Հա

Օրակարգ

14/04/2020 - 14:50

Կորոնան եւ իրանահայ համայնքը... (2)

Եւ այսպէս, ահա, համաշխարհային ընտանիքի հետ բազմադարեայ Իրանն ու նրա անբաժան մասնիկ հինաւուրց իրանահայութիւնը եւս 2020 թ.-ի տարեմուտին դէմ-յանդիման կանգնեց նոր ու ինչ որ տեղ առեղծւածային համաճարակ՝ «կորոնավիրուսին»…:

Դ. Մ.

 

Եւ այսպէս, ահա, համաշխարհային ընտանիքի հետ բազմադարեայ Իրանն ու նրա անբաժան մասնիկ հինաւուրց իրանահայութիւնը եւս 2020 թ.-ի տարեմուտին դէմ-յանդիման կանգնեց նոր ու ինչ որ տեղ առեղծւածային համաճարակ՝ «կորոնավիրուսին»…:

Յարգելի ընթերցողները վստահաբար յիշում են՝ սկզբնական օրերին կորոնայի անճանաչելիութիւնից բխող՝ թէ՛ իշխանութիւնների, եւ թէ՛ հասարակայնութեան կողմից վարակի նկատմամբ այսպէս
ասած՝ արհամարհական վերաբերմունքը, երբ ամենուր յայտարարւում էր թէ՝ ընդամենը 1-2 վարակակիրներ են յայտնաբերւել Ղոմ քաղաքում… Դա՝ սկզբում, բայց հետագայ օրերին հասարակական ինչպէս պաշտօնական, այնպէս էլ համացանցային տեղեկացւածութիւնը անխուսափելիօրէն ուղեկցւեց մտահոգութիւններով ու նախնական խուճապային իրավիճակներով…, որոնք քայլ առ քայլ յաղթահարւեցին մարդկային ու հասարակական զգօնութեամբ, զգաստութեամբ ու աչալրջութեամբ:

Մինչ այս փուլը, ահա, երկամսեայ այսպէս ասած ճգնաժամային-կարանտինային իրավիճակում համաշխարհային պանդեմիային զուգընթաց Իրանն ու իրանահայութիւնը եւս չէին կարող խուսափել համապատասխան ծանրակշիռ գնի վճարումից՝ մարդկային կեանքերի կորուստներից:

Մասնաւորապէս մեզ՝ իրանահայերիս համար զգաստութեան հանգամանքները, թէեւ տեղ-տեղ դանդաղ ու անինքնավստահ, բայց այնուամենայնիւ գնալով կազմակերպ կերպարանք ստացան: Կորոնական փորձանքին անխուսափելիօրէն յաջորդեց փորձառութեան ձեռքբերման հանգամանքը, թէ՛ անհատ-ընտանիք-հասարակական խաւերում, եւ թէ՛ կենտրոնացւած ձեւաչափով՝ համայնքիս եռեակ թեմերում աշխատող ազգային կառոյցների կողմից, սահմանափակ հնարաւորութիւններով հանդերձ: Սրա կողքին, ակնբախ էին թէ՛ գործող, եւ թէ՛ նորընտիր պատգամաւորների ժողովրդանպաստ նեցուկն ու օժանդակութիւնները, որոնք արտայայտւել են նաեւ համայնքի բարեսիրական ու խնամակալ միաւորների կողմից, թէ՛ նիւթական, եւ թէ՛ բարոյական աջակցութիւնների տեսքով: Ընթացքում, սակայն, խանգարիչ հանգամանք էր լիարժէք լրատւութեան բացակայութիւնը՝ պայմանաւորւած թէ՛ Նոռուզեան արձակուրդներով եւ թէ՛ համավարակի բերումով՝ երկրում խոշոր տոկոսի տպագրական եւ հրատարակչային աշխատավայրերի փակմամբ: Հետեւաբար հասարակայնութեան ուշադրութիւնը աւելիով սեւեռւեց «վաթսափային» ինչ-որ տեղ ընկալելի լրատւութիւններին ու ոչ միշտ հաւաստի հաղորդագրութիւններին: Ահաւասիկ, զարմանալ հարկաւոր չէր համայնքում շրջանառւող ասէկոսային ու խուճապայարոյց, բայց շատ արագ հերքւող լուրերի առկայութեամբ:

Սիրելի ընթերցող, անցնող երկու ամիսները, ինչպէս ողջ աշխարհում ու ողջ Իրանում, մեր համայնքն եւս դիմագրաւման դժւարին կացութեան ու պայմանների ենթարկւեց, ի տես հրէշաւոր համավարակի: Հաստատապէս աշխարհին տեղում գամած ու շատ առումներով անդամալուծած փորձութիւնը արմատապէս յաղթահարելի է լինելու, եթէ նոր ու հաւաքական փորձառութիւնները միասնական ու համընդհանուր կամքի արտայայտման գործօն հանդիսանան, յատկապէս ապագայի հաշւին չնախատեսւող ճգնաժամ-տագնապային իրավիճակներից նւազագոյն վնասով դուրս գալու համար:

Կորոնան շուտ կամ ուշ անխուսափելիօրէն պատմութեան գիրկն է անցնելու: Կարեւորը, մնայունը եւ անփոխարինելին դա՝ միասնական կեցւածքի, միասնական գործի ու միասնակամութեան վարքագծի ձեւաւորումն ու կենսագործումն է՝ տւեալ դէպքում մեր հինաւուրց համայնքի անվտանգութեան եւ ընդհանրապէս՝ մեր ազգային ու համահայկական նպատակների իրականացման սիրոյն…:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։