Հա

Համայնք

04/01/2020 - 12:10

2020 Նոր տարին նոր յոյսերով դիմաւորւեց Ատրպատականի հայոց թեմում

Ատրպատականի հայոց թեմում բնակւող եւ դարերով արմատաւորւած մեր ժողովրդի զաւակները, սերնդիցսերունդ, իրենց ազգային տօներն եւ քրիստոնէական ուրախալի առիթները միասնաբար կատարելու աւանդութիւնն ունեն: Շատ քչերն են որոնք առանձին կամ իրենց տներում հաւաքւած դիմաւորում են յատկապէս Նոր տարին:

«alikonline.ir» - Ատրպատականի հայոց թեմում բնակւող եւ դարերով արմատաւորւած մեր ժողովրդի զաւակները, սերնդիցսերունդ, իրենց ազգային տօներն եւ քրիստոնէական ուրախալի առիթները միասնաբար կատարելու աւանդութիւնն ունեն: Շատ քչերն են որոնք առանձին կամ իրենց տներում հաւաքւած դիմաւորում են յատկապէս Նոր տարին: Տեղեկացնում է Ատրպատականի ազգային առաջնորդարանը:

Ուստի, այս տարի եւս, բացւող նոր 2020 թւականի դիմաւորութիւնը թեմի տարբեր շրջաններում՝ առաջնորդանիստ Թաւրիզ քաղաքում, Ուրմիայում եւ գիւղերում, ժողովրդական ամանորեայ հաւաքներ տեղի ունեցան, ազգային հարուստ աւանդութիւններով եւ տոհմիկ շնչով սկսելու համար Նոր տարին:

Տարիների սովորութեան համաձայն, Թաւրիզի Հայոց ազգային դպրոցի տեսչութիւնը, ծնողական խորհրդի հետ միասին, ազգային առաջնորդարանի «Համազասպ Ոսկանեան» սրահում կազմակերպեց Նոր տարւայ դիմաւորութեան խանդավառ խրախճանք, որը յիշեցնում էր նահապետական բազմանդամ ընտանիք հաւաքները, նահապետի շուրջը:

Հարազատներով, համաքաղաքացիներով եւ երբեմն հիւրերով համախմբւած կլոր սեղանների շուրջ, հայկական աւանդական ուտեստներով եւ եղանակի մրգերով լեցուն, տարեվերջի հոգեվարքի եւ Նոր տարւայ ծննդեան ուրախալի պահը միասնաբար դիմաւորեցին Ատրպատականցի հայորդիներ, հովանաւորութեամբ եւ նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի եւ Թեմական խորհրդին:

Ժամեր առաջ արդէն երիտասարդական պարերով բոցավառւած սրահ ժամանեց Սրբազան հայրը, ընկերակցութեամբ Թաւրիզի հոգեւոր հովիւ Արժ. Տ. Մարտիրոս Քհնյ. Ղուկասեանի եւ Թեմական խորհրդի անդամների, իր հօտի հետ տօնելու տարեմուտը, նոր թւականով ու նոր ակնկալիքներով: Կատարւեց սեղանի օրհնութիւն, որից ՝յետոյ բարի գալստեան խօսքով հանդէս եկաւ Թաւրիզի Հայոց Ազգ. դպրոցի տեսչուհի Արմինէ Վահրամեանը: Ամանորի ամենաբարի մաղթանքների մէկ փունջ նա մատուցեց ներկայ բազմութեան, միշտ յիշեցնելով Հայոց դպրոցի դրական ու կարեւոր ներկայութիւնը մեր համայնքի կեանքում, որը բոլորի գուրգուրանքի առարկան պէտք է մնայ: Արմինէ Վահրամեանը նաեւ անդրադարձաւ տարւայ խորհրդանշանին եւ դրա ունեցած ազդեցութեանը մարդկանց վրայ: Վերջապէս միասնականութեան եւ համագործակցութեան բարի խօսքերով նա դիմեց բոլորին, շնորհաւորելով ամանորն ու յառաջիկայ Սուրբ Ծնունդը:

Ծնողական խորհրդի անդամ Կարէն Սարգիսեանը բեմ բարձրանալով, պաշտօնապէս ստանձնեց օրւայ հանդիսավարութիւնը, հրաւիրելով երաժիշտներին եւ նրանց օգնականներին, առաւել եւս խանդավառելու սրահում համախմբւած ժողովրդին:

Յայտնենք, թէ փոքրամասնութիւնների պետական բաժանմունքը յատուկ ծաղկեկողով էր ուղարկել, շնորհաւորելու համար Ատրպատականի Հայոց թեմում ապրող հայութեան Նոր տարին: Այս առիթով տեսչուհին ընթերցեց Փոքրամասնութիւնների տնօրէնութեան գրած պատգամը, ուղղւած Թեմակալ առաջնորդին, Ազգային իշխանութեան եւ հայ ժողովրդի զաւակներին:

Կէս գիշերին, երբ տեղի էր ունենանում ժամի փոփոխութիւնը եւ թաւալւում էր հին տարին դէպի նորը, ներկայ բազմութիւնը միաբերան թւահաշւարկով դիմաւորեց Նոր 2020 տարին, հարազատ ու բարեկամ եւ ապա՝ ծանօթ-անծանօթ, թաւրիզեցիներ եւ հիւրեր ողջագուրւեցին սրահում, շնորհաւորելով Նոր տարին: Գիշերւայ խանդավառութիւնը իր գագաթնակէտին հասաւ, երբ սրահ ժամանեց տարւայ ամէնից շատ սպասւած մարդը՝ Կաղանդ պապը, իր ընկերներով:

Նա շնորհաւորական խօսքերով եւ բարի խրատներով դիմեց ներկայ ժողովրդին եւ խաղաղութիւն մաղթեց աշխարհին ինչպէս նաեւ առողջութիւն բոլոր հիւանդներին:

Ընթացքում կատարւեց վիճակախաղեր, որոնք ունեցան իրենց բախտաւորները, իսկ մէկ նւէր՝ յատկացւել էր «Սաքօ» վաճառատան կողմից:

Բացւող Նոր տարւայ առիթով իր պատգամը ուղղելու հրաւիրւեց առաջնորդ Սրբազանը: Նա ողջունեց Ատրպատականի Հայոց թեմի բոլոր զաւակներին՝ Թաւրիզում, Ուրմիայում, Սալմաստում, Գեարդաբադում, Ռահւայում եւ այլ շրջաններում բնակւող, մաղթելով, որ բոլորն էլ նոր յոյսերով, ներ երազանքներով, իրագործումների նոր ծրագրերով առաջնորդւեն Նոր տարւայ ընթացքում, «որովհետեւ մէկիս յաջողութիւնը բոլորիս յաջողութիւնն է» ասաց նա: Ապա կարճ խորհրդածութիւն կատարելով 2020 թւականի մասին, ասաց. «Ոմանք դրա մէջ կրկնւած «2»  թիւը կը տեսնեն, ուրիշներ՝ «0»-ները: Բնականօրէն «2» թիւը առաւելութիւն ունի «0»-ին, վրայ: Սակայն եկէք ընդունենք, որ առանց իր աջակողմը գտնւող «0»-ին, շատ քիչ թիւ է երկուն: Ուրեմն տեղի համաձայն, «0»-ն իր արժէքը ունի, եթէ աջակողմը դրւած է տւեալ թիւին: Կեանքում «0» մարդ չկայ: Ամէն մարդ էլ արժէք է ներկայացնում, թէեւ կան անձեր, որոնք անտեսւում են, անպատւում են ուրիշներին, զրոյացնելով նրանց համբաւը, գիտութիւնը, վաստակը եւ փորձառութիւնը: Աւետարանում մեր Տէրը մարդկանց ընտրութեան ժամանակ աջ կամ ձախ դասւելու մասին է խօսում, եւ աջակողմեանները նկատում է իր ընտրեալները: Եկէք նոյնիսկ եթէ համեստ «0»-ներ ենք լինելու, այս տարի փորձենք այս թւականի աջակողմը դասւած «0»-ներից լինել, որպէսզի ե՛ւ Աստծու աչքին եւ մեր նմանների համար արժէքաւոր եւ օգտակար տարր լինենք», եզրակացրեց Սրբազան հայրը:

Յայտնենք, որ կէս գիշերւայ մօտ սրահ ժամանեց Փոքրամասնութիւնների գրասենեակի պատասխանատուն եւ շնորհաւորական ուղերձով դիմեց ներկայ ժողովրդին, որը բեմից ընթերցւեց տեսչուհի Արմինէ Վահրամեանի միջոցով:

Առաւօտեան ժամը 3-ին, հետզհետէ մեկնեց ժողովուրդը իր տունը, բացառիկ խանդավառութեամբ Նոր տարին դիմաւորած լինելու բաւարարւածութեամբ:

Յայտնենք, որ Ուրմիահայ գաղութում եւս մեր ժողովրդի զաւակները հաւաքաբար դիմաւորեցին նոր տարին, քաղաքի շքեղ սրահներից մէկում համատեղւելով:

Խրախճանքին ներկայ գտնւեցին Ազգային իշխանութեան՝ Պատգամաւորական ժողովի եւ Գործակալական խորհրդի անդամներ: Ընթացքում ընթերցւեց առաջնորդ Սրբազան հօր ողջոյնի խօսքը ուղղւած ուրմիահայութեան, որի միջոցով Սրբազան հայրը իր բարեմաղթանքներն էր յղում ժողովրդի զաւակներին աղօթելով որ Նոր տարին իր բարիքներով լիացնի բոլորին, յատկապէս խաղաղութիւնը բերելով աշխարհին:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։