Հա

Համայնք

08/02/2020 - 09:30

Ս. Սարգսի տօնը Ատրպատականի հայոց թեմում եւ Լիլաւայի եկեղեցու անւան օրը

Ուրբաթ, 7 փետրւար 2020 թ.-ին Ատրպատականի հայոց թեմի եկեղեցիներում՝ Թաւրիզում եւ Ուրմիայում տեղի ունեցաւ Ս. Սարգսի տօնի յատուկ ժամերգութիւն, նախատօնակ եւ ս. պատարագ:

«alikonline.ir» - Ուրբաթ, 7 փետրւար 2020 թ.-ին Ատրպատականի հայոց թեմի եկեղեցիներում՝ Թաւրիզում եւ Ուրմիայում տեղի ունեցաւ Ս. Սարգսի տօնի յատուկ ժամերգութիւն, նախատօնակ եւ ս. պատարագ: Տեղեկացնում է Ատրպատականի ազգային առաջնորդարանը:

Ս. Սարգսի տօնը լինելով նաեւ անւանակոչութեան օրը Լիլաւայի համանուն եկեղեցու, յատուկ նախատօնակ կատարւեց այս առիթով Թաւրիզի եկեղեցում, հանդիսապետութեամբ Ատրպատականի հայոց թեմի առաջնորդ՝ գերշ. Տ. Գրիգոր եպս. Չիֆթճեանի, իսկ Ուրմիայի Ս. Ստեփանոս ծխական եկեղեցում նոյն օրը երեկոյեան ս. պատարագ մատոյց եւ Ս. Հաղորդութիւն տւեց արժ. Տ. Մարտիրոս քհնյ. Ղուկասեանը:

Եկեղեցական արարողութիւնը հոգեկան վերանորոգումի առիթ հանդիսացաւ ե՛ւ Թաւրիզում ե՛ւ Ուրմիայում, մեր ժողովրդի եւ յատկապէս երիտասարդութեան կողմից սիրւած տօն լինելով: Ըստ աւանդութեան, թեմի բարեպաշտ հաւատացեալներ ծոմապահութիւն էին կատարել, եւ Նախատօնակի աւարտին բոլորն էլ հաղորդւեցին, լուծելու համար իրենց ծոմապահութեան երեք օրերը:

Ս. Սարգիս եկեղեցու անւան տօնի առիթով, Թաւրիզի եկեղեցիների Խնամակալ մարմնի կողմից պատրաստւել էին «աղի բլիթ»-ներ, յատուկ կապոցներով փաթաթւած եւ տօնը նշող յուշանւէրով ճոխացւած, որոնք եկեղեցական արարողութեան ընթացքում օրհնւեցին Սրբազան Հօր ձեռամբ եւ իւրաքանչիւր հաւատացեալ իր հետ տարաւ, կիրառելու համար տօնի ազգային արժէքաւոր աւանդոյթը: Իւրաքանչիւր կապոց նաեւ ունէր Ս. Սարգիս Զօրավարի կեանքի ամփոփ գծերը ներկայացնող գունազարդ նկարով չորսէջեայ թերթիկ, ինչպէս նաեւ անհրաժեշտ մի քանի աղօթքներ, որոնք տպագրւել էին Կանանց Խնամակալ մարմնի Քրիստոնէական դաստիարակութեան յանձնախմբի կողմից:

Եկեղեցական արարողութեան ընթացքում երգւեց սուրբին նւիրւած «Ամենասուրբ Երրորդութեան ընտրեալ ծառայ» շարականը եւ տեղի ունեցաւ նախատօնակ: Սրբազան Հօր գլխաւորութեամբ, նախատօնակի արարողութեան ընթացքին կատարւեցին օրւայ սուրբին նւիրւած «Հարց», «Մեծացուսցէ», «Ողորմեա» եւ «Տէր Յերկնից» հոգեզմայլ շարականները:

Սրբազան Հայրը բարձր գնահատեց Խնամակալ մարմնի նւիրեալ գործունէութիւնը թեմի եկեղեցիներին, իսկ հաւատացեալներին գնահատեց մեր եկեղեցու աւանդութիւններին սերտօրէն կապւած լինելու համար. «Սուրբ Սարգսի արագահաս լինելը բոլորիս համար էական է: Ո՞վ է այն մարդը, որ իր կեանքում նեղութեան մատնւելուց յետոյ չի ուզում շուտով ազատւել: Ահա այն սուրբը, որը պատրաստակամութիւն է յայտնում շուտով քեզ մօտ լինել, Աստծու մօտ իր կատարած բարեխօսութեամբ քեզ փրկելու քո դժւարութիւնից»,- պատգամեց Սրբազան Հայրը:

Թաւրիզի Ս. Սարգիս եկեղեցու անւանակոչութիւնը հոգեւոր վերանորոգման եւ հաւատքի վերաթարմացման առիթ հանդիսացաւ բոլոր հաւատացեալների համար, որոնք ամէն Կիրակի իրենց հայրերի կառուցած բարձր Հաւատքի ամրակուռ տունը մտնում են անվերապահ հաւատքով ու իրենց աղօթքների պատասխանը ստանալու քաջ վստահութեամբ:

Յարակից լուրեր

  • Ատրպատականի հայոց թեմում նւիրահաւաք՝ ի նպաստ Լիբանանի հայութեան
    Ատրպատականի հայոց թեմում նւիրահաւաք՝ ի նպաստ Լիբանանի հայութեան

    Սրբազան Հայրը այս առիթով ասաց. «Կոչ արեցինք մեր ժողովրդի զաւակներին, որ նոյնիսկ իրենց դոյզն նւէրը, համեստագոյն լուման չզլանան նւիրաբերելու մարդասիրական ու ազգասիրական սոյն նպատակին, որպէսզի դրանք եւս միացնելով Ազգային իշխանութեան կողմից տրամադրւող գումարին, որպէս «այրի կնոջ լումայ» ուղարկենք Ն.Ս.Օ.Տ.Տ. Արամ Ա կաթողիկոսի կողմից հաստատւած լիբանանահայութեան Օժանդակութեան ֆոնդին: Հաւատում ենք, որ ովկիանոսներն եւս ջրի կաթիլներից են բաղկանում»:

  • Ատրպատականի հայոց թեմի առաջնորդը ցաւակցեց եւ զօրակցեց ԻԻՀ-ում Լիբանանի դեսպանին
    Ատրպատականի հայոց թեմի առաջնորդը ցաւակցեց եւ զօրակցեց ԻԻՀ-ում Լիբանանի դեսպանին

    6 օգոստոս 2020 թ.-ին, Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեան ցաւակցական եւ զօրակցական նամակ յղեց ԻԻՀ-ում Լիբանանի արտակարգ եւ լիազօր դեսպան Հասան Մոհամմէդ Աբբասին, 4 օգոստոս 2020 թ.-ին, Բէյրութի նաւահանգիստում տեղի ունեցած աղէտալի պայթիւնի տխուր առիթով:

  • Սալմաստի ազգագրութիւնը (Հատւած)
    Սալմաստի ազգագրութիւնը (Հատւած)

    Մէկ քանի ամիսներից ի վեր Ատրպատականի հայոց թեմի «Արտազ» պաշտօնական ամսագրում խմբագրում եւ հրատարակութեան ենք տալիս մեր թեմի արխիւատանը գտնւող այն գրութիւններից, որոնք թեմի պատմութեան եւ յատկապէս ազգագրութեան համար կարեւոր տւեալներ են պարունակում:

    Նման գրութիւններից են Թաւիրիզ նախկին Կենտրոնական դպրոցի աւարտական դասարանի աշակերտների գրութիւնները, որոնք ներկայացնում են իրենց եկած գաւառների ազգագրութիւնը: Երախտաշատ աշխատանք, որի յանձնարարողը եղել են բանիմաց ուսուցիչներ, տեղի վրայ կորստից փրկած լինելու համար այն, ինչ որ մեր գաւառների կեանքն էր, իր առօրեայով եւ հաւատալիքներով:

  • Մանկա-պատանեկան նկարչական ցուցահանդէսի բացում Ս. Թադէի վանքում
    Մանկա-պատանեկան նկարչական ցուցահանդէսի բացում Ս. Թադէի վանքում

    Կիրակի 26 յուլիս 2020-ի երեկոյեան ժամը 8-ին, Ս. Թադէի վանքում, դռնփակ պայմաններում, մանկա-պատանեկան նկարչական ցուցահանդէս տեղի ունեցաւ, հովանաւորութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի եւ կազմակերպութեամբ Իրանի Եկեղեցիների Պահպանութեան գրասենեակի տնօրէնութեան, որը առցանց միացումով ուղիղ սփռւեց, մասնակցութեամբ աւելի քան 100 ակնդիրների:

  • Տարեկան եռօրեայ ուխտագնացութեան օրերին Ս. Թադէոս Առաքեալի Աջի օրհնութիւն՝ Ս. Թադէի վանքից
    Տարեկան եռօրեայ ուխտագնացութեան օրերին Ս. Թադէոս Առաքեալի Աջի օրհնութիւն՝ Ս. Թադէի վանքից

    Շաբաթ 25 յուլիս 2020-ին, Ս. Թադէոս Առաքեալի եւ Ս. Սանդուխտ կոյսի տօնի առիթով, Ս. Թադէի վանքի Մայր խորանից, Ս. Թադէոս Առաքեալի Աջով օրհնութիւն բաշխւեց մեր ժողովրդի զաւակներին, որոնցից շատեր ցանկանալով ցանկանում էին այս տարի մասնակցել Ս. Թադէի վանքի տարեկան եռօրեայ ուխտագնացութեան:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։