Հա

Քաղաքական

06/10/2018 - 15:10

Կարէն Խանլարեանը՝ «CFT» օրինագծի մասին. «Պէտք է հաշւի առնել օրինագծի բոլոր՝ դրական եւ բացասական կողմերը»

Իրանն ընդամենը մէկ շաբաթ ժամանակ ունի, որոշելու համար, թէ միանո՞ւմ է արդեօք «FATF»-ին, թէ՝ ոչ: Այդ նպատակով, Իսլ. խորհրդարանն առաջիկայ օրերի ընթացքում պէտք է քննարկի եւ հաւանութեան արժանացնի ահաբեկչութեան ֆինանսաւորման դէմ պայքարի օրինագիծը՝ «CFT»-ին, որպէսզի Իրանը հնարաւորութիւն ունենայ միանալու «FATF»-ին:

«alikonline.ir» - Իրանն ընդամենը մէկ շաբաթ ժամանակ ունի, որոշելու համար, թէ միանո՞ւմ է արդեօք «FATF»-ին, թէ՝ ոչ: Այդ նպատակով, Իսլ. խորհրդարանն առաջիկայ օրերի ընթացքում պէտք է քննարկի եւ հաւանութեան արժանացնի ահաբեկչութեան ֆինանսաւորման դէմ պայքարի օրինագիծը՝ «CFT»-ին, որպէսզի Իրանը հնարաւորութիւն ունենայ միանալու «FATF»-ին:

Աղմկայարոյց այս օրինագծի հետ կապւած տեսակէտները չափազանց արմատական են ու հակասական: Արմատական պահպանողական շրջանակները կտրուկ դէմ են դրան, այն համարելով լրջագոյն սպառնալիք՝ երկրի ազգային անվտանգութեան համար: Փոխարէնը, չափաւորական եւ բարեփոխական շրջանակները կողմ են դրա ընդունմանը՝ նշելով, որ այն կարող է ֆինանսատնտեսական նոր հնարաւորութիւններ ընձեռել երկրին:

«Էբթեքար» օրաթերթը փորձել է վեր հանել ու պարզաբանել խնդրի բոլոր ծալքերը: Այս կապակցութեամբ, պարբերականը զրուցել է նաեւ Իսլ. խորհրդարանում Թեհրանի եւ հիւսիսային իրանահայութեան պատգամաւոր դոկտ. Կարէն Խանլարեանի հետ:

Պատգամաւորը տեղեկացրել է, որ դեռեւս վերջնական կողմնորոշում չունի օրինագծի վերաբերեալ, նշելով, որ սա պայմանաւորւած է օրինագծի հետ կապւած յարափոփոխ իրավիճակով. «Անհրաժեշտ է յստակեցնել, թէ ինչ պատճառով պէտք է ընդունենք «CFT»-ին, կամ՝ հակառակը»,- ասել է նա:

Անդրադառնալով օրինագծի վերաբերեալ թեր եւ դէմ կարծիքներին, Կարէն Խանլարեանը նշել է. «Ընդդիմախօսների ներկայացարած բացասական կէտերի կողքին, կան նաեւ դրական կէտեր: Խորհրդարանական բարեկամութեան խմբերի շրջանակում տեղի ունեցող դիւանագիտական շփումների ժամանակ, մեզ հետ ռազմավարական յարաբերութիւններ ունեցող երկրների՝ Ռուսաստանի եւ Բելառուսիայի պատգամաւորները նշել են, թէ բանաձեւի ընդունումը կը նպաստի մեր դէմ գործադրւող որոշակի ֆինանսական պատժամիջոցների մեղմացմանը, ինչն ինքնին դրական ձեռքբերում կարող է համարւել»:

Պատգամաւորը, սակայն, նշում է, թէ չպէտք է աչքաթող անել նաեւ բացասական կէտերը. «Իսլ. յեղափոխութեան առաջնորդը նշել է, թէ բանաձեւի ընդունման գործում պէտք է այնպէս վարւենք, որպէսզի դրական կողմերը գերազանցեն բացասական կողմերին: Որպէս պատգամաւորի, որը պէտք է քւէարկի բանաձեւերին, փորձելու եմ հաշւի առնել խնդրի բոլոր կողմերը: Հէնց այդ նպատակով էլ մասնակցելու եմ խորհրդարանի ազգային անվտանգութեան յանձնաժողովի վաղւայ նիստին՝ յստակ պատկերացում կազմելու համար»,- ասել է Կարէն Խանլարեանը:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։