Հա

Քաղաքական

Չորեքշաբթի, 29 Նոյեմբերի 2017 11:00

Նախագահը հանդէս է եկել կառավարութեան 100-օրեայ գործունէութեան զեկոյցով

Հանրապետութեան նախագահ դոկտ. Հասան Ռոհանին հանդէս է եկել կառավարութեան 100-օրեայ գործունէութեան զեկոյցով:

«alikonline.ir» - Հանրապետութեան նախագահ դոկտ. Հասան Ռոհանին հանդէս է եկել կառավարութեան 100-օրեայ գործունէութեան զեկոյցով:

Նոյեմբերի 28-ի երեկոյեան Իրանի պետական հեռուստաընկերութեան առաջին ալիքի ուղիղ եթերում հեռարձակւած հարցազրոյցի ընթացքում դոկտ. Ռոհանին կարեւորել է յատկապէս տնտեսական հիմնահարցերն՝ ընդգծելով, որ ժողովրդի միջին եկամուտի բարձրացումը, հարստութեան արդարացի բաշխումն ու բացարձակ աղքատութեան վերացումը համարւում են 12-րդ կառավարութեան հիմնական նպատակները:

Նախագահը նշել է, որ անցեալ 100 օրերի ընթացքում, բացարձակ աղքատութեան վերացման նպատակով, ձեռնարկւել է մի շարք հիմնաւոր քայլեր, որոնք շարունակւելու են կառավարութեան գործունէութեան ողջ ընթացքում:

Անդրադառնալով վերջերս երկրի արեւմտեան շրջաններում տեղի ունեցած աւերիչ երկրաշարժին, Հանրապետութեան նախագահը նշել է, որ արւելու է ամէն ինչ աղէտից տուժածների խնդիրների կարգաւորման համար՝ յաւելելով, որ աղէտից անմիջապէս յետոյ, կառավարութիւնը հաստատել է տուժածներին անհրաժեշտ օգնութիւն ներկայացնելու համար բիւջէն, որի 50 տոկոսն արդէն տրամադրւել է համապատասխան մարմիններին եւ օրգաններին:

Խօսելով արտաքին քաղաքականութեանը վերաբերող թեմաների մասին, դոկտ. Ռոհանին մէկ անգամ եւս ընդգծել է, որ արտաքին աշխարհի հետ կառուցողական գործակցութիւնը համարւում է կառավարութեան արտաքին քաղաքականութեան գլխաւոր ուղղւածութիւնը՝ նշելով, որ այն ենթադրում է տարածաշրջանի հիմնահարցերի կարգաւորումը երկխօսութեան, այլ, ոչ թէ դիմակայութեան ճանապարհով:

Նախագահն ասել է, որ անցեալ տարիների համեմատութեամբ Իրանը ՌԴ-ի եւ ԵՄ-ի հետ ձեւաւորել է տնտեսական եւ քաղաքական աւելի լաւ յարաբերութիւններ: Ինչ վերաբերում է տարածաշրջանին, ապա ըստ դոկտ. Ռոհանիի՝ բացառութեամբ մէկ-երկու երկրի, Իրանը լաւ յարաբերութիւններ ունի մնացած բոլոր երկրների հետ:

«Իրանին որպէս թշնամի ներկայացնելով, Սաուդական Արաբիան փորձում է լուծել երկու խնդիր. առաջինը՝ քողարկել իր տարածաշրջանային ձախողումները, երկրորդը՝ արտաքին թշնամու առկայութեան պատրւակով քողարկել ներքին հիմնահարցերն ու պառակտւածութիւնը»,- ասել է նախագահը:

Ինչ վերաբերում է Միջուկային համապարփակ համաձայնագրին, դոկտ. Ռոհանին մէկ անգամ եւս ընդգծել է, որ դրա շնորհիւ յաջողւեց հասնել կարեւոր յաջողութիւնների, որոնք երբեք չեն ոչնչանայ:

Յարակից Հրապարակումներ

Ամենաշատ ընթերցւած

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։