«ԱԼԻՔ» – «Ժողովրդի, պաշտօնեաների եւ Զինւած ուժերի միջեւ անսասան համերաշխութեան պողպատէ վահանը չպէտք է խաթարւի»: Այս մասին, երէկ՝ օգոստոսի 24-ին, Էմամ Ռեզայի նահատակութեան սգոյ արարողութեան ժամանակ, հասարակութեան տարբեր շերտերի հազարաւոր ներկայացուցիչների հետ հանդիպման ժամանակ յայտարարել է Իսլ. յեղափոխութեան առաջնորդ այաթ. Սէյէդ Ալի Խամենէին՝ ընդգծելով ազգային միասնութեան պահպանման եւ երկրի պաշտօնեաներին աջակցելու անհրաժեշտութիւնը:
«Թշնամին 12-օրեայ պատերազմում պարտւելուց յետոյ ձգտում է պառակտում սերմանել»,- զգուշացրել է Իսլ. յեղափոխութեան առաջնորդը՝ կարեւորելով պատերազմի օրերին իրանական հասարակութեան մօտ ձեւաւորւած աննախադէպ համերաշխութեան եւ միասնութեան մթնոլորտի պահպանման անհրաժեշտութիւնը:
Անդրադառնալով Իրանի նկատմամբ ԱՄՆ վարչակազմի առաջ քաշած պայմաններին, որոնք ոչ այլ ինչ են, քան լիակատար յանձնւելու եւ ենթարկւելու պահանջ, այաթ. Խամենէին յայտարարել է, որ Իրանի ժողովուրդը վճռականօրէն դէմ է ԱՄՆ-ի՝ ենթարկւելու վիրաւորական պահանջին եւ շարունակելու է վճռական դիմադրութիւնը։
Իսլ. յեղափոխութեան առաջնորդը նշել է, որ թշնամիները, ռազմական պարտութիւններ կրելով, հասկացել են, որ Իրանին հնարաւոր չէ ենթարկեցնել պատերազմի միջոցով, եւ այժմ նպատակ ունեն թուլացնել երկիրը՝ պառակտում եւ տարաձայնութիւններ ստեղծելով. «Ժողովրդի, պաշտօնեաների եւ Զինւած ուժերի միջեւ անսասան համերաշխութեան պողպատէ վահանը չպէտք է խաթարւի»,- յստակեցրել է նա:
Այաթ. Խամենէին ընդգծել է, որ բոլորը, այդ թւում՝ մտաւորականներն ու մեդիայի ներկայացուցիչները, պէտք է պահպանեն պատերազմից յետոյ ձեւաւորւած միասնութիւնը եւ աջակցեն վարչակազմին:
