Ֆրանսիան պաշտօնապէս ճանաչեց Պաղեստինի պետութիւնը

«ԱԼԻՔ» – Ֆրանսիայի նախագահ Էմմանուէլ Մակրոնը ՄԱԿ-ում յայտարարել է, որ Ֆրանսիան պաշտօնապէս ճանաչում է Պաղեստինի պետութիւնը՝ խաղաղութեան շահերից ելնելով: Հաղորդում է BBC-ն։

Մակրոնը յայտարարել է, որ ժամանակն է աւարտել պատերազմը Գազայում եւ ազատ արձակել ՀԱՄԱՍ-ի կողմից պահւող մնացած 48 պատանդներին։

«Մենք այլեւս չենք կարող սպասել»,- ասել է Ֆրանսիայի նախագահը։

Մակրոնն ընդգծել է հոկտեմբերի 7-ին Իսրայէլի վրայ յարձակումը դատապարտելու եւ տարածաշրջանում խաղաղութեան համար երկու պետութիւնների լուծում տեսնելու իր ցանկութիւնը։

«Ոչինչ չի արդարացնում շարունակւող պատերազմը»,- յայտարարել է Ֆրանսիայի նախագահը, յաւելելով, որ «ամէն ինչ մեզ պարտաւորեցնում է» վերջապէս դադարեցնել այն։