկել է Թուրքիայից ալիւմինի ու պողպատի ներկրման համար մաքսատուրքերը, ինչպէս նաեւ Թուրքիայում ամերիկացի հոգեւորականի կալանաւորման շուրջ տարաձայնութիւնների ֆոնին նոր պատժամիջոցներ է սահմանել Անկարայի նկատմամբ:

ԱՄՆ-ի կողմից մաքսատուրքերի սահմանումը, ինչպէս նաեւ ԱՄՆ նախագահ Դոնալդ Թրամփի կոպիտ հռետորաբանութիւնը յանգեցրել են դոլարի նկատմամբ թուրքական լիրայի անկմանը։ Սա առաջացրել է Էրդողանի խիստ բացասական արձագանգը։ Նա ԱՄՆ-ի գործողութիւնները «հարւած թիկունքից» է անւանել, յայտարարել է նոր դաշնակիցներ փնտրելու մասին, հաւաստիացրել է, որ Թուրքիան չի պարտւի «առեւտրային պատերազմում» եւ խոստացել է պատասխան տալ մաքսատուրքերի սահմանմանը։

Էրդողանը վստահ է՝ Թուրքիայի նկատմամբ տնտեսական ճնշման փորձերը յաջողութեամբ չեն պսակւի։ Ըստ նրա՝ ԱՄՆ-ն փորձում է վնաս հասցնել թուրքական տնտեսութեանը, քանի որ «այն համարւում է ամենաուժեղներից մէկը»։

Վերլուծաբանները նշում են, որ թուրքական լիրայի արժեզրկման խնդիրը երէկ չի առաջացել ու կապւած չէ միայն պատժամիջոցների ու մաքսատուրքերի հետ։ Թուրքական լիրայի արժեզրկումը պայմանաւորւած է նաեւ դրամավարկային քաղաքականութեան վրայ Էրդողանի ազդեցութեան հետ կապւած մտավախութիւններով։ Նման կարծիք է յայտնել փորձագէտ Գայդար Հասանովը։ «Sberbank CIB»-ից էլ Անդրէյ Կուզնեցովը յայտնել է, որ Թուրքիայում շարունակւում է արժութային ճգնաժամը. տեղի դրամավարկային իշխանութիւնները դեռ չեն ներկայացրել միջոցառումների ծրագիր, որոնք կը յուսադրէին շուկայի մասնակիցներին։

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։