«Ակունք» պարախմբի 40-ամեակի եւ «Տաթեւ»-ի 13-ամեակի միացեալ ելոյթը Թաւրիզում

Ատրպատական, ազգային առաջնորդարան, Թաւրիզ – Հինգշաբթի, նոյեմբերի 5-ի երեկոյեան ժամը 7:00-ին, նախագահութեամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի, Թեհրանի «Ակունք» եւ Թաւրիզի «Տաթեւ» պարախմբերի միացեալ ելոյթը տեղի ունեցաւ Ազգային առաջնորդարանի «Համազասպ Ոսկանեան» հանդիսասրահում, ղեկավարութեամբ պարարւեստի վաստակաշատ գործիչ, գեղարւեստական ղեկավար-բեմադրիչ՝ Կարինէ Մանուչերեանի:

Ներկայ էին ելոյթի հովանաւոր Թեմական խորհրդի անդամները, գլխաւորութեամբ ատենապետ Գագիկ Ջորջեանի, Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր դկտր. Արա Շահվերդեանը, Ազզային իշխանութեան անդամները, ՀՕՄ-ի վարչութիւնը, Կազմակերպութիւնների եւ Միութիւնների վարչական կազմերը, ելոյթ ունեցող երիտասարդութեան քաջալերող ծնողները, ինչպէս նաեւ մշակութասէր թաւրիզահայութիւնը:

Պաշտօնական հանդիսութեան խանդավառ սրահում, իր բացման խօսքով ներկաներին ողջունեց ելոյթի կազմակերպիչ յանձնախմբի ատենապետուհի՝ Նայիրի Դիլանեանը: Շնորհակալական խօսքերի կողքին, Նայիրի Դիլանեանը հայ մշակոյթի գործիչ, եւ տասնամեակների վրայ փառաւոր առաքելութիւն իրականացրած Կարինէ Մանուչերեանի նւիրմանը անդրադարձաւ: Թեհրանից բացի, մշակութային միեւնոյն առաքելութիւնը Թաւրիզում եւս, մէկ տասնամեակից աւելի ծաւալած Կարինէի աշխատանքը, նւիրումի բարձր դիրքում ներկայացրեց նա, յիշելով, որ Թաւրիզում «Ակունք»-ի առաջին ելոյթը, քսան տարիներ առաջ էր տեղի ունեցել, 2006 թւին. «Այդ թւականից Կարինէ Մանուչերեանը Թաւրիզում սիրւեց, պահանջւեց առ այսօր: Իր հիմնադրած պարախումբը ոչ միայն իր ջանքի արդիւնքն է, այլ նաեւ արդէն 13 տարիներ առաջ, իր հիմնած «Տաթեւ» պարախումբը Թաւրիզում, որը ինքն է գլխաւորում: Պատիւն ունենք մեր պատանիներին ու պարմանուհիներին ղեկավար ունենալու մի անզուգական անձնաւորութիւն, որ իր ամբողջ հոգով հայկական է: Նա աշակերտել է Վանուշ Խանամիրեանին, գործակցել է հայկական աւանդական պարերի մեծ վարպետ Գագիկ Գինոսեանին, որի հիմնադրած «Կարին» պարային համոյթին էլ անդամ է, ինչպէս նաեւ ՀՀ պարարւեստի Միութեանը: Նա ուսանել է եւ ստացել բեմադրիչի յատուկ մասնագիտութիւն, արժանանալով դոկտորական աստիճանի», ասաց նա: Ներկաները իրենց ծափողջոյններով արտայայտեցին ջերմ գնահատանք, ամրապնդնելով Կարինէ Մանուչերեանի անխորտակելի կամքը եւ ազգանւէր ծառայութիւնը:

Նայիրի Դիլանեանը երախտագիտական յատուկ խօսքով, սոյն ելոյթի հովանաւոր Սրբազան հօրը եւ Ազգային իշխանութեան Պատգամաւորական ժողովին ու Թեմական խորհրդին շնորհակալութիւն յայտնեց, նրանց մնայուն հոգածութեան եւ քաջալերանքին համար, ՀՕՄ-ի եւ ազգային բոլոր կառոյցների գործունէութեանց նկատմամբ: Նա շնորհակալութեան յատուկ խօսքում յիշեց նաեւ գեղարւեստական ղեկավարի ամուսնուն՝ Արա Սուքիասեանին, որ «Տաթեւ» պարային համոյթի կազմակերպչական փորձերի համար, ընդունեց իր կնոջ ճամբորդական բոլոր ծախսերի հովանաւորութիւնը ստանձնել, ինչպէս նաեւ իր զաւակների Արենի եւ Ալինի մասնակցութիւնը՝ իրենց մօր պարային արւեստին:

Շնորհակալութեան խօսքում Նայիրի Դիլանեանը յիշեց նաեւ դկտր. Արա Շահվերդեանի, ՀՕՄ-ի Թաւրիզի վարչութեանը, Թաւրիզի Հայ Համալսարանականների միութեան վարչութեանը, «Հ. Ոսկանեան» սրահի տնօրէնութեանը՝ Դաւթեան ընտանիքին, պաստառի պատրաստութիւնը իրականացրած Անդրու Մկրտչեանին, ձայնային հաղորդավար Սեւադա Սաֆարեանին, «Տաթեւ»-ի օժանդակող ծնողներին՝ Վարդուհի Մկրտչեանին, Գոհար Շահմուրադեանին, Ռուզան Անտոնեանին, Մարինա Վարդանեանին, Կարինէ Գրիգորեանին, Թալին Մկրտչեանին եւ Մարինա Անտոնեանին, ինչպէս նաեւ ընդհանուր պատասխանատւութիւն ստանձնած Արմոնդ Բադալեանին եւ Սեւան Գասպարեանին, եւ Անի Դիլանեանին, ծրագրի գործադրութեանը համար. իսկ գնահատանքի եւ շնորհակալութեան յատուկ խօսք արտասանեց նա, Թաւրիզում երկու փորձավարներին՝ Մարիա Գասպարեանին եւ Սեպուհ Անտոնեանին, եւ բարերարուհի՝ Էլպիս Գասպարեան-Արզումանեանին:

Հանդիսասրահի վարագոյրի բացման պահին, հանդիսականներին հմայեց պարերի յանկարծական կատարումը, ներքին աշխուժութեամբ, եւ հայկական ու այլ ազգերի յատուկ պարարւեստի տեսականիով: Վաղուց արդէն զգացւած կարօտի թաւրիզեցիների մօտ, վերարթնացրեց մտային խանդավառութիւնը:

Այնուհետեւ, երկու պարախմբերը երբեմն միացեալ, եւ երբեմն առանձին ելոյթներով ներկայացրին տարբեր պարեր: «Տաթեւ» պարախմբի հինգ մանուկների ներկայացրած պարերը մեծապէս ուրախացրին համայնքի զաւակներին, որոնք նրանց մէջ տեսան Թեմի փայլուն ապագան:

Արդիական պարարւեստի մատուցումները «Ակունք» պարախմբի վարպետ անդամ-անդամուհիների կողմից, արտայայտեց իր ապագայ յաջողութիւնները, մեծ մրցութիւններում…: Մարմնական ճկունութիւնը, ձգողական ոյժը, որոնք լայնածաւալ փորձերի եւ մարմնամարզութեան արդիւնք են, հմայեցին թաւրիզահայութեանը, որը վաղուց նման տղայ եւ աղջիկ տիտանների չէր հանդիպել իր քաղաքի հնադարեայ բեմում:

Շքեղ եւ երկարաշունչ ելոյթի աւարտին, Թեմական խորհրդի անունից եւ առաջնորդ Սրբազան հօր ձեռամբ թաւրիզեան արծաթը գեղակերտ մի աշխատանքով քանդակւած օրինակով, առ ի գնահատանք իր քառասնամեայ ծառայութեանը, պատւով յանձնւեց բազմավաստակ Կարինէ Մանուչերեանին: Սրբազան հայրը այս առիթով իր հրատարակած գրքերից եւս յանձնեց պարուսոյցին, իսկ ՀՕՄ-ի վարչութիւնը նրան գնահատեց ոսկեայ դրամանիշերով: Պարախմբի անունից, ղեկավարը «Ակունք» անւան զարդանախշը նւիրեց Սրբազան հօրը, Պատգամաւորին, Տէր հօրը, Պատգամաւորականի ատենապետուհուն եւ Թեմականի ներկայացուցչին, եւ ՀՕՄ-ի ատենապետին, ու օրւայ բոլոր աշխատակիցներին:

Պարարւեստի հանդիսութեան եզրափակիչ, ու օրհնութեան խօսքը ուղղեց առաջնորդ Սրբազանը: Նա օրւայ ներկայացւած ելոյթը պատմական համարեց, որովհետեւ «Ակունք»-ի հիմնադրութեան քառասունամեակի ելոյթների բացումը՝ Թաւրիզում տեղի ունեցաւ, «Տաթեւ» պարախմբի հետ միասին, հմայելով թաւրիզահայութեանը:

Առաջնորդ Սրբազանը իր խօսքի ընթացքին, օրինակը վերցնելով բեմում պարող հայորդիների պարային համաչափ կշռոյթից, ցանկանալով այն տեսնել իբրեւ միասնականութիւնը մեր ժողովրդի: Ցաւով յիշեց, որ մայր հայրենիքում, խորհրդարանի դահլիճում անցնող շաբաթ տեղի ունեցած կռիւն ու անկարգութիւնը, հայկականութիւնից հեռու են, այլ ցեղերի են պատկանում. «իսկական հայութիւնը, մեր ժողովրդի փոխադարձ սէրն ու համագործակցութիւնը, այսօր մեր երիտասարդութիւնը ցուցադրեց բեմում, համակարգւած շարժումներով»,- շեշտեց Սրբազանը: Նա իր բարձր գնահատանքը յայտնեց գեղարւեստական ղեկավար Կարինէ Մանուչերեանի եւ Նայիրի Դիլանեանի կատարած անշահաբեր, բայց հայ մշակոյթի գոյատեւմանը նպաստող աշխատանքի համար: Գնահատական խօսքեր արտասանւեցին նաեւ բոլոր ծառայողներին, ծնողներին ու Միութիւններին, իրենց անշահախնդիր մասնակցութեան համար:

Խմբային յիշատակի լուսանկարով երեկոյթը փակւեց, քաղցր յուշերի արձանագրութեամբ, եւ «Ակունք» պարախմբի կողմից բոլոր մասնակիցների բաշխւած յուշանւէրով:

Ելոյթից յետոյ, զոյգ պարախմբերը հիւրասիրւեցին ընթրիքով, որի միացաւ նաեւ պատգամաւոր դկտր. Շահվերդեանը, մինչեւ Թաւրիզից իր մեկնումի ժամը: Դկտր. Արան քաջալերական խօսքերով շնորհաւորեց մասնակիցներին, իրենց պարարւեստով ցուցաբերած բացառիկ ելոյթի առիթով: Նա գնահատեց գեղարւեստական ղեկավար Կարինէ Մանուչերեանի նւիրումն, ու երեք պարախմբերի գծով տարած աշխատանքը, Թեհրանում եւ Թաւրիզում: Նորանոր յաջողութիւնների մաղթանքով, նա շնորհաւորեց բոլոր մասնակիցներին, նոր ելոյթների դարձեալ ներկայ գտնւելու փափագով: