Լեւոն Զուրաբեան. «Գերագոյն գլխաւոր տգէտը չգիտի անգամ, որ Հայ Առաքելական Եկեղեցին հիմնադրել են Թադէոս եւ Բարդուղիմէոս առաքեալները, եւ ոչ թէ Հայոց պետութիւնը՝ 301 թւականին»

«ԱԼԻՔ» – «Փաշինեանի հաւատադաւ արշաւանքը Գիւմրիում է՛լ աւելի խորացրեց մեր հանրութեան մէջ այն գիտակցումը, որ Հայաստանի այսօրւայ վարչապետը ուր գնում է՝ ցանում է պառակտութիւն, անհաւատութիւն, գժտութիւն, անօրէնութիւն եւ պղծութիւն»: Այս մասին ֆէյսբուքեան իր էջում գրել է ՀԱԿ փոխնախագահ Լեւոն Զուրաբեանը:

«Սահմանադրութիւնը, մեր օրէնքները եւ, գլխաւորապէս՝ Քրէական օրէնսգրքի 441 յօդւածը (Պաշտօնատար անձի կողմից իշխանական կամ ծառայողական լիազօրութիւնները կամ դրանցով պայմանաւորւած ազդեցութիւնը չարաշահելը կամ լիազօրութիւններն անցնելը) կոպտօրէն խախտող վարչապետը չի էլ նկատում, որ իր իշխանութիւնն աստիճանաբար ձեռք է բերում օկուպացիոն ռեժիմի կերպարանք:

Յատուկ ջոկատայիններով գրաւելով Սուրբ Եօթ Վէրք եկեղեցին, նա վերածել է իր մասնակցութեամբ քաղաքական շոուները ոստիկանական գործողութիւնների: Իր պառակտիչ եւ բաժանարար այլանդակութիւնների իրագործման համար նա յենւում է Եկեղեցու ամենավարկաբեկւած, բարոյազուրկ ե՛ւ նիւթապաշտ ե՛ւ պատեհապաշտ լիւմպենական տարրերի վրայ, որոնց կառավարում է քրէական հետապնդման սպառնալիքների եւ պաշտօններով կաշառման լծակներով:

Այսօրւայ (դեկտեմբերի 7-ԽՄԲ.) իր պարտութիւնը հէնց դրա մէջ էր. նիկոլական կեղծ «պատարագը» աւելի նմանւում էր օտարածին ատելի իշխանութեան կողմից ժողովրդի նկատմամբ կատարւող բռաճնշմանը, քան դեկտեմբերի 7-ի երկրաշարժի զոհերի յիշատակին նւիրւած պատարագի:

Այս ձախողումները, սակայն, միայն աւելի են սրում մեր նորօրեայ բռնապետացու մոլագարի ախորժակները: Ստորեւ կցւած գրառումը ցոյց է տալիս, որ գերագոյն գլխաւոր տգէտը չգիտի անգամ, որ Հայ Առաքելական Եկեղեցին հիմնադրել են Թադէոս եւ Բարդուղիմէոս առաքեալները, եւ ոչ թէ Հայոց պետութիւնը՝ 301 թւականին, տեղեակ չի (կամ իրեն կատարեալ հիմարի տեղ է դրել), որ ամբողջ աշխարհում պետութեան եւ դաւանանքների սահմանները չեն համընկնում, որովհետեւ չեն կարող ամբողջութեամբ համընկնել պետական իշխանութեան եւ հոգեւոր իշխանութեան տիրոյթները:

Հայոց աշխարհի գերագոյն գլխաւոր հերձւածողն ու պառակտիչը պէտք է հեռացւի, եթէ մենք ցանկանում ենք շարունակել գոյութիւն ունենալ որպէս պետականօրէն կազմակերպւած ազգ»,- գրել է նա։