«ԱԼԻՔ», Կ. Դ. – Հ. Մ. Մ. «Նայիրի» միութեան 20-րդ Պատգամաւորական ժողովը իր աշխատանքը սկսեց նոյեմբերի 20-ին միութեան «Սուքերեան» սրահում:
Ժողովի բացումը կատարեց շրջանաւարտ վարչութեան նախագահ Սերոժ Օհանեանը, որից յետոյ ժողովը դիտեց վարչութեան երկամեայ աշխատանքների մասին պատրասւած տարբեր միաւորների, բաժանմունքների ու յանձնախմբերի աշխատանքները: Ապա ընտրւեց ժամանակաւոր դիւանը եւ պատգամաւորների մանդատները ստուգւելուց յետոյ ընտրւեց ժողովի մնայուն դիւանը՝ Ֆրէդ Աշուղեան նախագահ, Ռուբինա Օհանեան եւ Մերի Նազարեան քարտուղարներ: Ժողովի օրակարգը հաստատւելուց, հրաւիրեալների ցանկերը ճշտւելուց եւ բանաձեւային յանձնախումբը ընտրւելուց յետոյ ժողովը ունկնդրեց շրջանաւարտ վարչութեան քարտուղար Շաքէ Իսկանդարեանի կողմից ընթերցւող վարչութեան երկամեայ՝ 2023-2025 թւականների գործունէութեան բարոյական զեկոյցը, որի ընթացքում մանրամասնօրէն անդրադարձ էր կատարւել միութեան յարկի տակ գործող՝ Երէց, Արւեստից, Մարզական, Սկաուտական բաժանմունքների, Հայդուկների միաւորի, Գրական խմբի եւ լոտոյի, հանդէս ձեռնարկ եւ պարախմբի յանձնախմբերի գործունէութեանը եւ վարչութեան ու բոլոր բաժինների նախաձեռնած ներհամայնքային ու արտաքին միջոցառումներին, որոնց թիւը գերազանցում էր 150-ը:
Ապա պատգամաւորներին առիթ տրւեց հարցումների եւ շտկումների, որից յետոյ ժողովը ունկնդրեց շրջանաւարտ վարչութեան նիւթականի պատասխանատու Արբի Բոնիադեանի ներկայացրեց մանրակրկիտ նիւթականի զեկոյցը:
Ժողովին ներկայ էին՝ Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը եւ «ԱԼԻՔ» հաստատութեան ներկայացուցիչ Ալեքս Կարապետեանը:
Ժողովը շարունակւեց նաեւ ուրբաթ, նոյեմբերի 21-ին միութեան նորընտիր վարչութիւնը ընտրելու համար:
