«ԱԼԻՔ» – Եթէ գազայում սիոնիստների յանցագործութիւնները չդադարեցւեն, ապա ոչ ոք չի կարող կանգնեցնել դիմադրութեան ուժերին: Այս մասին երէկ՝ հոկտեմբերի 17-ին յայտարարել է Իսլ. յեղափոխութեան առաջնորդ այաթ. Սէյէդ Ալի Խամենէին, երկրի գիտական էլիտայի եւ տաղանդների հետ հանդիպման ժամանակ:
Պաղեստինի ներկայիս իրավիճակն անւանելով սիոնիստական ռեժիմի բացայայտ յանցագործութիւնն ու ցեղասպանութիւնը ողջ աշխարհի աչքի առջեւ, Իսլ. յեղափոխութեան առաջնորդն ասել է. «Եթէ այս յանցագործութիւնները շարունակւեն մուսուլմաններն ու դիմադրութեան ուժերը կը դառնան անհամբեր, եւ ոչ ոք չի կարողանայ կանգնեցնել նրանց»:
Այաթ. Խամենէին ԱՄՆ-ին պատասխանատու է համարել սիոնիստների յանցագործութիւնների համար եւ նշել է. «Բազմաթիւ տեղեկութիւնների համաձայն՝ սիոնիստական ռեժիմի ներկայիս քաղաքականութեան կարգաւորողներն ամերիկացիներն են: ԱՄՆ-ն այս հարցում պատասխանատու է եւ պէտք է ճանաչի իր պատասխանատւութիւնը»:
Իսլ. յեղափոխութեան առաջնորդն ընդգծել է, որ սիոնիստական ռեժիմը պէտք է պատասխանատւութեան ենթարկւի կատարած յանցագործութիւնների համար:
