Հա

Քաղաքական

15/09/2019 - 10:30

Անդրադարձ. Նեթանեահուի Սոչի այցելութեան նպատակները

Իսրայէլի վարչապետ Պենիամին Նեթանիահու 12 սեպտեմբերին այցելեց Սոչի, ուր հանդիպում ունեցաւ Ռուսիոյ նախագահ Վլատիմիր Փութինի եւ պաշտպանութեան նախարար Ալեքսանտր Շոյկուի հետ: Այցելութեան հեռակայ նպատակը Իրանը Սուրիայէն դուրս բերելն էր: Նպատակ մը, որ Իսրայէլ անկարող է իրագործել սեփական ուժով եւ առանց Ռուսիոյ աջակցութեան:

ՎԱՀՐԱՄ ԷՄՄԻԵԱՆ

 

Իսրայէլի վարչապետ Պենիամին Նեթանիահու 12 սեպտեմբերին այցելեց Սոչի, ուր հանդիպում ունեցաւ Ռուսիոյ նախագահ Վլատիմիր Փութինի եւ պաշտպանութեան նախարար Ալեքսանտր Շոյկուի հետ: Այցելութեան հեռակայ նպատակը Իրանը Սուրիայէն դուրս բերելն էր: Նպատակ մը, որ Իսրայէլ անկարող է իրագործել սեփական ուժով եւ առանց Ռուսիոյ աջակցութեան:

Այցելութեան անմիջական նպատակը իսրայէլեան բանակին եւ օդուժին իրանեան, Հըզպալլային պատկանող ու այլ թիրախներու դէմ ունեցած գործունէութեան ազատութեան պահպանումն էր եւ այդ ուղղութեամբ համակարգումի շարունակումը, որ արգելք կը հանդիսանայ երկու երկիրներու բանակներուն միջեւ բախումներու:

9 սեպտեմբերին, ռուսական հալածիչներ դէմ դրին իսրայէլեան ռմբաձիգներու, որոնք կը պատրաստուէին հարուածել Դամասկոսի արուարձանները, ուրկէ Իսրայէլի ուղղութեամբ հրթիռներու «ձախող արձակումներ» կատարուած էին: Դէպքը վստահաբար իսրայէլեան կողմին մօտ յառաջացուց այն մտավախութիւնը, թէ ռուսական կողմը հրաժարած է 2015-ին երկու երկիրներուն միջեւ գոյացած համաձայնութենէն, որ իսրայէլեան բանակին ու օդուժին գործունէութեան ազատութիւն կու տայ Սուրիոյ մէջ թիրախներ հարուածելու:

17 սեպտեմբերին նախատեսուած կանխահաս խորհրդարանական ընտրութիւններէն 5 օր առաջ Նեթանիահուի Ռուսիա այցելութեան երկրորդ անմիջական նպատակն էր Խորհրդային Միութենէն Իսրայէլ գաղթած նկատառելի կշիռ ունեցող ընտրազանգուածի սիրաշահումն ու իր մրցակիցներէն` ինքնին Խորհրդային Միութենէն ներգաղթած Աւիկտոր Լիպըրմանէն քուէներ «գողնալու» փորձը:

Փութին Իսրայէլի վարչապետին հետ միացեալ մամլոյ ասուլիսի ընթացքին յայտնեց. «Գիտենք, թէ Խորհրդային Միութենէն 1,5 միլիոն քաղաքացիներ ներկայիս կը բնակին Իսրայէլի մէջ: Զանոնք միշտ ալ նկատած ենք մեր ժողովուրդը: Մեզի համար չափազանց կարեւոր է, թէ ո՛վ կ՛ընտրուի յառաջիկայ Քնեսեթի անդամ, եւ կը յուսանք, որ անոնք կը պահպանեն մեր պետութիւններուն միջեւ բարեկամութիւնը եւ առաւել եւս կ՛ամրապնդեն մեր յարաբերութիւնները»: Ան խօսքը իր հիւրին ուղղելով ըսաւ. «Անկեղծօրէն կ՛ըսեմ, որ մեր յարաբերութիւնները, ըլլայ այդ անվտանգութեան կամ զինուորական ոլորտներուն  մէջ, նոր որակ ստացան մեծ մասամբ ձեր ջանքերուն շնորհիւ»: Ան այդպիսով ընդառաջեց Նեթանիահուի «թախանձանքին»:

Յառաջիկային յստակ կը դառնայ վերոնշեալ 2 անմիջական նպատակներուն իրագործման համար Նեթանիահուի Ռուսիա կատարած այցելութեան արդիւնքը:

 

«Ազդակ»

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։