Հա

Համայնք

14/09/2020 - 11:40

Խաչվերացի տաղաւարի տօնակատարութիւն եւ ռեհանազարդ խաչով անդաստան Ատրպատականի հայոց թեմում

Կիրակի, 13 սեպտեմբեր 2020 թ.-ի առաւօտեան ժամը 11-ին, Ատրպատականի հայոց թեմի եկեղեցիներում, Թաւրիզում եւ Ուրմիայում մատուցւեց սուրբ եւ անմահ պատարագ, Խաչվերացի տաղաւար տօնի առիթով:

«alikonline.ir» - Կիրակի, 13 սեպտեմբեր 2020 թ.-ի առաւօտեան ժամը 11-ին, Ատրպատականի հայոց թեմի եկեղեցիներում, Թաւրիզում եւ Ուրմիայում մատուցւեց սուրբ եւ անմահ պատարագ, Խաչվերացի տաղաւար տօնի առիթով: Տեղեկացնում է Ատրպատականի ազգային առաջնորդարանը:

Թաւրիզահայութեան ուխտավայր մատուռում, Մարալանի Ս. Աստւածածին եկեղեցում հանդիսաւոր ս. պատարագ մատոյց եւ իր պատգամը յղեց Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը, իսկ Ուրմիայի Ս. Ստեփանոս ծխական եկեղեցու պատարագեց եւ քարոզեց՝ արժ. Տ. Մարտիրոս քհնյ. Ղուկասեանը: Թաւրիզում ս. պատարագի երգեցողութիւնը կատարւեց «Կոմիտաս» երգչախմբի կողմից, ղեկավարութեամբ երաժիշտ Վարդան Վահրամեանի, իսկ Ուրմիայում «Նարեկացի» երգչախմբի կողմից, ղեկավարութեամբ Արտեմիս Բայրամեանի:

Համաշխարհային առումով ծանօթ «Քորոնա» համավարակի պատճառով ամիսներից ի վեր եկեղեցու փակ դռները վերաբացւեցին հաւատացեալ ժողովրդի համար, որոնք կարօտով մուտք գործեցին Աստծու տունը եւ ազգի հոգեւոր ապաստանարանը, Աստծու ներկայութեան կանգնելու եւ վերատեսութեան ենթարկելու սեփական կեանքն ու մարդկային փոխյարաբերութիւնները:

Սրբազան Հայրը իր քարոզի բնաբանը վերցնելով Պօղոսեան պարծանքի անփոխարինելի նիւթ հանդիսացող՝ Քրիստոսի խաչափայտի պարծանքից, թւեց այն պարծանքի սին նիւթերը, որոնցով մարդիկ առհասարակ պարծենում են. ուժ, իմացական կարողութիւն, բարձրագոյն վկայականներ, նիւթական հարստութիւնը, սիրունութիւն, մարդկային ծանօթութիւններ, հռչակ, համբաւ ու վաստակ եւ այլ երեւոյթները այս կեանքի, որոնք բոլորը ժամանակի մէջ են սահմանափակւում. «Այս բոլորից դուրս եւ վեր է պօղոսեան պարծանքը՝ խաչը, որ աստւածային ուսերի վրայ դրւելուց յետոյ, համայն մարդկութեանը պիտի համեստացնի եւ անմիտ է այն մարդը, որը դեռեւս իր սեփական պարծանքներով է պարծենում: Քրիստոսի, մարդկութեան սիրոյ համար կրած զոհողութիւնից աւելի մեծ պարծանք չենք կարող պատկերացնել գիտակից եւ հաւատացեալ մարդու համար: Այլապէս մեր ինքնատեսութեամբ յոխորտալով, անհաւատութեան գիրկն ենք ընկնելու, այնպէս ինչպէս շատեր այս կեանքում միայն իրենց անձն ու անձնական շահն են տեսնում, անխնայ յափշտակելով ուրիշների ունեցւածքը, ոտնակոխելով նմանների պատիւը, զրպարտանքներով ոչնչացնելով ուրիշները համբաւն ու վաստակը: Որովհետեւ իրենց անձով են պարծենում, փոխանակ Քրիստոսով ու Նրա խաչով՝ զոհողութեամբ պարծենալու»,- շեշտեց Սրբազան Հայրը: Ապա, նա խօսեց խաչի զօրութեան մասին, որի նշանը մեր դէմքի վրայ կնքւած այնքան ուժեղ ազդեցութիւն ունի եւ փրկարար դեր:

Սուրբ պատարագից անմիջապէս յետոյ, թափօրը ուղղւեց դէպի ուխտավայրի շրջափակը, որտեղ կանգնած հսկայ մետաղեայ նոր խաչի շուրջ տեղի ունեցաւ ռեհանազարդ խաչով աւանդական անդաստան:

Նշենք, որ Թաւրիզի եկեղեցիների Կանանց Խնամակալ մարմինը կէսօրւայ ճաշով պատւեց ներկաներին, որոնց շարքում էին նոյն Մարմնի հանգուցեալ ատենապետուհի Արմինէ Ստեփանեան-Նազարեանի այրին՝ Պօղոս Նազարեանն ու ընտանիքի անդամները: Սոյն ճաշը, որպէս հոգեճաշ մատուցւեց հանգուցեալ ատենապետուհիի եւ նրա դարձեալ նոր հանգուցեալ մօր՝ Յասմիկ Ստեփանեանի հոգւոց խաղաղութեան համար: «Հոգւոց» աղօթքով եւ ապա կարճ վկայութեամբ, Սրբազան Հայրը յարգեց յիշատակը նորոգ հանգուցեալների, իսկ Խնամակալ մարմնի վարչութեան եւ բոլոր անդամների անունից Էմմա Յարութիւնեանը յարգանքի խօսք ուղղեց, ի յիշատակ հանգուցեալների:

Յարակից լուրեր

  • Ատրպատականի հայոց թեմի առաջնորդի հարցազրոյցը Հունգարիայի ռատիոկայանի հետ
    Ատրպատականի հայոց թեմի առաջնորդի հարցազրոյցը Հունգարիայի ռատիոկայանի հետ

    Հինգշաբթի 14 յունւարի 2021 թ.-ին, Ատրպատականի հայոց թեմի առաջնորդ գերշ. Տ. Գրիգոր Ս. արք. Չիֆթճեան հարցազրոյց ունեցաւ Հունգարիայի ռադիոկայանի հետ, «Ատրպատականի հայոց թեմի պատմամշակութային եւ հոգեւոր ժառանգութիւնը հանդիսացող յուշարձանները եւ դրանց պահպանութեան նւիրական աշխատանքը» նիւթով: 

  • Ատրպատականի հայոց թեմի առաջնորդը Նոր տարւայ եւ Ս. Ծննդեան շնորհաւորանքներ ընդունեց
    Ատրպատականի հայոց թեմի առաջնորդը Նոր տարւայ եւ Ս. Ծննդեան շնորհաւորանքներ ընդունեց

    6 յունւարի 2021 թ.-ին, նախորդ տարիներին ընդունւած սովորութեան համաձայն, Ատրպատականի զոյգ շրջանների նահանգապետները, կուսակալներն ու քաղաքապետները չկարողացան ներկայանալ Ս. Ծննդեան պատարագին, անձամբ հաղորդելու իրենց շնորհաւորանքը Ատրպատականի հայոց թեմի առաջնորդ՝ գերշ. Տ. Գրիգոր Ս. արք. Չիֆթճեանին, ազգային իշխանութեան եւ հայ համայնքին, նկատի ունենալով Կորոնա ժահրի ստեղծած համաշխարհային համավարակի վտանգը: 

  • Ս. Ծննդեան եւ Աստւածայայտնութեան տօնը Ատրպատականի հայոց թեմում
    Ս. Ծննդեան եւ Աստւածայայտնութեան տօնը Ատրպատականի հայոց թեմում

    Երեքշաբթի 5 եւ չորեքշաբթի 6 յունւարի 2021 թ.-ին, Ատրպատականի հայոց թեմի ժողովրդի հաւատաւոր զաւակները ազգային-եկեղեցական տօների հանդէպ նախանձախնդիր գիտակցութեամբ եւ հոգեկան խաղաղութեան մեծ ակնկալիքով նշեցին Յիսուս Քրիստոսի Սուրբ ծննդեան եւ Աստւածայայտնութեան տօները: 

  • Մեր հայրենիք՝ քաղցր ու դառն մեր թշնամեաց ցանկալի…
    Մեր հայրենիք՝ քաղցր ու դառն մեր թշնամեաց ցանկալի…

    Բացւող 2021 տարւան նայենք յոյսի լուսապայծառ աչքերով, որովհետեւ Աստծոյ օրհնութեամբ եւ Նրա սուրբ Աջի հովանաւորութեամբ անպայման գալու է «հանուր կեանքի արշալոյսը վառ հագած»: Սակայն անմիջական կարիքը ունենք «պոէտներ»-ի, «որ չեն պղծել իրենց շրթերն անէծքով», որպէսզի գովեն մեր Հայրենիքի «նոր կեանքը, նոր երգերով, նոր խօսքով: Յոյսի՛ Հայրենիք, լոյսի՛ Հայրենիք, իմ նո՛ր Հայրենիք՝ հզօ՛ր Հայաստան»:

  • Ատրպատականի հայոց թեմում ընթերցւեց Արամ Ա Վեհափառի Հայրապետի 2021 տարւայ Սրբատառ կոնդակը
    Ատրպատականի հայոց թեմում ընթերցւեց Արամ Ա Վեհափառի Հայրապետի 2021 տարւայ Սրբատառ կոնդակը

    Կիրակի 27 դեկտեմբեր 2020 թ.-ին, Ատրպատականի հայոց թեմում տարիների աւանդութեան համաձայն, տարւայ վերջին եկեղեցական արարողութիւնը կատարւեց Թաւրիզի հայոց ազգային գերեզմանատան Ս. Շողակաթ եկեղեցում, որտեղ նաեւ հանդիսաւոր հոգեհանգիստ կատարւեց այս տարւայ ընթացքում մեզանից առյաւէտ բաժանւած հանգուցեալների հոգւոց խաղաղութեան համար: 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։