Հա

Օրակարգ

03/02/2021 - 13:45

Սինանեանի «իրականութիւնը» եւ հանրային տրամադրութեան շրջադարձային փոփոխութիւնը

Սփիւռքեան իրականութեան հետ հաշւի չնստող, ի սկզբանէ ՀՀ գործող իշխանութիւնների օրակարգն առաջ քաշելու եւ համապատասխան քաղաքական նպատակներն իրականացնելու անշնորհակալ եւ ազգակործան գործին լծւած այս պաշտօնեային անհրաժե՞շտ է արդեօք յիշեցնել, թէ ընդհանրապէս ինչ նպատակների իրագործման է կոչւած իր ղեկավարած կառոյցը:

ԱՐԱՄ ՇԱՀՆԱԶԱՐԵԱՆ

 

Ինչպէս ընդունւած է ասել ժամանակը դարմանում է ամէն ինչ: Ցաւը ժա­մանակի մէջ բթանում է, իրավիճակը՝ հանգուցալուծւում:

Թւում է, թէ այս սկզբունքով են առաջնորդւում ՀՀ գործող իշխանութիւնների ամենատարբեր տրամաչափի եւ նշանակութեան ներկայացուցիչները, որոնք խայտառակ պարտութիւնից եւ նւաստացուցիչ կապիտուլիացիայից երեք ամիս անց փորձում են տպաւորութիւն ստեղծել, թէ ոչինչ էլ չի եղել եւ կեանքն ընթանում է իր բնականոն հունով:

Դեռ աւելին. նոյեմբերի 9-ին յաջորդած օրերին ջրի յատակն իջած, ասպարէզից անհետացած, հասարակութիւնից խուսափող ու լալկւած իշխանաւորները, որոնք լաւագոյն դէպքում փորձում էին արդարանալ կատարւածի համար, կարծես, թէ վերականգնել են կորցրած համարձակութիւնը, հիմա արդէն հարցազրոյցներ են տալիս, յայտարարութիւններ են տարածում, եւ յոխորտալից տոնով մեղադրական ճառեր են ասում:

Այդ իշխանաւորներից մէկն էլ սեփական աշխատակազմն արտասահմանեան գործակալական ցանցի ներկայացուցիչներով համալրած, Հայաստանն այլազգիների հայրենիքը դարձնելու «դարակազմիկ» տեսութեան հեղինակ, Սփիւռքի հարցերով գլխաւոր յանձնակատար Զարեհ Սինանեանն է, որը չգիտես ինչու ասպարէզից անհետացել էր 44-օրեայ պատերազմի օրերին, երբ իր գրասենեակը տրամաբանօրէն պէտք է, որ համակարգեր Հայաստանի եւ Արցախի աջակցութեանն ուղղւած Սփիւռքի քաղաքական-քարոզչական գործունէութիւնն ու նիւթատեխնիկական օժանդակութիւնների հոսքը:

Յիշեալ պաշտօնեան օրերս եթերում «խրոխտ» կեցւածք ընդունելով, զգուշացրել է ժողովրդի դէմ այսպէս կոչւած ռեւանշի մասին, եւ, ուշադրութիւն, բոլորին «լրջանալու» կոչ է արել:

Սինանեանը եթերում բացայայտել է Սփիւռքում գործող կառոյցներն ու կազմակերպութիւնները պառակտելու եւ կազմաքանդելու, կապիտուլեանտ եւ դաւաճանական իշխանութիւնների հետ համագործակցելու պատրաստակամ նոր կառոյցներ ձեւաւորելու՝ ՀՀ գործող իշխանութիւնների ծրագրերը:

Սփիւռքեան իրականութեան հետ հաշւի չնստող, ի սկզբանէ ՀՀ գործող իշխանութիւնների օրակարգն առաջ քաշելու եւ համապատասխան քաղաքական նպատակներն իրականացնելու անշնորհակալ եւ ազգակործան գործին լծւած այս պաշտօնեային անհրաժե՞շտ է արդեօք յիշեցնել, թէ ընդհանրապէս ինչ նպատակների իրագործման է կոչւած իր ղեկավարած կառոյցը:

Զարեհ Սինանեանին անհրաժե՞շտ է արդեօք յիշեցնել, որ պաշտօնն ստանձնելու առաջին իսկ օրից ի վեր, իր ղեկավարած կառոյցի անգործութեան, չհաշւարկւած եւ անհամաչափ քայլերի, անիմաստ, բովանդակազուրկ ու ձեւական բնոյթի նախաձեռնութիւնների արդիւնքում ինչպէս է տապալւել ռազմավարական առանցքային նշանակութիւն ունեցող՝ Սփիւռքի հայութեան համախմբման, պատմական Հայրենիքի եւ Արցախի հետ նրանց կապերի ամրապնդման գործը:

Պատասխանը, կարծում ենք, մէկն է եւ միանշանակ. ո՛չ:

Սոյն անձին, անհրաժեշտ է սակայն յիշեցնել, որ պատերազմի աւարտից ի վեր, ողջ հայութեան ստւար մի զանգւածի մօտ ՀՀ գործող իշխանութիւնների նկատմամբ անվստահութեան մթնոլորտը վերաճել է հասարակական անվերադարձ խզման:

Նրան անհրաժեշտ է յիշեցնել, որ անյաղթահարելի հասարակական անջրպետը, լեգիտիմութեան եւ վստահութեան սարսափելի ճգնաժամը կարգաւորել հնարաւոր է միայն ՀՀ գործող իշխանութիւնների հեռացումով: Այլապէս սնամէջ լոզունգների, ոչինչ չասող ճառերի, հասարակութիւնը (Սինանեանի դէպքում՝ Սփիւռքը) պառակտելու խելացնոր նոր սցենարների միջոցով կորցրածը յետ բերել անհնար է:

Այնպէս, որ Զարեհ Սինանեանին անհրաժեշտ է հասկանալ, որ իրականութիւնը հեռու է այն պատկերից, որ ինքը եւ իր գաղափարակիցները փորձում են ներկայացնել: Պատերազմից յետոյ, թէ՛ Հայաստանում, թէ՛ Սփիւռքում հանրային տրամադրութիւնների շրջադարձային փոփոխութիւն է տեղի ունենում:

Մարդիկ յոգնել են սեփական իշխանութիւնը պահելու նպատակով հասարակութիւնը պառակտելու՝ թշնամի բանակների բաժանելու փորձերից: Մարդիկ յոգնել են ատելութեան գեներացման գաղջ մթնոլորտից: Յոգնել են կառուցողական գաղափարներ կեանքի կոչելու՝ ՀՀ իշխանութիւնների անկարողութիւնից: Յոգնել են քաղաքականութիւնը փողոցի յատակի մակարդակի իջեցնելու, պետական համակարգն ու կառոյցները սեփական PR-ին ծառայեցնելու, լայքեր հաւաքելու, ՀՀ վարչապետի աթոռն զբաղեցնող անձի եւ նրա քաղաքական թիմի մանկամիտ գործելաոճից:

Իսկ ամենակարեւորը՝ մարդիկ յոգնել են սեփական Հայրենիքի նկատմամբ արգահատական եւ դաւաճանական վերաբերմունքի նողկալի հոգեբանութեան դրսեւորումներից, յանուն աթոռի պահպանման թշնամու դէմ ծնկելու, ցանկացած զիջման գնալու՝ իմքայլականների նւաստացուցիչ գործելաոճից:

Այնպէս, որ սթափւել է պէտք պարոն Սինանեան: Քանի դեռ ուշ չէ հայելուն նայել, սեփական իրական դէմքը տեսնել, համապատասխան հետեւութիւններ անել ու համարժէք քայլեր ձեռնարկել է պէտք:

Կարծում ենք, գիտէք, թէ խօսքն ինչի մասին է...

Յարակից լուրեր

  • Յայտարարութիւն ՀՅԴ Արեւմտեան Ամերիկայի Կեդրոնական կոմիտէի
    Յայտարարութիւն ՀՅԴ Արեւմտեան Ամերիկայի Կեդրոնական կոմիտէի

    Տեղեակ ենք, որ Սփիւռքի գործերու գրասենեակի յանձնակատար Զարեհ Սինանեան Լոս Անճելըս պիտի այցելէ մայիս 2-10։

    Իւրաքանչիւր օր, որ պրն. Սինանեան չի դատապարտեր Նիկոլ Փաշինեանը, անոր նախապատերազմեան, պատերազմի օրերու եւ յետպատերազմեան աւերին համար, կը նշանակէ, որ ինք մեղսակից է այն դաւաճանութեան, որուն կ՚ենթարկուի մեր հայրենիքը եւ ժողովուրդը։

  • Մեր ԱԼԻՔ-ը դարձաւ 90 տարեկան
    Մեր ԱԼԻՔ-ը դարձաւ 90 տարեկան

    22 մարտի 1931 թւական. լոյս աշխարհ եկաւ ԱԼԻՔ-ի առաջին համարը։

    Հայ մամուլի ընտանիքի բոլոր զաւակների պէս, ԱԼԻՔ-ը եւս անսահման սիրոյ եւ նւիրումի ծնունդ էր, որին յաջողւեց հասակ առնել, անցնել անասելի դժւար ճանապարհով, յաղթահարել բազում փորձութիւններ, պահպանել իր գոյութիւնը, եւ, ամենակարեւորը՝ իր բարոյական-գաղափարական ուղենիշը։

  • Մեր օրերի իրականութիւնն ու Փետրւարեան ապստամբութեան արդիական գաղափարները
    Մեր օրերի իրականութիւնն ու Փետրւարեան ապստամբութեան արդիական գաղափարները

    Փետրւարեան ապստամբութիւնը բոլորեց իր 100 տարին:

    100 տարի առաջ այս օրը՝ 1921 թւականի փետրւարի 18-ին հայ ժողովուրդն ընդվզեց հայրենիքը զաւթած բոլշեւիկների դէմ, որոնց աշխարհայեացքը, իդէալներն ու գաղափարները որեւէ կապ չունէին հայրենիքի այդ օրերի իրականութեան, անցեալի, ներկայի եւ ապագայի հետ:

  • Ռուսաստաբնակ ջաւախքահայերը հրաժարւել են Զարեհ Սինանեանի եւ ՀՀ ներկայիս իշխանութեան ցանկացած ներկայացուցչի հետ հանդիպումից
    Ռուսաստաբնակ ջաւախքահայերը հրաժարւել են Զարեհ Սինանեանի եւ ՀՀ ներկայիս իշխանութեան ցանկացած ներկայացուցչի հետ հանդիպումից

    «Ռուսաստանի Ջաւախքեան սփիւռք» հասարակական կազմակերպութիւնը յայտարարութիւն է տարածել, ըստ որի՝ ՀԿ-ն հրաժարւել է Սինանեանի հետ հանդիպելու առաջարկից։

  • Նժարին դրւած է Հայոց պետականութեան լինել-չլինելու հարցը
    Նժարին դրւած է Հայոց պետականութեան լինել-չլինելու հարցը

    Այսօր Մոսկւայում կը կայանայ Պուտին-Ալիեւ-Փաշինեան եռակողմ ձեւաչափով հանդիպումը, որի ընթացքում ըստ Կրեմլի տարածած պաշտօնական հաղորդագրութեան՝ «Նախատեսւում է դիտարկել 2020 թ. նոյեմբերի 9-ին Լեռնային Ղարաբաղի վերաբերեալ Ադրբեջանի, Հայաստանի եւ Ռուսաստանի ղեկավարների յայտարարութեան կատարումը եւ քննարկել տարածաշրջանում առկայ խնդիրները լուծելու հետագայ քայլերը: Առանձնայատուկ ուշադրութիւն է դարձւելու ռազմական գործողութիւններից տուժած տարածքների բնակիչներին օգնութիւն ցուցաբերելու, ինչպէս նաեւ առեւտրա-տնտեսական եւ տրանսպորտային կապերի ապաշրջափակման եւ զարգացման հարցերին»:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։