Հա

Հասարակական

18/12/2018 - 08:30

Հարցում. Երեխաները Ձմեռ պապիին դադարում են հաւատալ ութ տարեկանից

Էքսեթերի համալսարանի պրոֆեսորը պարզել է միջին տարիքը, երբ երեխաները դադարում են հաւատալ Ձմեռ պապիի մասին Սուրբծննդեան գլխաւոր առասպելին: Համալսարանի կայքում հրապարակւած «Սանտայի հարցման» եզրակացութիւնների համաձայն, երեխաները հիմնականում Ձմեռ պապիին դադարում են հաւատալ ութ տարեկանից:

«alikonline.ir» - Էքսեթերի համալսարանի պրոֆեսորը պարզել է միջին տարիքը, երբ երեխաները դադարում են հաւատալ Ձմեռ պապիի մասին Սուրբծննդեան գլխաւոր առասպելին: Համալսարանի կայքում հրապարակւած «Սանտայի հարցման» եզրակացութիւնների համաձայն, երեխաները հիմնականում Ձմեռ պապիին դադարում են հաւատալ ութ տարեկանից: Տեղեկացնում է «Արմէնպրես»-ը:

Հետազօտութեան ընթացքում հոգեբան Քրիս Բոյլը նաեւ պարզել է, որ երեխաներից շատերը չեն վախենում յայտնւել անհնազանդների ցուցակում եւ յաճախ ծնողների առջեւ կեղծաւորում են՝ պաշտպանելով առասպելը: Գիտնականի եզրակացութիւնները հիմնւած են ամբողջ աշխարհի 1.2 հազար մեծահասակների պատասխանների վրայ, որոնք գլխաւորապէս անդրադարձել են մանկական յիշողութիւններին:

Հարցման մասնակիցների աւելի քան երրորդ մասը (34 տոկոսը) կը ցանկանար հեքիաթային հերոսի նկատմամբ հաւատը պահպանել նաեւ չափահաս դառնալով. նոյնքան հարցւածներ էլ կարծում են, որ առասպելը նպաստել է մանկութեան շրջանում իրենց լաւ վարքագծին: 

Ընդ որում՝ 47 տոկոսը կապ չի նկատել իր վարքագծի եւ Ձմեռ պապիի նկատմամբ հաւատի միջեւ: Հարցման մասնակիցների 30 տոկոսից աւելին պատմել են, որ վշտացել են, երբ իմացել են, որ Ձմեռ պապին գոյութիւն չունի, 10 տոկոսը ցասումով է լցւել, իսկ 15 տոկոսն իրեն խաբւած է զգացել իր ծնողների կողմից: 

Չնայած դրան, հարցւածների միայն 30 տոկոսն է կարծում, որ առասպելի պսակազերծումը ազդել է մեծահասակների նկատմամբ իրենց վստահութեան վրայ: Իսկ մեծամասնութեան (56 տոկոս) համար այդ նորութիւնը աւագներին պակաս վստահելու առիթ չի դարձել: 

Ծնողների 72 տոկոսը խոստովանում է, որ իրենց հաճոյք է պատճառում ընտանիքում առասպելի պահպանումը, թէեւ 40 տոկոսն իրենց երեխաներին ճշմարտութիւնն է պատմել, եթէ նրանք ուղղակիօրէն հարցրել են Ձմեռ պապիի մասին, հաղորդել ե «ՏԱՍՍ»-ը:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։