Print this page
05/01/2021 - 15:05

Մարդասիրութիւն չսովորեցինք դեռ…

Մարդասիրութիւն բառը նոյնիսկ չափազանց շա՜տ է մարդկանց կատարած բարիքների համար օգտագործել, որովհետեւ Աստծու անհամեմատելի մարդասիրութիւնը ջնջել է այս գաղափարի բոլոր սահմանագծերը: Ի՞նչ է նշանակում լինել Աստւած ու խոնարհւել եւ զգենուլ մարդկային բնութիւնը…: Մարդու մեղանչական ու սահմանափակ կարողականութեամբ բնութիւնը ինչպէ՞ս վերածել աստւածային անսահմանելի ու անպարագրելի բնութեան համար ընկալուչ արգանդի…:

«Ոսկի, կնդրուկ եւ զմուռս…»

(Մտ 2.11):

 

Ամանորի եւ Յիսուսի Ս. Ծննդեան ու Աստւածայայտնութեան տօները քրիստոնեայ աշխարհի համար լաւագոյն առիթներ են ուրիշին ուրախացնելու, որբեւայրուն մխիթարելու, որբի արցունքը սրբելու. մէկ խօսքով՝ լաւագոյն առիթ անելու այն՝ ինչ որ պարտաւոր ենք անել:

Սոյն պարտաւորութիւնը բնա՛ւ տարօրինակ չթւայ, որովհետեւ մարդասիրութեան օրինակը Նա ինքը հանդիսացաւ: Այլապէս, աշխարհի սկզբից ի վեր մարդկանց միջեւ գզվռտոցը, սկսեալ Կայէնի եղբայրասպան անարգ ոճիրից մինչեւ ազգերի իրար դէմ մղած արիւնալի պատերազմներն ու ոխակալ թշնամութիւնները, երբեք չէին կարող օրինակ հանդիսանալ ուրիշների նկատմամբ բարեացակամութեան, գորովանքի եւ գութի:

Մարդասիրութիւն բառը նոյնիսկ չափազանց շա՜տ է մարդկանց կատարած բարիքների համար օգտագործել, որովհետեւ Աստծու անհամեմատելի մարդասիրութիւնը ջնջել է այս գաղափարի բոլոր սահմանագծերը: Ի՞նչ է նշանակում լինել Աստւած ու խոնարհւել եւ զգենուլ մարդկային բնութիւնը…: Մարդու մեղանչական ու սահմանափակ կարողականութեամբ բնութիւնը ինչպէ՞ս վերածել աստւածային անսահմանելի ու անպարագրելի բնութեան համար ընկալուչ արգանդի…:

Յիսուսի մարդեղացումը, մարդկային պատմութեան ընթացքին մարդասիրութեան անկրկնելի օրինակն է: Սիրոյ բաժակի զեղումն է այն, ի խնդիր մոլորեալ մարդկութեան: Անհասկացող մարդն է մեղաւոր, որ Աստծու մարդեղութիւնից մինչեւ այսօր դեռեւս չի հասկանում, որ Յիսուսի ծննդեամբ մարդասիրութեան մի վառ օրինակ տրւեց իրեն երկնքից, որպէսզի ինքը եւս սովորի իր նմանի հետ գէթ խաղաղ ապրել, իսկ երբեմն անխուսափելի հակառակութիւնները՝ համերաշխութեամբ հարթել: Սակայն, ինքնասիրութիւնը ամբարտաւանութեան ընկերակցած, արգելք է հանդիսանում հաշտութեան, ոչ միայն մարդկանց, այլեւ Աստծու հետ: Մարդու ամբարտաւանութիւնը հասաւ այն աստիճանի, որ նա համարձակւեց նոյնիսկ Աստծոյ մարդասիրութիւնը թերագնահատել կամ անտեսել: Սոյն տխուր ու դժգոյն երեւոյթի փաստը այն է, որ մարդիկ մինչեւ այսօր Յիսուսի ծննդեան պահի խոնարհութիւնից դասեր չեն կարողացել քաղել: Այն՝ որ աստւածային փառքով հարուստ էր, մարդ դառնալով աղքատացաւ մեզ համար: Այն՝ որ երկինքը որպէս օթոց էր օգտագործում, անասունների մսուրի մէջ պառկեց:

Մսուրի մէջ է անթեղւած Սբ. Ծննդեան տօնին մեծ խորհուրդը: Մսուրը՝ փայտից սարքւած այն գոգն է, որտեղ հովիւը իրեն վստահւած կենդանիների համար կեր է լցնում, կերակրելու համար դրանց: Բեթղեհէմի անշուք քարայրի մսուրը եղաւ առաջին սկիհը, որտեղից բաշխւեց Յիսուսի մարմինը, ի խնդիր մեղաւոր աշխարհի փրկութեան:

Արեւելքի մեծահարուստ երեք մոգերը թանկարժէք նւէրներ մատուցեցին Յիսուսին, առանց իմանալու, որ անկարօտ է Աստւած: Սակայն, աշխարհում շա՜տ շատ են կարիքաւորները, որոնց նկատմամբ յաճախ իրեն խուլ եւ կոյր է ձեւացնում մեծամիտ մարդը: Բարեկիրթ աշխարհի աղքատախնամ կազմակերպութիւնները յատկապէս տօնական օրերին զարկ են տալիս իրենց խնամատարական շարժումների գործունէութեան եւ հոգում զրկեալների բազմազան կարիքները՝ բժշկական խնամքի, ուտեստի եւ նոյնիսկ պատսպարման: Նրանք նաեւ նւէրներով են ուրախացնում երեխաներին: Զարմանալի չթւայ, որ բոլոր երեխաները, հարուստ ընտանիքների զաւակ լինեն կամ թշւառ, նւէրներ են ակնկալում իրենց ծնողներից, եթէ ոչ միեւնոյն տեսակի ու որակի, բայց անպայման միեւնոյն սպասումով:

Բոլոր երեխաների շարքում կայ նորածին մէկ Երեխայ, որը ամենահարուստը լինելով հանդերձ անյապաղ սպասում է Իր աննման նւէրին եւ այն՝ մեզանից իւրաքանչիւրի անձնական նւիրաբերմամբ: Մոգերի ընծայած նիւթական նւէրները Նրա կողմից մեծարժէք չհամարւեցին, որովհետեւ Նա այս աշխարհից չէ:

Հոգիների թագաւորը՝ մանկացեալ Փրկիչը քո սիրտն է ուզում այսօր որպէս ընծայ, որը յանձնելու ես կամովին, ամենայն յանձնառութեամբ ու պատրաստակամութեամբ: Եթէ մսուրի մէջ է կարիքաւոր մարդկութեան հասնելու երեւելի խորհուրդը Յիսուսի անձի ինքնաբաշխմամբ իրականացւող, փոխադարձաբար նոյն մսուրի մէջ է դրւելու քո կողմից մատուցւելիք նւէրը՝ քո սիրտը: Այս պարզ արարքի գործադրումի բացակայութեան հետեւանքն է կրում համայն մարդկութիւնը, որը դեռ չի սովորել մարդասիրութեան իմաստը:

Միայն Յիսուսին ընծայւող մարդկային սիրտը կարող է սովորել աստւածային մարդասիրութեան խոր նշանակութիւնը, ինքը եւս, իր հերթին, գէթ նմանողութիւնը դառնալու համար աստւածային անկրկնելի մարդասիրութեան:

ՔՐԻՍՏՈՍ ԾՆԱՒ ԵՒ ՅԱՅՏՆԵՑԱՒ

ՁԵԶ ԵՒ ՄԵԶ ՄԵԾ ԱՒԵՏԻՍ

 

Աղօթաձայն Օրհնութեամբ՝

ԳՐԻԳՈՐ ԱՐՔ. ՉԻՖԹՃԵԱՆ

Առաջնորդ Ատրպատականի հայոց թեմի

Տօն Ս. Ծննդեան եւ Աստւածայայտնութեան

5 յունւարի, 2021

Ազգային առաջնորդարան - Թաւրիզ

Յարակից լուրեր