ԱԳՆ խօսնակ. «Իրանի եւ ԱՄՆ-ի միջեւ բանակցութիւնների յաջորդ փուլի ամսաթիւը դեռեւս որոշւած չէ»
«ԱԼԻՔ» – ԱԳ նախարարութեան պաշտօնական ներկայացուցիչ Էսմայիլ Բաղային երէկ` մայիսի 25-ին, յայտարարել է, որ Իրանի եւ Միացեալ Նահանգների միջեւ բանակցութիւնների յաջորդ փուլի ամսաթիւը դեռեւս որոշւած չէ։
Բաղային նշել է, որ բանակցութիւնների 6-րդ փուլի անցկացման ամսաթւի եւ վայրի մասին տեղեկութիւնները լրատւամիջոցների կողմից ընդամէնը շահարկումներ են։
Այս առնչութեամբ Օմանի ԱԳ նախարարութեանը վերագրւող թւիթի կապակցութեամբ Բաղային պարզաբանել է, որ թւիթը կեղծ է եւ իրականութեանը չի համապատասխանում։
Յիշեցնենք, որ Իրանի եւ ԱՄՆ-ի պատւիրակութիւնները ուրբաթ օրը Հռոմում հանդիպել են միջուկային անուղղակի բանակցութիւնների 5-րդ փուլում, եւ երկու կողմերն էլ յամաձայնել են շարունակել բանակցութիւնները Օմանի միջնորդութեամբ։
Նշենք, որ բանակցութիւնների 5-րդ փուլից յետոյ ԱԳ նախարար Սէյէդ Աբբաս Արաղչին յայտարարել է, որ Օմանի ԱԳ նախարարը ներկայացրել է տարբեր գաղափարներ, որոնք կարող են առաջընթացի յանգեցնել հետագայ փուլերում։
