Հա

Համայնք

12/05/2019 - 09:10

Ուսուցչաց տօնը նշւեց Թաւրիզի հայոց ազգային դպրոցում

Շաբաթ 4 մայիս, 2019 թ.-ին, առաւօտեան ժամը 11-ին, սկսեց այն հանդիսութիւնը, որ տարեկան դրութեամբ երախտագիտութեան արտայայտութիւն է ուսուցիչներին:

«alikonline.ir» - Շաբաթ 4 մայիս, 2019 թ.-ին, առաւօտեան ժամը 11-ին, սկսեց այն հանդիսութիւնը, որ տարեկան դրութեամբ երախտագիտութեան արտայայտութիւն է ուսուցիչներին: Տեղեկացնում է Ատրպատականի ազգային առաջնորդարանը:

Ուսուցչաց տօնի առիթով, Թաւրիզի հայոց ազգային դպրոցի տեսչութիւնը հրաւիրել էր Կրթական խորհրդի պետական ներկայացուցիչներին՝ Փուր Մոհամմադին եւ Մոսլէմին, Ազգային իշխանութեան, հոգաբարձութեան եւ ծնողական խորհրդին, ինչպէս նաեւ դպրոցում պաշտօնավարած եւ այժմ հանգստի կոչւած հայ եւ օտար ուսուցիչներին, ներկայումս պաշտօնավայրող ուսուցիչներին, դպրոցի կեանքում դերակատար անձնաւորութիւններին:

Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեան դպրոց ժամանելով, ընդունւեց տեսչուհի Արմինէ Վահրամեանի եւ ուսուցչակազմի կողմից, նախագահելու համար օրւայ հանդիսութեան: Սրբազան հօր ընկերակցում էին Թաւրիզի հոգեւոր հովիւ՝ արժ. Տ. Մարտիրոս քհնյ. Ղուկասեանը եւ Թեմական խորհրդի կազմը:

Բացման խօսքը կատարեց աշակերտուհի Նարէ Սայադեանը, հրաւիրելով Վանէ Բահատորեանին եւ Իզապէլ Սարգիսեանին, իրենց մասնակցութիւնը բերելու գեղարւեստական ծրագրին ասմունքով եւ երախտագիտական խօսքով՝ ուղղւած իրենց ուսուցիչներին:

Դպրոցի տեսչուհի Արմինէ Վահրամեանը երախտիքի խօսքով դիմեց ներկայ ուսուցիչներին ե՛ւ հանգստի կոչւած ե՛ւ գործող, տարիների ընթացքում նրանց հոգեմտաւոր կազմաւորման աշխատանքը գնահատելով: Նոյնիսկ իրեն ուսուցիչ եղած անձերի հանդէպ խոր երախտագիտութեամբ, Արմինէ Վահրամեանը յիշեց նմանց կատարած նւիրեալ աշխատանքը Թաւրիզի հայոց ազգային դպրոցում:

Ուսուցչի օրւայ առիթով ե՛ւ հանգստի կոչւած ուսուցիչների ե՛ւ գործող ուսուցիչների անունից երկու ուսուցչուհիներ խօսք առին, իսկ «Ծերունի Գասպարեան» մանկապարտէզ-նախակրթարանի կողմից՝ Նայիրի Դիլանեան, շեշտելով ուսուցչի կողմից կատարւած մարդակերտման աշխատանքը, որը շատ բարձր է սովորական իմաստով ըմբռնւած պարտականութիւնից:

Կրթական խորհրդի պետական ներկայացուցիչ Փուր Մոհամմադին բեմ հրաւիրւելով իր ուրախութիւնը յայտնեց, որ պետական հովանաւորութեամբ տեղի ունեցող Ուսուցչի օրւայ ծրագրին իր այնքան կազմակերպւած մասնակցութիւնն է բերում նաեւ հայոց դպրոցը, իբրեւ անբաժան մասնիկը երկրի կրթական կեանքին: Ծնողական խորհրդի անունից խօսք առաւ Կարէն Սարգիսեանը, շնորհաւորական ջերմ խօսքեր ուղղելով բոլոր ուսուցիչներին:

Առաջնորդ Սրբազանը այս առիթով իր պատգամը յղեց ներկաներին: Նա հիմնականում բացատրեց այն, որ Ուսուցչի օրւայ նշումը բնական ընթացքով որոշւած օր է համայնական կեանքում, եւ ոչ թէ ցուցարարական պահանջներով ստացւած կամ պարտադրւած օր. «Եթէ նոյնիսկ չլինէր որոշւած նման օր, իւրաքանչիւր անձ ի՛նք պիտի նշանակէր այն, իր երախտագիտութիւնը յայտնելու այն անձանց, որոնք իր կազմաւորման ընթացքում կարեւոր դերակատարութիւն են ունեցել»,- ասաց Սրբազանը: Ապա նա անդրադարձաւ Իրանի պետութեան հոգատար վերաբերմունքին հայոց դպրոցի նկատմամբ, եւ բարձր գնահատեց ուսուցիչների նւիրեալ գործունէութիւնը, մեր զաւակների առողջ դաստիարակութեան եւ գիտական կրթութեան աշխատանքներում:

Զատկական տօների մթնոլորտում գտնւելով, ծնողական խորհուրդը ձւախաղ էր կազմակերպել բոլոր ներկաներին համար: Հայ եւ օտար բոլոր ուսուցիչների եւ հրաւիրեալների համար զւարճալի առիթ հանդիսացաւ սոյն ձւախաղը, որի աւարտին յաղթական փոքր խմբի անդամները մրցեցին իրարու հետ եւ օրւայ բախտաւոր անձը յայտարարւեց:

Հանդիսութեան աւարտին պարգեւատրւեցին այն ուսուցիչները, որոնք մասնաւոր աշխատանքով ծրագրեր էին իրականացրել եւ յաջողութիւններ արձանագրել հայոց դպրոցի համար: Ներկայ բոլոր ուսուցիչներ եւ Թաւրիզի հայոց դպրոցին օժանդակող մարմինների ներկայացուցիչները տեսչութեան միջոցով գնահատւեցին ծաղկաթաղարներով, որոնք նւիրաբերւել էին Գագիկ Ջորջեանի կողմից: Յայտնենք նաեւ որ մասնաւոր յուշանւէրներով պատււեցին հոգեւորականներն ու պետական պաշտօնեաները:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։