Հա

Քաղաքական

17/01/2017

Թուրքագէտ.- «Պէտք չէ ակնկալել, որ ամերիկեան որեւէ բարձրաստիճան պաշտօնեայ արձագանգելու է Վաշինգտոնի ինստիտուտի՝ Հայոց Ցեղասպանութիւնը չճանաչելու կոչին»

Վարուժան Գեղամեանը նշեց, որ պէտք է հասկանալ, որ Հայոց Ցեղասպանութիւնը Թուրքիայի նկատմամբ Ամերիկայի քաղաքականութեան միայն մի դրւագն է:

Թուրքագէտ Վարուժան Գեղամեանը «tert.am»-ի հետ զրոյցում անդրադարձել է Վաշինգտոնի Մերձաւոր Արեւելքի քաղաքականութեան ինստիտուտի (WINEP) վերջերս հրապարակւած «Թուրքիայի վերաբերեալ ԱՄՆ-ի քաղաքականութեան» մասին առաջարկներ պարունակող զեկոյցին, որտեղ Միացեալ Նահանգների նորընտիր նախագահ Դոնալդ Թրամփին կոչ է արւել Թուրքիային «երաշխիք տալ», որ ԱՄՆ-ի Կոնգրեսը չի ճանաչի Հայոց Ցեղասպանութիւնը: Ըստ թուրքագէտի՝ ամերիկեան հետազոտական կենտրոնի զեկոյցի ազդեցութիւնը վերլուծական բնոյթի է, այն որեւէ քաղաքական ուժ իրենից չի ներկայացնում, պարզապէս գրւած է զեկոյց ամերիկեան արտաքին քաղաքականութեան մի ոլորտի՝ մասնաւորապէս թուրք-ամերիկեան յարաբերութիւնների մասին: «Պէտք չէ ակնկալել, որ ամերիկեան որեւէ բարձրաստիճան պաշտօնեայ, ինչ-որ ձեւով արձագանգելու է»,- ասաց նա:

Ինչ վերաբերում է Ամերիկայի քաղաքականութեանը Թուրքիայի նկատմամբ, թուրքագէտն ասաց, որ դեռեւս վաղ է խօսել այն մասին, թէ ինչպէս է լինելու Թրամփի արտաքին քաղաքականութիւնը ընդհանրապէս, քանի որ դեռ յայտնի չէ նոյնիսկ թէ ովքեր են զբաղեցնելու արտաքին քաղաքականութեան համար պատասխանատու պաշտօններ, ինչից շատ բան է կախւած: «Դատելով նախընտրական քարոզարշաւի ընթացքում Ամերիկայում տիրող տրամադրութիւններից, ապա կարող ենք ասել, որ Թրամփը  բաւական պրագմատիկ է լինելու:  Նա չի նայում որեւէ դաշինքի, այդ թւում թուրք-ամերիկեան դաշինքին այնպէս յստակ, ինչպէս եղել է մինչ այս ամերիկեան քաղաքականութեան մէջ: Այսինքն` նա պատրաստ է զոհել երկրների միջեւ այս կամ այն քաղաքական դաշինքը, եթէ դա է պահանջում ամերիկեան արտաքին քաղաքականութեան պրագմատիկ վերաբերմունքը»,-ասաց նա:

Վարուժան Գեղամեանը նշեց, որ պէտք է հասկանալ, որ Հայոց Ցեղասպանութիւնը Թուրքիայի նկատմամբ Ամերիկայի քաղաքականութեան միայն մի դրւագն է: «Թրամփը ի տարբերութիւն նախկին նախագահ Օբամայի՝ չի յայտարարել, որ ճանաչելու է Հայոց Ցեղասպանութիւնը, սա պարզապէս զեկոյց է եւ չարժէ շատ ուշադրութիւն դարձնել զեկոյցին»,- ասաց նա:

 

 

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։