Լրագրողներին վիրաւորած ԱՄՆ յատուկ բանագնացը չեղարկել է իր այցը Լիբանանի հարաւ՝ բողոքի ցոյցերի ֆոնին

«ԱԼԻՔ» – ԱՄՆ Մերձաւոր Արեւելքի հարցերով յատուկ դեսպանորդ եւ Թուրքիայում ԱՄՆ դեսպան Թոմ Բարաքը չեղարկել է չորեքշաբթի օրը Լիբանանի հարաւ կատարելիք այցը՝ բողոքի ակցիաների կոչերի պատճառով: Այս մասին ըստ News.am-ի՝ հաղորդում է Ազգային լրատւական գործակալութիւնը (NNA):

Հաղորդւում է, որ Բարաքը ուղղաթիռով ժամանել է Մարջայունում գտնւող Ֆրանսուա ալ Հաջի զօրանոց, որտեղ տեղակայւած են եղել Լիբանանի բանակի ստորաբաժանումները, ինչպէս նաեւ Խիամի հիւսիսային մուտքի մօտ, որպէսզի ապահովւի նրա այցի անվտանգութիւնը, սակայն ուղեւորութիւնը դադարեցւել է նրա այցի դէմ բողոքի ցոյցերի կոչերի պատճառով։

Դա տեղի է ունեցել այն բանից յետոյ, երբ չորեքշաբթի վաղ առաւօտեան Իսրայէլի զինւած ուժերը պայթիւն են իրականացրել Լիբանանի հարաւային սահմանամերձ Քֆարքելա քաղաքում։ Ազգային լրատւական գործակալութիւնը յայտնել է, որ «առաւօտեան ժամը 4:30-ին ուժեղ պայթիւն է լսւել Քֆարքելա քաղաքում հակառակորդի կողմից իրականացւած պայթեցման արդիւնքում եւ դրա արձագանքները լսւել են Մարջայուն շրջանի քաղաքներում»։

Տեղական լրատւամիջոցները յայտնել են, որ Խիամի մի քանի բնակիչներ ցոյց են անցկացրել քաղաքի մուտքի մօտ, որի ընթացքում նրանք բարձրացրել են մարտերում զոհւած դիմադրութեան մարտիկների լուսանկարները՝ ի նշան ԱՄՆ դեսպանի այցի դէմ բողոքի։ Հաղորդւում է, որ ցուցարարները դատապարտել են «Իսրայէլի նկատմամբ ԱՄՆ-ի կողմնակալ քաղաքականութիւնը եւ Լիբանանի դէմ նրա ագրեսիային աջակցութիւնը»:

Յիշեցնենք, որ երեքշաբթի օրը բարձրաստիճան դիւանագէտը քննադատութեան է ենթարկւել Լիբանանի նախագահական պալատում կայացած մամուլի ասուլիսի ժամանակ լիբանանցի լրագրողներին արւած կոչից յետոյ, որի ժամանակ նա ասել էր «Մի՛ պահէք ձեզ անասունի նման»։ Թոմ Բերաքը այս յայտարարութիւնը արել է նախագահ Ջոզէֆ Աունի հետ հանդիպումից յետոյ։

«Խնդրում եմ մէկ րոպէ լռէք… Հէնց որ սա սկսի քաոսային դառնալ, ինչպէս կենդանիների մօտ, մենք կը հեռանանք»,- ասել է Բարաքը մամուլի ասուլիսի ժամանակ ամբիոնից։ «Այսինքն՝ դուք ուզում էք իմանալ, թէ ինչ է կատարւում։ Եղէք քաղաքակիրթ, բարի, հանդուրժող, որովհետեւ սա է տարածաշրջանում կատարւողի խնդիրը»։