Ատրպատականի հայոց թեմի առաջնորդը Իքի Աղաջ գիւղի Ս. Սարգիս եկեղեցում

Ատրպատական, ազգային առաջնորդարան, Թաւրիզ – Կիրակի, 23 նոյեմբերի 2025-ի երեկոյեան ժամը 4:00-ին, առաջնորդ Սրբազանը յատուկ այցելութիւն տւեց Ուրմիայի Իքի Աղաջ գիւղի դարաւոր Ս. Սարգիս եկեղեղեցին:

Սրբազան Հօրը ընկերակցում էին Պատգամաւորական ժողովի դիւանի անդամ Սարինէ Մեջլումեանը, Ուրմիայի Գործակալական խորհրդի ատենապետ՝ Վանիկ Յակոբեանսը, ասորական համայնքի անդամ Զայան, Իրանի Եկեղեցիների հնապահպանման կառոյցի պատասխանատու՝ Ալէն Գրիգորեանը, ինչպէս նաեւ Տիրամայր Շուշանը:

Այցելութիւնը իրականացւեց, յատկապէս հետեւելու այնտեղ կատարւած շինարարական եւ բարեզարդման աշխատանքներին:

Նշենք, որ շուրջ 15 տարիներ առաջ, Թեմիս առաջնորդը այցելել եւ տեղագրել էր եկեղեցու եւ գիւղի պատմութիւնը «Ուղեւորութիւն Ատրպատականի հայոց թեմում» եռահատոր շարքի Ա. հատորում: Սոյն այցով վերաքննութեան ենթարկեց նա եկեղեցու վերանորոգման աշխատանքները, իր գնահատանքը յայտնելով տարւած բծախնդիր աշխատանքի համար:

Եկեղեցու խորանի առջեւ կատարւեց Կանոնական աղօթք, որի աւարտին Սրբազանը մօտկից հետեւեց շինարարութեան գծով տրւած բացատրականներին:

Եկեղեցուց դուրս գալու պահին, իր ընկերակիցների աղօթական ներկայութեամբ, Սրբազան հայրը յատուկ «Հոգւոց» ասաց այնտեղ թաղւած երկու հոգեւորականների շիրիմների առջեւ՝ Տ. Աւագ քհնյ. Պօղոսեանի եւ Տ. Օհաննէս քհնյ. Բաբայեանի: Սրբազան Հայրը իր հատորում այս մասին անդրադարձել է, յատկապէս յիշելով, թէ ինչպէս հայ յեղափոխական գործիչ Գալուստ Ալոյեանը 1895 թւին այցելել է  գիւղը,  իր  սպիտակ ձիի քամակին նստած, եւ իր ձեռքի մտրակով փաղաքշական, դաստիարակիչ հարւածներ է հասցրել այն գիւղացիներին, որոնք իրենց զաւակներին չէին ուղարկում դպրոց, կրթութիւնից զրկելով նրանց, եւ չհաւատալով որ այգու աշխատանքից բացի, դպրոցական ուսումը անհրաժեշտութիւն է նրանց ապագայ կեանքի համար…:

Նշենք, որ սոյն այցելութեան մասնակիցներից մէկը ցոյց տւեց նաեւ մի հին լուսանկար, Իքի Աղաջ գիւղում աւելի քան 80 տարիներ առաջ տեղի ունեցած եկեղեցական արարողութիւնից, որտեղ երեւում են գիւղի քահանաները, եւ նրանց շուրջը համախմբւած գիւղացի ժողովուրդը:

Այս մասին խօսելով ներկաներին, Սրբազան Հայրը պատմական վայրերի այցելութիւնը, հոգեպէս վերանորոգման առիթ համարեց, օրհնելով յիշատակը բոլոր անցածների: