ԱՄՆ Դեմոկրատական կուսակցութիւնում կասկածում են Քամալա Հարիսի քաղաքական ապագայի հարցում

«ԱԼԻՔ» – ԱՄՆ նախկին փոխնախագահ Քամալա Հարիսը յայտարարել է ընտրարշաւներին մասնակցութիւնից ժամանակաւորապէս հրաժարւելու մտադրութեան մասին՝ կենտրոնանալով երկրով մէկ ուղեւորութիւնների, հանրային երկխօսութեան եւ հնարաւոր ոչ առեւտրային նախաձեռնութիւնների վրայ։ Այդ մասին ըստ ամերիկեան Politico-ի՝ նա պատմել է Սթիւէն Քոլբերի երեկոյեան շոուի եթերում։

«Ես ուզում եմ շրջել երկրով։ Ուզում եմ լսել մարդկանց։ Չեմ ուզում, որ սա նման լինի մի գործարքի, որտեղ ես խնդրում եմ ձայն տալ ինձ»,- ասել է Հարիսը՝ ընդգծելով, որ չի պատրաստւում ամբողջութեամբ հեռանալ քաղաքացիական ակտիւութիւնից։

Ըստ նրա՝ ԱՄՆ քաղաքական համակարգը ճգնաժամի մէջ է. «Կարծում եմ՝ այն կոտրւած է»,- խոստովանել է Հարիսը՝ զարմանք առաջացնելով ստուդիայում։

Ըստ Հարիսի՝ պաշտօնական պաշտօնից հրաժարումը նրան հնարաւորութիւն է տալիս «մարդկանց յիշեցնել իրենց ուժի մասին» եւ աւելի մօտ լինել հասարակութեանը՝ ընտրութիւնների համատեքստից դուրս։ Ներկայումս նա գրքի շրջագայութեան մէջ է եւ դիտարկում է հանրային նախաձեռնութիւն սկսելու հնարաւորութիւնը։

Չնայած 2028 թւականի ընտրութիւններում նրա հեռանկարի վերաբերեալ Դեմոկրատական կուսակցութեան մի շարք ներկայացուցիչների կասկածներին՝ կուսակցական որոշ առաջնորդներ շարունակում են իրենց աջակցութիւնը յայտնել Հարիսին։ Մինեսոտայի նահանգապետ Թիմ Ուոլզը յայտարարել է, որ կողջունի նրա առաջադրումը. «Կարծում եմ՝ նա հիանալի թեկնածու էր եւ հիանալի նախագահ կը դառնայ»։

Իլինոյսի նահանգապետ Ջէյ Բի Փրիցկերը, որը նոյնպէս յիշատակւում է որպէս հնարաւոր թեկնածու, Հարիսին անւանել է «կուսակցութեան հիանալի ներկայացուցիչ» եւ ընդգծել նրա դերը ընտրողների հետ սոցիալ-տնտեսական մարտահրաւէրների շուրջ երկխօսութեան մէջ։

Որոշ վերլուծաբաններ, այդ թւում՝ ռազմավար Դարի Սրագոուն, կարծում են, որ ակտիւ քաղաքականութիւնից ժամանակաւոր հեռանալը կարող է ամրապնդել նրա դիրքերը ապագայում. «Ես յարգում եմ նրան, որ իջել է քաղաքական կոնւէյերից. դա կարող է նրան աւելի ուժեղ դարձնել»։

Սակայն կուսակցութեան ներսում թերահաւատութիւն է պահպանւում։ Որոշ խորհրդատուներ մատնանշում են հնարաւոր հեղինակային ռիսկերը, որոնք կապւած են Բայդէնի վարչակազմում նրա մասնակցութեան եւ նախագահի վիճակի վերաբերեալ նրա իրազեկւածութեան շուրջ չլուծւած հարցերի հետ։ Հարիսի նախկին աշխատակիցներից մէկը կասկած է յայտնել փրայմերիզներում յաղթելու նրա կարողութեան վերաբերեալ եւ նշել, որ կուսակցութիւնը կարող է աւելի հեռանկարային թեկնածուներ ունենալ։