Արցախեան քաղհասարակութեան ներկայացուցիչները՝ Գարեգին Բ-ին. «Խնդրում ենք քննարկել Արցախի թեմի առաջնորդին փոխելու հարցը»
«ԱԼԻՔ» – «Խորը հիասթափւած ենք Վրթանէս եպիսկոպոս Աբրահամեանի վերջին քայլերի եւ հրապարակային պահւածքի վերաբերեալ»: Այս մասին ըստ հայաստանեան ԶԼՄ-ների՝ ասւած է Ամենայն Հայոց Կաթողիկոսին ուղղւած Արցախի քաղհասարակութեան ներկայացուցիչների նամակի մէջ:
Նամակում մասնաւորապէս նշւած է.
«Արցախեան քաղհասարակութեան ներկայացուցիչների նամակը՝ ուղղւած
Ն.Ս.Օ.Տ.Տ. Գարեգին Բ Ամենայն Հայոց Կաթողիկոսին
Վեհափառ Տէր,
Արցախցիներս ակամայից կանգնած ենք ցաւալի իրողութեան առաջ՝ դիմել Ձերդ Սրբութեանը՝ յայտնելով մեր խորը հիասթափութիւնն ու զայրոյթը ՀԱՍԵ Արցախի թեմի ներկայիս առաջնորդ Վրթանէս եպիսկոպոս Աբրահամեանի վերջին քայլերի եւ հրապարակային պահւածքի վերաբերեալ։
Խիստ մտահոգիչ եւ անասելի վիրաւորական էր բոլորիս համար տեսնել, թէ ինչպէս է Վրթանէս եպիսկոպոս Աբրահամեանը, խախտելով մեր Սուրբ Եկեղեցու օրէնքները, փաստացի ըմբոստացել ազգընտիր եւ օծեալ Ամենայն Հայոց Հայրապետի դէմ, ով մշտապէս իր անքակտելի ուշադրութեան կենտրոնում է պահել ու պահում Արցախ աշխարհի եւ արցախահայութեան խնդիրները՝ հանդէս գալով մեր իրաւունքների պաշտպանութեան կարեւորագոյն նախաձեռնութիւններով, այդ թւում՝ միջազգային բարձր հարթակներում։
Մեզ համար անընդունելի է նաեւ այն, որ Վրթանէս եպիսկոպոս Աբրահամեանը, ով կոչւած է պաշտպանելու իրեն յանձնւած սրբութիւններն ու հաւատաւոր ժողովրդին, այդ կոչմանը հակընդդէմ գործողութիւններ է կատարում։ Նա, մասնաւորապէս, յարգանքի ու պատւի է արժանացնում Արցախն իր վանքերով, եկեղեցիներով, խաչքարերով, գերեզմաններով ու սրբավայրերով թշնամուն յանձնելու քաղաքական որոշման թիւ մէկ պատասխանատուին՝ փաստացիօրէն միանալով վերջինիս հակաեկեղեցական սրբապիղծ արշաւին։
Նման քայլը թէ՛ իր բովանդակութեամբ, թէ՛ իրականացման ձեւով մեր բոլորի կողմից ընկալւեց ոչ միայն խոնարհում Նիկոլ Փաշինեանի առջեւ, այլ նաեւ վերջինիս քայլերի ուղղակի արդարացում, ինչն, իհարկէ, առաջացրեց Արցախի մեր ժողովրդի արդարացի զայրոյթն ու վստահութեան կորուստը տւեալ հոգեւոր առաջնորդի նկատմամբ։
Առանձնապէս ցաւալի է, որ մեր հաւատաւոր ժողովրդի բազում դիմումներին ի պատասխան՝ նա մինչ օրս ոչ միայն չի զղջացել եւ ներողութիւն չի յայտնել արցախահայութեանը, այլ նոյնիսկ խուսափում է սեփական հայրենակիցների ու հաւատաւոր հօտի հետ հանդիպումներից, չի պատասխանում հեռախօսազանգերին, ցուցաբերում է բացայայտ անյարգալից վերաբերմունք իրեն յանձնւած համայնքի նկատմամբ։
Վերոգրեալի հիման վրայ խնդրում ենք քննարկել Արցախի թեմի առաջնորդին փոխելու հարցը, քանզի ներկայիս առաջնորդը լիովին կորցրել է Արցախի հաւատացեալ ժողովրդի վստահութիւնը, եւ իր իսկ բռնած ճանապարհի պատճառով այլեւս չունի որեւէ բարոյական հիմք՝ շարունակելու առաջնորդել դաւաճանւած Արցախի հայոց թեմը։
Խնդրում ենք Ձերդ Սրբութեանն ընդառաջ գալ Արցախի Ձեր հոգեւոր զաւակների խնդրանքին եւ մեր ձայնը լսել որպէս հաւատաւոր ժողովրդի իրական զգացմունքների արտայայտութիւն։
Որդիական խոնարհութեամբ մատչիմք ի համբոյր Ձերդ Սրբութեան Օծեալ Սուրբ Աջոյն`
Ռոման Երիցեան
իրաւապաշտպան, փաստաբան»:
Նշենք, որ նամակին միացել են Արցախի 20 հասարակական կազմակերպութիւններ եւ 4 անհատ-գործիչներ:
