Հա

Հասարակական

Հինգշաբթի, 26 Յունւարի 2017 11:10

Թեմիս առաջնորդը մասնակցել է դամասկոսում անց կացւած միջազգային համագումարին

Յունւարի 24-ին, Սիրիայի մայրաքաղաք Դամասկոսում տեղի ունեցաւ միջազգային մի համագումար՝ «Երկնային առաքելութեանց (կրօնների) մէկութիւնը եւ նրանց դերը համաշխարհային խաղաղութեան հաստատման մէջ» թեմայով։ 

«ԱԼԻՔ» - Յունւարի 24-ին, Սիրիայի մայրաքաղաք Դամասկոսում տեղի ունեցաւ միջազգային մի համագումար՝ «Երկնային առաքելութեանց (կրօնների) մէկութիւնը եւ նրանց դերը համաշխարհային խաղաղութեան հաստատման մէջ» թեմայով։ Այս մասին տեղեկանում ենք ազգային առաջնորդարանից: 

Սոյն համագումարը կազմակերպւած էր Սիրիայի կրօնի նախարարութեան՝ «ԱուկաՖ»-ի եւ Սիրիայում հաւատարմագրւած Իրանի Իսլամական Հանրապետութեան դեսպանատան մշակութային կցորդութեան կողմից։ Համագումարին հրաւիրւած էին Իրանից, Լիբանանից, Իրաքից եւ Սիրիայից մտաւորականներ, կրօնական կազմակերպութիւնների ներկայացուցիչներ, ինչպէս նաեւ Իրանի Իսլամական Հանրապետութեան եւ Իսլ. յեղափոխութեան հոգեւոր առաջնորդ այաթ. Ալի Խամենէիի ներկայացուցիչները Սիրիայից, Լիբանանից, Իրաքից եւ Իրանից։ 

Հրաւիրւած էին նաեւ Դամասկոսի եւ Լիբանանի քրիստոնեայ հոգեւոր պետերը, որոնց կարգին հրաւիրւած էր նաեւ Ն.Ս.Օ.Տ.Տ. Արամ Ա կաթողիկոսն ու Թեհրանի հայոց թեմի առաջնորդ Տ. Սեպուհ արք. Սարգսեանը, որ մասնակցեց սոյն համագումարին ներկայացնելով միաժամանակ Վեհափառ Հայրապետը։ 

Սեպուհ սրբազանը յատուկ ելոյթ ունեցաւ «Համատեղ գոյակցութեան անհրաժեշտութիւնը խաղաղութեան գործընթացում»։ Սրբազան Հայրը նախ ներկաներին փոխանցեց վեհափառ հայրապետի ողջոյնները, օրհնութիւններն ու բարեմաղթութիւնները համագումարի յաջողութեան համար. այնուհետ Սրբազան հայրը Ս. Գրային եւ Քուրանից մէջբերումներով անդրադարձաւ միաստւածեան կրօնների հասարակաց հաւատալիքների եւ հետեւորդների համատեղ գործակցութեան անհրաժեշտութեան շեշտելով, որ առանց կրօնների միջեւ համագործակցութեան կարելի չէ իրագործել խաղաղութիւնը:

Հարկ է ուրախութեամբ յիշել, որ համագումարի մասնակցողները եւ յատկապէս հոգեւոր առաջնորդների ներկայացուցիչները յատուկ գոհունակութեամբ անդրադարձան Սրբազան Հօր ելոյթին։

Յայտնենք նաեւ, որ Ասորի Ուղղափառ եւ Յոյն Ուղղափառ պատրիարքների ներկայացուցիչները եւս յատուկ ելոյթ ունեցան այս առիթով։

Յարակից Հրապարակումներ

Ամենաշատ ընթերցւած

Քւէարկութիւն

Ապրիլի 24-ի առիթով իր ելոյթում կարտասանի՞ արդեօք Թրամփը Հայոց Ցեղասպանութիւն եզրոյթը:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։