Սերոբ Սահակեան. «Իսրայէլի ու Թուրքիայի միջեւ լարւածութիւնը պատերազմի չի յանգեցնի»
![](/wp-content/uploads/2024/07/3383-780x470.jpg)
«ԱԼԻՔ» – Alpha News-ի ուղիղ եթերում ՀՅԴ անդամ, Երուսաղէմի Հայ Դատի յանձնախմբի ակտիւիստ Սերոբ Սահակեանը մեկնաբանել է Թուրքիայի նախագահ Թայիփ Էրդողանի յայտարարութիւնն այն մասին, թէ իրենք կարող են Իսրայէլ մտնել այնպէս, ինչպէս ժամանակին մտել են Լեռնային Ղարաբաղ և Լիբիա։
«Իսրայէլի ու Թուրքիայի միջեւ «հրաձգութիւնը» ուղղակի խօսքային մակարդակում էլ կը մնայ։ Այս յարաբերական լարւածութեան նկատմամբ շատ մեղմ վերաբերմունք ունեմ։ Այս օրերին լիբանանեան ճակատն է աւելի լարւած։ Չեմ կարծում, որ այդ լարւածութիւնը վերջիվերջոյ պատերազմի կը յանգեցնի։ Պատերազմ, իհարկէ, կայ, բայց դա լայնածաւալ պատերազմի չէ։ Չեմ կարծում, որ Իսրայէլը պատրաստ է այդպիսի ծայրայեղ քայլի գնալ։ Եթէ Իսրայէլը ունենար պատերազմի տրամադրւածութիւն, պատերազմի քայլ կանէր։ Իսրայէլը ամէն ձեւ փորձում է այս հարցը մեղմել, աւարտին հասցնել»,- ասել է Սերոբ Սահակեանը։
Նա նաեւ անդրադարձել է Իսրայէլի հայ համայնքի տրամադրւածութիւններին՝ առկայ լարւածութեան ֆոնին։
«Հակառակ բոլոր լարւածութիւնների՝ Իսրայէլի ու Թուրքիայի յարաբերութիւնները միշտ էլ կատարեալ են եղել։ Իսրայէլի հայ համայնքը կեանքի, անվտանգութեան սպառնալիք չունի։ Մենք այնպիսի վայրում ենք, որ այդ հրթիռները մեզ, բարեբախտաբար, չեն հասնի։ Այնպէս չէ, որ արտակարգ դրութիւն է։ Ամէն մարդ իր ապրուստի ձեւը գտել է ու ապրում է»,- եզրափակել է մեր զրուցակիցը։