Հա

Մարզական

04/07/2018 - 10:30

Օշին Սահակեանը հրաժեշտ է տւել Իրանի բասկետբոլի ազգային հաւաքականին

Յուլիսի 2-ին, բասկետբոլի 2019 թւականի աշխարհի առաջնութեան ընտրական փուլի Իրանի-Ղազաղստան հանդիպման աւարտին, իրանահայ ճանաչւած բասկետբոլիստ Օշին Սահակեանն յայտարարել է ազգային հաւաքականի կազմում իր ելոյթների աւարտի մասին:

«alikonline.ir» - Յուլիսի 2-ին, բասկետբոլի 2019 թւականի աշխարհի առաջնութեան ընտրական փուլի Իրանի-Ղազաղստան հանդիպման աւարտին, իրանահայ ճանաչւած բասկետբոլիստ Օշին Սահակեանն յայտարարել է ազգային հաւաքականի կազմում իր ելոյթների աւարտի մասին:

Օշինի որոշումն անակնկալ է եղել հաւաքականի մարզչական շտաբի եւ նրա խաղընկերների համար, որոնք արցունքոտ աչքերով են հրաժեշտ տւել ազգային հաւաքականի երկար տարիների առանցքային բասկետբոլիստներից մէկին:

Ինքը՝ Օշինն իր այդ որոշումը պայմանաւորել է հաւաքականի կազմում երիտասարդ բասկետբոլիստներին ելոյթ ունենալու եւ կայանալու հնարաւորութիւն տալու հանգամանքով:

«Հրաժեշտի պահը վրայ էր հասել: Կան բազմաթիւ երիտասարդ բասկետբոլիստներ, որոնք սպասում են հնարաւորութեան՝ հաւաքականում հանդէս գալու համար: Տաղանդաւոր այդ երիտասարդները կարող են փոխարինել ինձ: Նրանց առիթ է պէտք»,- լրագրողների հետ զրոյցի ժամանակ ասել է Օշինը:

Նշենք, որ հաւաքականի 32-ամեայ յարձակւողն իր պրոֆեսիոնալ կարիերան սկսել է 2004 թւականին, Սպահանի «Զոբահան» թիմում, որի կազմում հանդէս է եկել մինչ 2012 թւականը:

«Զոբահան»-ից բացի նա հանդէս է եկել նաեւ «Ֆուլադ Մահան», «Մահրամ», «Շիմիդոր» եւ «Փեթրոշիմի Բանդար Էմամ» թիմերի կազմում:

Հէնց ամենասկզբից նա ընդգրկւել է նաեւ Բասկետբոլի ազգային հաւաքականի կազմում՝ դառնալով թիմի առանցքային բասկետբոլիստներից մէկը:

«alikonline»-ը յաջողութիւն է մաղթում սիրելի Օշինին՝ նրան մաղթելով նորանոր յաջողութիւններ սպորտի, եւ կեանքի բոլոր ասպարէզներում:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։