Հա

Հասարակական

20/05/2019 - 09:30

Երբ բացակայում է փոխվստահութիւնը

Մարդիկ, որ մի քանի ամիս առաջ ՀՀ երկրորդ նախագահ Ռոբերտ Քոչարեանի կալանաւորումը համարում էին քրէական հետապնդում, այսօր արդէն հանգիստ խղճով խօսում են այն մասին, որ Քոչարեանի նկատմամբ խափանման միջոցի փոփոխութիւնը քաղաքական որոշում է: Այդ մարդկանց մտածողութեան մէջ տեղի ունեցած ակնյայտ տրանսֆորմացիան, թերեւս, կարելի է բացատրել նրանց քրոնիկ փոփոխամտութեամբ, իսկ ոմանց պարագայում էլ նոյնիսկ ակնյայտ տգիտութեամբ:

ԷԴԻԿ ԱՆԴՐԷԱՍԵԱՆ

 

Մարդիկ, որ մի քանի ամիս առաջ ՀՀ երկրորդ նախագահ Ռոբերտ Քոչարեանի կալանաւորումը համարում էին քրէական հետապնդում, այսօր արդէն հանգիստ խղճով խօսում են այն մասին, որ Քոչարեանի նկատմամբ խափանման միջոցի փոփոխութիւնը քաղաքական որոշում է: Այդ մարդկանց մտածողութեան մէջ տեղի ունեցած ակնյայտ տրանսֆորմացիան, թերեւս, կարելի է բացատրել նրանց քրոնիկ փոփոխամտութեամբ, իսկ ոմանց պարագայում էլ նոյնիսկ ակնյայտ տգիտութեամբ:

Ռոբերտ Քոչարեանն առաջին իսկ օրից յայտարարել էր, որ սա քաղաքական հետապնդում է, ինչին իշխանամէտ մամուլն ու վերլուծաբանները մի տեւական ժամանակ հակադարձում էին իրենց ցինիկ յայտարարութիւններով ու զարմանքով, թէ սա մաքուր քրէական գործ է: Իր յայտարարութեան համատեքստում Քոչարեանը խօսեց նաեւ մեծ քաղաքականութիւն վերադարձի եւ ընդդիմութեան հետ համագործակցութեան պատրաստակամութեան մասին, ինչը եւս համարժէք գնահատականի չարժանացաւ մամուլում եւ պաշտօնական շրջանակներում: Տպաւորութիւն ստեղծւեց, որ ՀՀ իշխանութիւններն իսկապէս հաւատում էին, որ Քոչարեանի դէմ իրենց իսկ հարուցած գործը քրէական է:

Արցախի Հանրապետութեան ներկայ եւ նախկին նախագահների երաշխաւորութեամբ Ռոբերտ Քոչարեանի խափանման միջոցը փոխելու մասին դատարանի որոշումը, սակայն, 180 աստիճանով փոխեց այդ գործի հետ կապւած՝ մինչ մայիսի 18-ը եղած թիւր կարծիքները: Դատարանի վճռի հրապարակումից յետոյ տեղի ունեցած հասարակական յուզումները, որոնց ուղղորդւածութիւնը անկարելի եղաւ թաքցնել, վկայեցին, որ ՀՀ իշխանութիւնները բռնւել են հերթական ստի մէջ, եւ որ Ռոբերտ Քոչարեանի դէմ իրականացւող հետապնդումը զուտ քաղաքական հետապնդում է՝ իր բոլոր պատճառահետեւանքային կապերով հանդերձ:

Այսօր արդէն կարելի է հանգիստ խղճով յայտարարել, որ Ռոբերտ Քոչարեանը վերադարձաւ քաղաքականութիւն եւ, որ ակնյայտ է, դա տեղի ունեցաւ ՀՀ իշխանութիւնների «թեթեւ ձեռքով»: Այս տեսանկիւնից ես շնորհաւորում եմ Նիկոլ Փաշինեանին, Մարտի 1-ի գործը ռեւանշիստական մեթոդներով բացայայտելու հարցում նրա գլխաւոր խորհրդական Լեւոն Տէր-Պետրոսեանին եւ, իհարկէ, այն խաժամուժին, որ փողոց հանւեց մարտի 18-ին՝ որպէս կատաղի հակաքոչարեանական կենսազանգւած:

Ճիշտն ասած՝ մենք սպասում էինք, որ դատարանի սթափեցնող վճիռը բոլորովին այլ ազդեցութիւն կը գործեր դատարանի բակում երկու բանակների վերածւած մարդկանց վրայ, բայց, ցաւօք, դա տեղի չունեցաւ իրաւական պետութիւն կառուցող մեր իշխանութիւնների կամակորութեան, այդ իշխանութիւններին սպասարկող առանձին օրէնսդիրների մատուցած արջի ծառայութեան, ընդհուպ՝ վարչապետի խօսնակի՝ տարընթերցումներով յագեցած յայտարարութեան հետեւանքով: Մենք հակւած էինք այն մտքին, որ Արցախի Հանրապետութեան նախկին եւ ներկայ ղեկավարների քայլը, որն ի դէպ Նիկոլ Փաշինեանի համար փրկօղակ էր ստեղծւած կացութիւնից պատւով դուրս գալու համար, եւ դրանով պայմանաւորւած դատարանի վճիռը կը դառնային Հայաստան-Արցախ միասնութեան եւ մէկ պետութիւն լինելու հերթական ապացոյցը: Բայց այժմ ստիպւած ենք խոստովանել, որ Հայաստանում այլեւս իրողութիւն են հասարակութեան երկփեղկւածութիւնն ու պառակտւածութիւնը, Հայաստան-Արցախ հակասութիւնների անթոյլատրելի խորացումը, ինչպէս նաեւ իրաւական պետութիւն եւ համերաշխ հասարակութիւն կառուցող իշխանութիւնների խայտառակ ձախողումը:

Հայկական թաւշեայ, ոչ բռնի ժողովրդական յեղափոխութիւնն այլեւս դարձել է հայաստանեան առանձին լրատւամիջոցների փրկութեան վերջին հանգրւանը: Արցախի ղեկավարների միջնորդութիւնը համարում են հարւած յեղափոխութեանը, հարւած Արցախից, հակայեղափոխութեան յաղթանակը յեղափոխականների նկատմամբ: Նոյն ջուրն է, նոյն ջրաղացը, բայց դարձեալ լուռ են իշխանութիւնները: Մինչդեռ վաղուց ժամանակն է, որ նրանք սթափւեն եւ իրենց լրջմիտ յայտարարութիւններով կասեցնեն դէպի անդունդ տանող այս ընթացքը: Մեր բազում խնդիրները երբեք չեն լուծւի, քանի դեռ կը գնանք հասարակութեան պառակտման եւ նրա ներսում բաժանարար կարմիր գծերի խտացման ճանապարհով: Ի՞նչ խօսք կարող է լինել կեանքի որակի բարձրացման, տնտեսութեան զարգացման, ներդրումների, նոր աշխատատեղերի ստեղծման, աղքատութեան յաղթահարման, ամուր բանակ ունենալու, կոռուպցիան յաղթահարելու, օրէնքի առաջ բոլորի հաւասարութեան եւ նման բաների մասին, երբ հասարակութիւնն ամբողջութեամբ սեւեռւած է ներքին թշնամիներ յայտնաբերելու վրայ, երբ այդ հասարակութեան մէջ բացակայող թիւ մէկ ապրանքը միմեանց հանդէպ ունեցած վստահութիւնն է:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։