ԱԳ նախարարը հեռախօսազրոյց է ունեցել ՄԱԳԱՏԷ-ի գլխաւոր տնօրէնի հետ
«ԱԼԻՔ» – Ատոմային էնէրգիայի միջազգային գործակալութեան գլխաւոր տնօրէնը եւ ԱԳ նախարարը հեռախօսազրոյցի ընթացքում քննարկել են միջուկային բանակցութիւնների եւ պատժամիջոցների վերացման վերաբերեալ վերջին զարգացումները, տեղեկացրել է ԻՌՆԱ-ն:
Աղբիւրի համաձայն, շաբաթ ՝ յունիսի 10-ին, ՄԱԳԱՏԷ-ի գլխաւոր տնօրէն Ռաֆայէլ Գրոսսիի հետ զրոյցի ընթացքում Արաղչին քննարկել է միջուկային բանակցութիւնների եւ պատժամիջոցների վերացման վերաբերեալ վերջին զարգացումները, ինչպէս նաեւ քննարկւել է Գործակալութեան կողմից Իրանի վերաբերեալ վերջերս հրապարակւած զեկոյցը։
Անդրադառնալով գործակալութեան հետ Իրանի կառուցողական եւ շարունակական համագործակցութեանը, ինչպէս նաեւ միջուկային գործունէութեան ոլորտում նիւթերի չշեղմանը, նախարարը կոչ է արել փաստերն արտացոլել այնպէս, որ որոշ կողմերին հնարաւորութիւն չտրւի չարաշահելու այն՝ Իրանի ժողովրդի դէմ իրենց քաղաքական նպատակներն առաջ մղելու համար։
Արաղչին նաեւ կոչ է արել Գործակալութեան գլխաւոր տնօրէնին յաջորդ շաբաթ կառավարիչների խորհրդի նիստում ներկայացնել Գործակալութեան հետ Իրանի համագործակցութեան բոլոր կողմերը եւ անպայմանօրէն նշել քաղաքական հայեացքներով պայմանաւորւած մօտեցումների հետեւանքների մասին, քանի որ Իրանը համապատասխանաբար կարձագանքի ցանկացած անպատշաճ քայլի, որի պատասխանատւութիւնը կրելու են այն կողմերը, որոնք գործակալութիւնն ու դրա կարգաւորումները օգտագործում են որպէս գործիք՝ Իրանի դէմ իրենց քաղաքական ծրագրերը առաջ մղելու համար։
