Հա

Համայնք

15/02/2020 - 10:50

Տեառնընդառաջի հանդիսաւոր նախատօնակ եւ հրավառութիւն Ատրպատականի հայոց թեմում

Հայ եկեղեցու աւանդութեան համաձայն եւ հետեւելով դրա տօնացոյցի էջերի տւած պատւէրին, հինգշաբթի 13 փետրւար 2020 թ.-ի երեկոյեան ժամը 6-ին, Տեառնընդառաջի տէրունի յիշատակի առիթով, Ատրպատականի հայոց եկեղեցիներում՝ Թաւրիզում եւ Ուրմիայում, տեղի ունեցան հանդիսաւոր նախատօնակի ժամերգութիւններ եւ ապա հրավառութիւն:

«alikonline.ir» - Հայ եկեղեցու աւանդութեան համաձայն եւ հետեւելով դրա տօնացոյցի էջերի տւած պատւէրին, հինգշաբթի 13 փետրւար 2020 թ.-ի երեկոյեան ժամը 6-ին, Տեառնընդառաջի տէրունի յիշատակի առիթով, Ատրպատականի հայոց եկեղեցիներում՝ Թաւրիզում եւ Ուրմիայում, տեղի ունեցան հանդիսաւոր նախատօնակի ժամերգութիւններ եւ ապա հրավառութիւն: Տեղեկացնում է Ատրպատականի ազգային առաջնորդարանը:

Հաւատացեալների հոծ բազմութեան ներկայութեամբ եւ կրտսերաց դպրաց դասի կիսասարկաւագների եւ դպիրների երգեցողութեամբ կատարւեցին տեառնընդառաջի հոգեթով շարականները, ղեկավարութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի: Թաւրիզում, Ուրմիայում եւ Գեարդաբադ գիւղում տեղի ունեցան եկեղեցական արարողութիւնները եւ կատարւեց հրավառութեան աւանդութիւնը:

Տիրոջ տաճար ընծայման տօնին յատուկ «Մարմնացեալդ ի Կուսէն» շարականի երգեցողութեամբ ատեանում կատարւած խնկեղինօք եւ մոմեղինօք հանդիսաւոր թափօրը, ապա «Ի գիրկս առեալ» շարականի երգեցողութեան պահին մանուկների խորան մատուցումը, վերյիշեցրին մանուկ Յիսուսի տաճար ընծայման խորհրդանշական պատկերը, երբ իր մօր՝ Ս. Կոյս Մարիամի գրկում Սողոմոնի տաճար բերւեց նա, Աստծուն ընծայւելու համար, եւ Սիմէոն ծերունին իր գիրկը առնելով նրան՝ գգւեց:

Աշխարհի քառակողմը օրհնելու խորհրդանշական արարողութիւնը՝ «Անդաստան»-ի եկեղեցական աւանդութիւնը, մարդկութիւնը Աստծու պաշտպանութեան յանձնող տպաւորիչ այն արարողութիւններից է հայ եկեղեցու, որի խանդավառ «Ամէն ալէլուիա»-ին մասնակցեց հաւատացեալ ժողովուրդը:

Թաւրիզի Լիլաւա հայաշատ թաղամասի Ս. Սարգիս եկեղեցին երեկոյեան ժամին լցւել էր բարեպաշտներով, հակառակ դրսում տեղացող առատ ձեան: Հաւատացեալ ժողովուրդը իրենց ձեռքի մոմերով ու լապտերներով իւրայատուկ խորհրդաւորութիւն էին տւել Աստծու Տանը:

Նախատօնակի աւարտին կատարւեց մանուկների խորան ընծայման աւանդութիւնը, երբ ծնողներ իրենց անչափահաս երեխաները խորանին ընծայելու պատիւն ու հոգեկան բաւարարութիւնը ստացան, Աստծու աջի հովանին ապահովելով իրենց սիրասուն զաւակներին:

Ուրմիայի Ս. Ստեփանոս եւ Գեարդաբադի Ս. Գէորգ եկեղեցիներում՝ արժ. Տէր Մարտիրոս քհնյ. Ղուկասեանը կատարեց Տեառնընդառաջի արարողութիւնը, շրջանի հայութեան խուռներամ ներկայութեամբ: Ըստ աւանդութեան, Ռահւա գիւղում եւս հրավառութիւն կատարւեց, Ս. Աստւածածին եկեղեցու հոգաբարձութեան եւ խնամակալ մարմնի կազմակերպութեամբ: Ե՛ւ Թաւրիզում ե՛ւ Ուրմիայում ե՛ւ Գեարդաբադում մեր ժողովրդի զաւակները խուռներամ ներկայ գտնւեցին արարողութեան եւ հաղորդւեցին օրւայ դաստիարակիչ խորհրդով:

Սրբազան Հայրը, Թաւրիզում, եկեղեցական արարողութեան աւարտին մայր խորանից վառած իր մոմի բոցով վառեց եկեղեցու կենտրոնում դրւած հսկայ աշտանակի մոմը, եւ ապա թափօրով ուղղւեցաւ դէպի եկեղեցու շրջափակը, որտեղ պատրաստւել էր խարոյկի համար խտացրած փայտերի դէզը: Այստեղ եւս, տեղացող առատ ձեան փաթիլների տակ, փայտերի դէզին առաջին բոցը տրւեց Սրբազան Հօր ձեռամբ, եւ ապա ժողովուրդը կրակին շուրջ պտտւեց երեք անգամ, յանուն Հօր, Որդու եւ Սուրբ Հոգու իր ուխտը ընծայելով խնդրակատար Աստծուն՝ Քրիստոս-Լոյսի միջնորդութեամբ:

Մեր հեթանոս պապերից ժառանգւած սոյն աւանդութիւնը, որը Ս. Գրիգոր Լուսաւորչի կողմից պատշաճեցւել էր մեր քրիստոնէական կրօնի կարեւոր տօներից՝ Տեառնընդառաջի, առաւել խանդավառութիւն ստեղծեց բոլորի մօտ ե՛ւ մեծերի ե՛ւ մանաւանդ փոքրերի:

Ուրմիայում այս տարի, Հ.Օ.Մ.-ի «Նայիրի» մանկապարտէզի երեխաների կողմից յատուկ ծրագիր գործադրւեց եկեղեցական արարողութիւնից յետոյ փակ վարագոյրի առջեւ, որը ներկայացնում էր Յիսուսի տաճար ընծայման դրւագը: Ուսուցչական կազմը, գլխաւորութեամբ Օֆելիա Սայադեանի, իւրաքանչիւր երեխայի սովորեցրել էր դերերը: Ուստի, նրանցից մէկ Աստւածամօր, միւսը Յիսուսի, երրորդը Սիմէոն ծերունի եւ այսպէս՝ բոլոր կերպարների դերերով հանդէս եկան, հաւատացեալ ժողովրդին ներկայացնելով տաճար ընծայման դրւագը: Տէր Հայրը գնահատեց բոլորին, քաջալերելով յատկապէս Հ.Օ.Մ.-ի վարչութեան, իր ցուցաբերած աշխոյժ գործունէութեան համար, յատկապէս նոր սերնդի դաստիարակութեան գործում:

Լուսավառութեան խորհրդաւոր մէկ պահ դարձաւ հաւատացեալ ժողովրդին լապտերներով դէպի տուն մեկնումը: Լապտերները պատրաստւել էին Թաւրիզի Խնամակալ մարմնի ժրաջան կանանց կողմից: Ժողովուրդը Աստծու Տնից վառւած ճրագը իր հետ տարաւ տուն, տան օջախի կրակը միշտ նրանով վառ պահելու հաւատքով:

Յարակից լուրեր

  • Ատրպատականից զօրակցութիւն՝ Ն.Ս.Օ.Տ.Տ. Արամ Ա կաթողիկոսին եւ լիբանանահայութեան
    Ատրպատականից զօրակցութիւն՝ Ն.Ս.Օ.Տ.Տ. Արամ Ա կաթողիկոսին եւ լիբանանահայութեան

    Ցաւով, ափսոսանքով ու զօրակցական զգացումներով հետեւեցինք երէկ, 4 օգոստոս 2020 թ.-ին, Բէյրութի նաւահանգիստում տեղի ունեցած ահաւոր պայթիւնի հետեւանքով ստեղծւած աղէտալի կացութեան, որից տուժւեց նաեւ մեր սիրելի լիբանանահայութիւնը, իր սրտում ունենալով մեր Ս. Աթոռը՝ Մեծի Տանն Կիլիկիոյ կաթողիկոսութիւնը:

  • Սալմաստի ազգագրութիւնը (Հատւած)
    Սալմաստի ազգագրութիւնը (Հատւած)

    Մէկ քանի ամիսներից ի վեր Ատրպատականի հայոց թեմի «Արտազ» պաշտօնական ամսագրում խմբագրում եւ հրատարակութեան ենք տալիս մեր թեմի արխիւատանը գտնւող այն գրութիւններից, որոնք թեմի պատմութեան եւ յատկապէս ազգագրութեան համար կարեւոր տւեալներ են պարունակում:

    Նման գրութիւններից են Թաւիրիզ նախկին Կենտրոնական դպրոցի աւարտական դասարանի աշակերտների գրութիւնները, որոնք ներկայացնում են իրենց եկած գաւառների ազգագրութիւնը: Երախտաշատ աշխատանք, որի յանձնարարողը եղել են բանիմաց ուսուցիչներ, տեղի վրայ կորստից փրկած լինելու համար այն, ինչ որ մեր գաւառների կեանքն էր, իր առօրեայով եւ հաւատալիքներով:

  • Մանկա-պատանեկան նկարչական ցուցահանդէսի բացում Ս. Թադէի վանքում
    Մանկա-պատանեկան նկարչական ցուցահանդէսի բացում Ս. Թադէի վանքում

    Կիրակի 26 յուլիս 2020-ի երեկոյեան ժամը 8-ին, Ս. Թադէի վանքում, դռնփակ պայմաններում, մանկա-պատանեկան նկարչական ցուցահանդէս տեղի ունեցաւ, հովանաւորութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի եւ կազմակերպութեամբ Իրանի Եկեղեցիների Պահպանութեան գրասենեակի տնօրէնութեան, որը առցանց միացումով ուղիղ սփռւեց, մասնակցութեամբ աւելի քան 100 ակնդիրների:

  • Տարեկան եռօրեայ ուխտագնացութեան օրերին Ս. Թադէոս Առաքեալի Աջի օրհնութիւն՝ Ս. Թադէի վանքից
    Տարեկան եռօրեայ ուխտագնացութեան օրերին Ս. Թադէոս Առաքեալի Աջի օրհնութիւն՝ Ս. Թադէի վանքից

    Շաբաթ 25 յուլիս 2020-ին, Ս. Թադէոս Առաքեալի եւ Ս. Սանդուխտ կոյսի տօնի առիթով, Ս. Թադէի վանքի Մայր խորանից, Ս. Թադէոս Առաքեալի Աջով օրհնութիւն բաշխւեց մեր ժողովրդի զաւակներին, որոնցից շատեր ցանկանալով ցանկանում էին այս տարի մասնակցել Ս. Թադէի վանքի տարեկան եռօրեայ ուխտագնացութեան:

  • Երէկ՝ Սիսի «Սուրբ Սոֆիա»-ն, իսկ այսօր՝ «Այա Սոֆիա»-ն
    Երէկ՝ Սիսի «Սուրբ Սոֆիա»-ն, իսկ այսօր՝ «Այա Սոֆիա»-ն

    Համայն աշխարհի լրատւամիջոցները բազմաթիւ կրկնութիւններով ու պատմութեան համառօտ բացատրականներով իրարու գերազանցեցին ու յաճախ իրարու արձագանգ հանդիսացան, ներկայացնելով Թուրքիոյ նախագահ Ռեջէփ Թայիբ Էրդողանի կողմից, Կոստանդնուպոլսի յունական «Այա Սոֆիա» հռչակաւոր մայր եկեղեցին մզկիթի փոխակերպելու անիրաւ որոշումը եւ դրան հետեւող տխրահռչակ յայտարարութիւնը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։