Հա

Քաղաքական

01/08/2016 - 13:10

Իրավիճակը գտաւ հանգուցալուծում

Երեւանում, «Սասնայ ծռեր» զինւած խմբաւորման կողմից ՀՀ Ոստիկանութեան պարեկապահակային ծառայութեան գնդի տարածքի գրաւման հետ կապւած իրադարձութիւնները գտան իրենց հանգուցալուծումը:
Երէկ՝ երեկոյեան զինեալները որոշեցին վայր դնել զէնքն ու յանձնւել ՀՀ իրաւապահ մարմիններին:

Զինեալները յանձնւեցին


«ԱԼԻՔ» - Երեւանում, «Սասնայ ծռեր» զինւած խմբաւորման կողմից ՀՀ ոստիկանութեան պարեկապահակային ծառայութեան գնդի տարածքի գրաւման հետ կապւած իրադարձութիւնները գտան իրենց հանգուցալուծումը:
Երէկ՝ երեկոյեան զինեալները որոշեցին վայր դնել զէնքն ու յանձնւել ՀՀ իրաւապահ մարմիններին:
Այս կապակցութեամբ, նախօրէին, «1in.am»-ի հետ զրոյցում տեղեկացրել էր զինւած խմբաւորման անդամ Վարուժան Աւետիսեանը՝ հանդէս գալով յայտարարութեամբ:
Նկարագրելով վերջին օրերին ստեղծւած իրավիճակը՝ Վարուժան Աւետիսեանը նշել էր, թէ խնդրի հանգուցալուծման համար կայ երկու տարբերակ՝ մարտի բռնւել ոստիկանական ուժերի հետ, որի արդիւնքում երկուստեք կը լինեն ծանր կորուստներ, միւսը՝ չգնալ արիւնահեղութեան եւ շարունակել պայքարը, մնալ ռազմագերու կարգավիճակում:
«Շատ ծանր որոշում էր մեր համար, որոշեցինք ընտրել ռազմագերու կարգավիճակը: Մեր առաքելութիւնը համարում ենք կատարւած»,- ասաց նա՝ յաւելելով, որ ըստ իրենց ժողովրդական ընդվզումը կատարւած է, կայ ժողովրդական շարժում, որը շարունակւում է:
Վարուժան Աւետիսեանը ժողովրդին կոչ արեց իրենց որոշումն ընդունել որպէս դրական քայլ եւ շարունակել պայքարը:
Նա տեղեկացրեց, որ ժամը 20:00-ին վայր են դնելու զէնքերն ու յանձնւելու են:
Աւելի ուշ, հաղորդագրութեամբ հանդէս եկաւ նաեւ ՀՀ Ազգային անվտանգութեան ծառայութիւնը՝ տեղեկացնելով, որ յուլիսի 30-ին եւ 31-ին ՊՊԾ գնդի տարածքի ազատագրմանն ուղղւած հակաահաբեկչական օպերացիան աւարտւել է:
«ՀՀ իրաւասու իրաւապահ մարմինների յատուկ նշանակութեան ստորաբաժանումներն իրենց հետեւողական եւ համաձայնեցւած գործողութիւններով ստիպել են զինւած խմբի անդամներին վայր դնել զէնքը եւ յանձնւել իշխանութիւններին:
Ձերբակալւել է 20 ահաբեկիչ: ՊՊԾ գնդի տարածքն ամբողջութեամբ ազատագրւած է»,- ասւած է հաղորդագրութիւնում:
Արդէն յայտնի է, որ զինեալ խմբի հետ բանակցութիւնները վարել է ԼՂՀ ԱԺ-ի պատգամաւոր, Արցախի հերոս գեներալ Վիտալի Բալասանեանը:
Նշենք, որ երէկ՝ առաւօտեան զինւած խմբի անդամներից Սեդրակ Նազարեանը կրծքից վիրաւորւել էր: Այդ մասին լուրը հաստատել էր ՀՀ ոստիկանութիւնը՝ տեղեկացնելով, որ նա տեղափոխւել է հիւանդանոց, ուր ենթարկւել է վիրահատութեան:
Իսկ երեկոյեան Երեւանի Ազատութեան հրապարակում տեղի է ունեցել հերթական հանրահաւաքը՝ ի աջակցութիւն նախօրէին իշխանութիւններին յանձնւած «Սասնայ ծռեր» զինւած խմբի: Հանրահաւաքին յաջորդել է երթ՝ Երեւանի կենտրոնական փողոցներով:
Լրատւութիւնը՝ ըստ «yerkir.am»-ի եւ «tert.am»-ի լրահոսի:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։