Զախարովա. «Վրաստանում տեղի ունեցած անկարգութիւնները հրահրւել են դրսից՝ Մայդանի սցենարով հանրապետութիւնը Արեւմուտքի կամքին ենթարկելու նպատակով»
«ԱԼԻՔ» – Վերջերս Վրաստանում տեղի ունեցած անկարգութիւնները հրահրւել են դրսից՝ Մայդանի սցենարով հանրապետութիւնը Արեւմուտքի կամքին ենթարկելու նպատակով։ Դրա մասին ճեպազրոյցի ժամանակ յայտարարել է Ռուսաստանի ԱԳՆ տեղեկատւութեան եւ մամուլի դեպարտամենտի տնօրէն Մարիա Զախարովան, հաղորդում է Tert.am-ը:
Դիւանագիտական առաքելութեան պաշտօնական ներկայացուցիչը յիշեցրել է, որ «արմատական ընդդիմութեան բռնի գործողութիւնները», որոնք ուղեկցւել են ջարդերով, համընկել են հոկտեմբերի 4-ին անցկացւած մունիցիպալ ընտրութիւնների հետ։ Արտասահմանեան դիտորդների, նրանց թւում՝ արեւմտեան երկրներից դիտորդների կարծիքով, դրանք «թափանցիկ եւ մրցակցային» էին։
«Արեւմտեան խաղացողների յայտնի խմբի կողմից Վրաստանի ներքին գործերին բացայայտ միջամտութիւնը լուրջ մտահոգութիւն է առաջացնում,- նշել է նա։ Ընդդիմութեան ներկայացուցիչները, որոնց աջակցում են ԵՄ-ն եւ Կիեւի ռեժիմը, կապւած են Վրաստանում բանտարկւած Ուկրաինայի քաղաքացի Միխաիլ Սաակաշւիլիի «Միացեալ ազգային շարժման» հետ, կիրառել են աշխարհի տարբեր մասերում ակտիւօրէն փորձարկւած բոլոր հին ձեւանմուշները եւ բացայայտօրէն կոչ են արել տապալել օրինական կառավարութիւնը»։
«Այս, ի վերջոյ, ձախողւած սադրանքի ակնյայտ նպատակն է Վրաստանում Մայդանի սցենար իրականացնել, այնտեղ հաստատել խամաճիկ կառավարութիւն, հանրապետութիւնն ամբողջութեամբ ենթարկել Արեւմուտքի կամքին, եւ այդ ամէնը Վրաստանը մեր երկրի դէմ օգտագործելու նոր արկածախնդրութիւնների եւ Ռուսաստանի հարաւային սահմաններում իրավիճակը անկայունացնելու նպատակով,- յայտարարել է դիւանագէտը: -Կարճ ասած՝ գաղափարը մէկն է՝ Վրաստանը դարձնել գործիք ուրիշների ձեռքում՝ աշխարհաքաղաքական դիմակայութեան մէջ օգտագործելու համար: Մինչդեռ, վրաց ժողովրդի հիմնարար շահերը գունաւոր յեղափոխութիւնների, Մայդանների եւ յեղաշրջումների այս փորձերի հետեւում կանգնածները լիովին ցինիկօրէն եւ անտարբերօրէն անտեսում են»:
«Մենք վերահաստատում ենք մեր հետեւողական հաւատարմութիւնը Հարաւային Կովկասի բոլոր երկրների հետ խաղաղ, հաւասար եւ փոխշահաւէտ յարաբերութիւններին եւ դէմ ենք տարածաշրջանի՝ սուր դիմակայութեան եւս մէկ ասպարէզ դառնալուն,- եզրափակել է Զախարովան՝ արտայայտելով Ռուսաստանի պաշտօնական դիրքորոշումը: Միանգամայն ակնյայտ է, որ միայն իրենց սեփական օպորտունիստական նպատակները հետապնդող վերոնշեալ արտատարածաշրջանային ուժերը, որոնց կործանարար բնոյթն այս օրերին կրկին ցուցադրւել է աշխարհի այս տարածաշրջանում, ընդունակ են օգտւել նման բացասական սցենարից»:
