Հա

Համայնք

13/07/2021 - 09:30

Վարդավառի եկեղեցական-ազգային տօնը նշւեց Ատրպատականի հայոց թեմում

Կիրակի, 11 յուլիսի 2021-ին, Ատրպատականի հայոց թեմի առաջնորդ՝ գերշ. Տ. Գրիգոր Ս. արք. Չիֆթճեան եպիսկոպոսական հանդիսաւոր ս. պատարագ մատոյց եւ քարոզեց Թաւրիզի Մարալան թաղամասում, հայոց ուխտավայր Ս. Աստւածածին մատուռում, որտեղ կանուխ ժամերից հաւաքւել էին թաւրիզահայեր:

«alikonline.ir» - Կիրակի, 11 յուլիսի 2021-ին, Ատրպատականի հայոց թեմի առաջնորդ՝ գերշ. Տ. Գրիգոր Ս. արք. Չիֆթճեան եպիսկոպոսական հանդիսաւոր ս. պատարագ մատոյց եւ քարոզեց Թաւրիզի Մարալան թաղամասում, հայոց ուխտավայր Ս. Աստւածածին մատուռում, որտեղ կանուխ ժամերից հաւաքւել էին թաւրիզահայեր: Խորանին սպասարկեցին սարկաւագաց, կիսասարկաւագաց եւ դպրաց դասերը, իսկ երգեցողութիւնը կատարեց «Կոմիտաս» երգչախումբը, ղեկավարութեամբ երաժիշտ Վարդան Վահրամեանի: Ուրմիայի Ս. Ստեփանոս ծխական եկեղեցում ս. պատարագ մատոյց եւ քարոզեց Թաւրիզի հոգեւոր հովիւ՝ արժ. Տ. Մարտիրոս քհնյ. Ղուկասեանը: Երգեցողութիւնը կատարւեց «Նարեկացի» երգչախմբի միջոցով, ղեկավարութեամբ երգեհոնահար Արտեմիս Բայրամեանի: Տեղեկացնում է Ատրպատականի ազգային առաջնորդարանը:

Թեմակալ առաջնորդը իր քարոզում, Քրիստոսի այլակերպութեան դէպքը այնքան ցանկալի համարեց այսօրւայ դժւարին պայմաններում ապրող մարդկութեան համար, «Ամէն մարդ հրաշք է սպասում ներկայ ժամանակներում երկնքից: Երկնային հրաշազօր մի երեւոյթ է ակնկալում, վերջ դրած լինելու համար ներկայ համավարակին, որ ամէն օր մարդկային կեանքեր է հնձում աշխարհի տարբեր եր կրներում: Իր առաքեալների առջեւ կերպարանափոխւած եւ արեգակնային տեսք ստացած մեր Փրկիչը չե՞նք հաւատում, որ կարող է մէկ վայրկեանում կատարել այն, ինչը մենք մեր մարդկային անզօրութեամբ չենք կարողանում կատարել երկու տարիներից ի վեր, եւ բոլորս՝ հայ, ոչ-հայ, քրիստոնեայ, ոչ-քրիստոնեայ, տառապում ենք միեւնոյն ցաւով: Բայց հաւատո՞ւմ ենք…»,- ասաց Սրբազան Հայրը:

Ս. պատարագի աւարտին, եկեղեցու բակում տեղի ունեցաւ Վարդավառի ազգային աւանդութիւնը՝ իրարու վրայ ջուր ցանելու սովորութիւնը: Յատկապէս երիտասարդներ ու երեխաներ ջուր էին լցնում բոլորի վրայ, որը վերջում ընդհանրական խաղի տեսք ստացաւ, ներքաշելով բոլորին:

Թաւրիզի եկեղեցու Խնամակալ մարմինի անդամուհիները թէյով եւ խմորեղէնով պատւեցին հոգեւորականաց դասին եւ ազգային իշխանութեանը: Ուրմիայի եկեղեցում Վարդավառի սուրբ պատարագին ներկայ գտնւեց հաւատացեալ ժողովուրդը, որ երկրում տիրող առողջապահական դժւար դրութեան բերմամբ երկար ժամանակից ի վեր հեռու էր մնացել եկեղեցական արարողութիւններից եւ ազգային տօնախմբութիւններից:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։