Հա

Համայնք

25/04/2020 - 13:50

105 տարիներ յետոյ, Ատրպատականի հայութիւնը դարձեալ հաւատարիմ՝ Հայոց Ցեղասպանութեան Սուրբ զոհերի յիշատակին

Ուրբաթ, 24 Ապրիլ 2020 թ.-ին, Ատրպատականի հայոց թեմի զաւակները յարգանքի ու պահանջատիրութեան միացեալ զգացումներով եւ ազգային բարձր գիտակցութեամբ յիշեցին Հայոց Ցեղասպանութեան սրբացեալ նահատակներին, կարելի բոլոր միջոցներով մասնակից լինելով հայ Ժողովրդի այս մեծ օրւայ իրադարձութեանց:

«alikonline.ir» - Ուրբաթ, 24 Ապրիլ 2020 թ.-ին, Ատրպատականի հայոց թեմի զաւակները յարգանքի ու պահանջատիրութեան միացեալ զգացումներով եւ ազգային բարձր գիտակցութեամբ յիշեցին Հայոց Ցեղասպանութեան սրբացեալ նահատակներին, կարելի բոլոր միջոցներով մասնակից լինելով հայ Ժողովրդի այս մեծ օրւայ իրադարձութեանց: Տեղեկացնում է Ատրպատականի ազգային առաջնորդարանը:

 

ա) «Բարեխօսական կարգ»

Տիրող համատարած Պսակաձեւ ժահրի ստեղծած արտասովոր դրութեան մէջ, անշուշտ կարելի չէր ամէն տարւայ նման սուրբ պատարագով եւ այլ հանդիսութիւններով նշել Ապրիլի 24-ը, սակայն Թեմական խորհրդի որոշած ձեւաչափով, մեր կեանքում գործող բոլոր կառոյցները, միութիւններն ու կազմակերպութիւնները իրենց մասնակցութիւնը բերեցին, Թաւրիզում եւ Ուրմիայում անմասն չմնալով Հայոց Ցեղասպանութեան նահատակների յարգանքի օրւայ խորհրդից:

Ուրբաթ առաւօտեան ժամը 11-ին, Լիլաւայի Սուրբ Սարգիս եկեղեցու շրջափակում գտնւող Ալեքսանդր Թամանեանի գծագիրով կառուցւած Նահատակաց յուշարձանի առջեւ տեղի ունեցաւ «Բարեխօսական կարգ», նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի, մասնակցութեամբ ծխատէր՝ արժ. Տ. Մարտիրոս քհնյ. Ղուկասեանի եւ բարշ. Վարդան սրկ. Տէր-Մարտիրոսեանի:

Ներկայ էին Պատգամաւորական ժողովի եւ Թեմական խորհրդի անդամներ, իւրաքանչիւր կազմակերպութիւնից եւ միութիւնից մէկական ներկայացուցիչներ, որոնք մեխակներ իրենց ձեռքին հետեւեցին եկեղեցական արարողութեան: Հ.Մ.Ա.Կ.-ի Թաւրիզի մասնաճիւղի Սկաւուտական կազմի խմբապետական երէց անդամներից Սեպուհ Անտոնեան եւ Դերիկ Գէորգեան յարգանքի պահակ կանգնել էին յուշարձանի աջ ու ձախ կողմերում: Յուշարձանի կենտրոնում զետեղւել էր նրբակերտ ճաճանչը, որի մէջ ամփոփւել է Հայոց Ցեղասպանութեան զոհերի աճիւններից, հաւաքւած Դեր Զօրի անապատից:

Առաւօտեան ժամերգութիւնից, Սրբոց նւիրւած «Քրիստոս Աստւած մեր» երգի կատարմամբ, Սրբազան Հայրը յիշեց մէկուկէս միլիոն նահատակներին, «Որք անկան յընթացս Հայոց Ցեղասպանութեան, ի ձեռն ցեղասպան Թուրքիոյ, վասն հաւատոյ եւ վասն հայրենեաց»: Ապա նա ամփոփ պատգամ յղեց ներկաներին, յիշեցնելով որ ազգի ներկայացուցչական այս խմբի միջոցով մեր թեմի բոլոր զաւակներին է ուղղւած սոյն պատգամը:

Սրբազան Հայրը ներկայ արտասովոր դրութեան մէջ Հայրենիքի հանդէպ սիրոյ, ազգի հանդէպ գուրգուրանքի եւ սուրբ Նահատակների կտակի հանդէպ հաւատարմութեան վարակիչները հանդիսանալու կոչ ուղղեց ներկաներին. «Վարակել բայի այս դրական իմաստով, մենք էլ այս արժէքների վարակողը դառնանք մեր ժողովրդի կեանքում»,- ասաց նա: Ապա, արդարութեան հաստատման համար մեր ազգի արդար պահանջատիրութեան անդրադառնալով, Սրբազան Հայրը ասաց. «Աշխարհի բոլոր ծագերում մեր արդարութեան պահանջի ձայնը չենք լռեցնելու, մինչեւ որ ցեղասպանը ընդունի իր կատարած ոճիրը եւ հատուցի իրաւազրկւած մեր ազգին»:

Եկեղեցական արարողութիւնը եզրափակւեց «Պահպանիչ» աղօթքով, երբ Սրբազան Հայրը Սուրբ նահատակաց մասունքակիր ճաճանչով օրհնեց ներկաներին: Ապա, Պատգամաւորական ժողովի ատենապետուհի Արմինէ Յովսէփեան եւ Թեմական խորհրդի ատենապետ Ռուբիկ Ջանանեան միասնաբար ծաղկեպսակ զետեղեցին յուշարձանին: Ներկայացուցչական հանգամանքով ներկայ ազգայինները մօտեցան յուշարձանին ծաղկեմատոյցի համար եւ խնկեցին սրբերի մասնատփի առջեւ զետեղւած կրակը:

Վերջին պահը եղաւ լռութեամբ յարգանքի տուրք ընծայելու առիթ, երբ եկեղեցու զանգերը ղօղանջեցին, իսկ ներկաները յուշարձանին դիմաց կանգնած խորհրդածելու մէկ րոպէ ունեցան:

Նահատակների կտակի հանդէպ հաւատարմութիւն ցուցաբերելու եւ իբրեւ յետնորդ սերունդներ նրանց արդար պահանջատիրութեան ջահը վառ պահելու գիտակից հայորդիներ, մեր ժողովրդի զաւակները Ատրպատականում, այս դժւարին պայմաններում կարողացան եկեղեցական սեղմ արարողութեամբ իրենց ճիտի պարտքը կատարել:

 

բ) Մասնակցութիւն տներից

Ինչպէս տարբեր գաղութներում, Աստրպատականում եւս, Թաւրիզում եւ Ուրմիայում, մեր ժողովրդի զաւակները իրենց տներում մոմեր վառած, յարգանքով հսկում կատարեցին, իրենց ընտանեկան պայմաններում ստեղծելով «յիշելու եւ յիշեցնելու» մթնոլորտը: Յիշել այն ինչ որ պատահեցաւ մեր ազգին, յիշեցնել նոր սերնդին՝ վերապրելու եւ գոյատեւելու կամքը, եւ նաեւ յիշեցնել աշխարհին, թէ կայ հայի արդար դատը, որի հետապնդողը մնալու է մեր ազգի իւրաքանչիւր զաւակ, իր բոլոր բջիջներով:

Նոյն գիշեր՝ ապրիլի 23-ին, Ատրպատականի ազգային առաջնորդարանի շրջափակում զետեղեւած Ջուղայի մշակութային կոտորածից ճողոպրած զոյգ խաչքարերի առջեւ տեղի ունեցաւ մոմավառութիւն, ի յարգանս մեր սրբացեալ նահատակաց: Սրբազան Հօր միջոցով կատարւած մոմավառութիւնը, թեմի ողջ ժողովրդի անունից աղօթք էր, Ապրիլեան նահատակաց յիշատակին:

 

գ) Աշակերտական ծրագիրներ՝ դարձեալ տներից

Ուրմիայում եւ Թաւրիզում, Հ.Օ.Մ.-ի տեղի մասնաճիւղերի հովանաւորութեան տակ գործող կրթօջախների ուսուցչական կազմերը, գլխաւորութեամբ Ռօնիկ Մեջլումեանի եւ Օֆելիա Սայադեանի (Ուրմիա) եւ Նայիրի եւ Անի Դիլանեանների (Թաւրիզ) դաստիարակիչ ծրագիր էին յղացել, մատաղատի մեր սերնդի զաւակներին մասնակից դարձնելու Ապրիլեան յուշատօնին:

Ուրմիայում «Նայիրի» մանկապարտէզ յաճախող իւրաքանչիւր երեխայի ծնող տեսերիզի վրայ արձանագրել էր հեռակայ կարգով իր զաւակի սովորած երգն ու արտասանութիւնը, որոնք երկու տեսերիզներով հրապարակւեցին Ատրպատականի հայոց թեմի ընկերային ցանցերում:

Նոյնպէս Թաւրիզում, «Ծերունի Գասպարեան» մանկապարտէզ-նախակրթարանի աշակերտները երեք տարբեր լուսանկարների խմբաւորումներ ներկայացրին ազգային առաջնորդարան, առաջինը մոմավառութեան արարողութիւնը իրենց տներում կատարելու պահին, երկրորդը՝ ուսուցչաց թելադրանքով Ծիծեռնակաբերդը գծելու պարտականութիւնը, եւ երրորդը՝ Հայաստանից սփռւող Ծիծեռնակաբերդում տեղի ունեցած արարողութեան հետեւողութիւնը իրենց կողմից հեռուստացոյցից:

Յայտնենք, որ մեր թեմում գործող բոլոր միութիւններն ու կազմակերպութիւնները իրենց անհատական եւ միութենական ցանցերում մնայուն ներկայութիւն եղան, մեր պահանջատիրութեան արդար ձայնը բարձրացնելով:

Վերջապէս, ժամանակներին յարմարւելու եւ սակայն մեր ազգային-եկեղեցական պարտաւորութիւններում չթերանալու խոր նշանակութիւն ունեցան երկու օրերի վրայ տարածւած սոյն ծրագրերը, որոնք բոլորը մղւած էին բարձր գիտակցութիւնից: Վստահաբար յառաջիկայ տարի, 106-ամեակին, կարօտի բացառիկ զգացումով համայն հայութիւնը իր յարգանքի տուրքը կընծայի մեր նահատակներին, խուռներամ շարքերով մասնակցելով եկեղեցական արարողութիւններին, քայլարշաւներին եւ այլ ձեռնարկներին:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։