Հա

Համայնք

28/02/2021 - 12:10

Ատրպատականի հայոց թեմի Պատգամաւորական ժողովի հերթական նիստը գումարւեց Թաւրիզում

Ուրբաթ, 26 փետրւարի 2021 թ.-ին, առաւօտեան ժամը 11-ին, նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. արք. Չիֆթճեանի, Թաւրիզում գումարւեց Պատգամաւորական ժողովի հերթական նիստը, որը շարունակութիւն էր նախորդ նիստից:

«alikonline.ir» - Ուրբաթ, 26 փետրւարի 2021 թ.-ին, առաւօտեան ժամը 11-ին, նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. արք. Չիֆթճեանի, Թաւրիզում գումարւեց Պատգամաւորական ժողովի հերթական նիստը, որը շարունակութիւն էր նախորդ նիստից: Տեղեկացնում է Ատրպատականի ազգային առաջնորդարանը:

Ժողովի լիակատար նիստին ներկայ գտնւեց նաեւ Իրանի Իսլ. խորհրդարանում Թեհրան եւ հիւսիսային իրանահայութեան պատգամաւոր Արա Շահվերդեանը: Նիստի բացումը աղօթքով կատարւեց, որից յետոյ Թեմական խորհրդի ատենապետ Ռուբիկ Ջանանեան խօսք առնելով, հրաւիրեց Պատգամաւորական ժողովի ատենապետուհի Արմինէ Վահրամեանին, որ միասնաբար Սրբազան Հօրը յանձնեն ազգային իշխանութեան կողմից նախատեսւած յուշանւէրը, Ն.Ս.Օ.Տ.Տ. Արամ Ա Վեհափառ Հայրապետի Կոնդակով «Արքութեան» տիտղոսի շնորհման առիթով: Յուշանւէրը՝ արւեստի գործ Ձեռաց Խաչ, գործն է երիտասարդ արծաթագործ՝ Լեւոն Ջանանեանի: Ատենապետուհի Արմինէ Վահրամեանը բոլորի անունից միանգամ եւս շնորհաւորեց Սրբազան Հօրը եւ յատկապէս թեմին, Վեհափառ Հայրապետի գնահատական ուշադրութեան արժանանալու կարեւոր առիթով:

Ժողովի բացման եւ փակման առիթներով արտայայտւեց նաեւ Իսլ. խորհրդարանի պատգամաւոր Արա Շահվերդեանը: Նա փորձառութեան լոյսի տակ իր մտածումները բանաձեւելով, ազգային բոլոր ժողովների հեռակայ բարի նպատակը մատնանշեց, որը ազգային ծառայութիւնն է, ամբողջական ուժով, հաւաքական մտահոգութիւնների լուծում բերելու նախանձախնդրութեամբ:

Ժողովի օրակարգերը նախորդ նիստի շարունակութիւնը լինելով, վերատեսութեան ենթարկւեցին բացթողումները: Այնուհետեւ Թեմական խորհուրդը ներկայացրեց իր աշխատանքային ամբողջ տեւողութեան նիւթական զեկոյցը, իսկ Հաշւեքննիչ մարմնի ներկայացուցիչ Ռազմիկ Օրդուխանեանը բացատրական ելոյթով ներկայացրեց տնտեսական հաշւեկշիռը:

Նախորդ նիստից բխած որոշման հիմամբ կազմւած հաշւեքննիչ յանձնախումբը զեկոյցով հանդէս եկաւ, ներկայացնելով անցած շաբաթների ընթացքում իր կատարած հաշւեքննիչ յանձնախմբի աշխատանքի ուրւագիծը, նշելով, որ յաւելեալ ժամանակ է պահանջում աւելի մանրազնին քննութեան համար, նկատի ունենալով, որ անցեալ շրջանում Թեմական խորհրդի գործունէութեան ժամանակի երկարաձգման հետեւանքով շուրջ երեք տարիների ժամանակամիջոց է գոյառւել, որի ընթացքում եւ շինարակական հսկայական ծրագրեր են իրագործւել: Ուստի, յառաջիկայ երեք ամիսների ընթացքում, հաշւեքննիչ սոյն յանձնախումբը պատրաստակամութիւն յայտնեց մանրամասն բացատրականներով ներկայանալ ժողովին: Նկատի ունենալով Թեմական  խորհրդի  աշխատանքային  ժամկէտի  սպառւած լինելը, ժողովը համաձայնւեց, որ բոլոր գործառութիւնները տեղի ունենան Պատգամաւորական ժողովի դիւանի եւ դրա նախագահ՝ առաջնորդ Սրբազան Հօր գիտութեամբ:

Կէսօրւայ ճաշի դադարին, Թեմական խորհրդի ատենապետ Ռուբիկ Ջանանեանը եւ Պատգամաւորական ժողովի ատենապետուհի Արմինէ Վահրամեանը Սրբազան Հօր ձեռամբ Թեհրանի եւ հիւսիսային իրանահայութեան պատգամաւոր Արա Շահվերդեանին յանձնեցին ազգային իշխանութեան նախատեսած յուշանւէրը, շնորհակալութիւն յայտնելով նրան, որ միշտ զօրավիգ է կանգնում Ատրպատականի հայոց թեմին, սկսած իր պաշտօնավարութեան առաջին իսկ օրերից:

Կէսօրից յետոյ շարունակւեցին նիստերը, ամբողջացնելու համար օրակարգերը: Եզրափակիչ իր պատգամով, Սրբազան Հայրը բարձր գնահատեց բոլորի ժողովականների նախանձախնդրութիւնը, որը յոյսի աղբիւր համարեց ընդհանրապէս հայ ժողովրդի եւ յատկապէս Ատրպատականի հայոց թեմի համար: Հայրենիքից սկսեալ մինչեւ հեռաւոր գաղութներում յոյսը պակասը շեշտելով, ներկայ ժողովի ուժական եւ հզօր ոգին, նա համարեց յոյսի դուռ: Աւարտին նա շնորհակալութիւն եւ բարձր գնահատանք յայտնեց Արա Շահվերդեանին, որ բազմաթիւ այլ պարտաւորութիւնների կողքին, միշտ ներկայ է գտնւում Պատգամաւորական ժողովի նիստերին:

Սրբազան Հօր «Պահպանիչ» աղօթքով փակւեց լիակատար նիստը, երեկոյեան ժամը 7-ին:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։