Հա

Համայնք

20/07/2021 - 11:30

Ատրպատականի հայոց թեմի նորընտիր Թեմական խորհրդի հանդիպումը «Ալիք» հաստատութեան Թաւրիզի գրասենեակի հետ

Երկուշաբթի 19 յուլիսի 2021 թ.-ի երեկոյեան ժամը 7.30-ին, գլխաւորութեամբ Ատրպատականի հայոց թեմի առաջնորդ գերշ. Տ. Գրիգոր Ս. արք. Չիֆթճեանի, նորընտիր Թեմական խորհուրդը այցելեց Թաւրիզում «Ալիք» հաստատութեան գրասենեակը եւ հանդիպում ունեցաւ պատասխանատու կազմի հետ: 

«alikonline.ir» - Երկուշաբթի 19 յուլիսի 2021 թ.-ի երեկոյեան ժամը 7.30-ին, գլխաւորութեամբ Ատրպատականի հայոց թեմի առաջնորդ գերշ. Տ. Գրիգոր Ս. արք. Չիֆթճեանի, նորընտիր Թեմական խորհուրդը այցելեց Թաւրիզում «Ալիք» հաստատութեան գրասենեակը եւ հանդիպում ունեցաւ պատասխանատու կազմի հետ: Տեղեկացնում է Ատրպատականի ազգային առաջնորդարանը:

Շուրջ մէկ ժամ տեւած հանդիպման ընթացքին նախ փոխանակւեցին շնորհաւորական խօսքեր առաջնորդ Սրբազանի, Թեմական խորհրդի ատենապետ Գագիկ Ջորջեանի եւ նրա գործընկերների, ինչպէս նաեւ «Ալիք» հաստատութեան պատասխանատու անդամներ՝ Արմոնդ Բադալեանի, Նայիրի Դիլանեանի եւ Մարտիկ Շահմուրադեանի միջեւ:

Իր նախաձեռնած հանդիպումների նպատակը ներկայացնելով, նորընտիր Թեմական խորհրդի ներկայ անդամներ՝ Գագիկ Ջորջեանը, Վարդան Կարապետեանը եւ Քաթրին Դիլանեանը յայտնեցին, որ փոխադարձ ծանօթացումից հեռու, միասնական գործակցութեան եւ թեմի կեանքը աւելի արդիւնաւէտ դարձնելու միտումը ունի:

Սրբազան Հայրը յայտնեց, որ իր ընտրութեան առաջին օրւանից, նոր Թեմական խորհուրդը համակարգում է յառաջիկայ գործունէութեան աշխատանքը, որի համար հրաւիրում է բոլոր կազմակերպութիւններին եւ միութիւններին համագործակցութեան, ի խնդիր Ատրպատականի պատմականագոյն թեմի պահպանութեան եւ վերելքին:

«Ալիք» հաստատութեան Թաւրիզի գրասենեակի պատասխանատուներից երկուսը՝ Արմոնդ Բադալեանն ու Նայիրի Դիլանեանը, որոնք արդէն թեմի Պատգամաւորական ժողովում իրենց դրական գործունէութեամբ ծառայում են ազգին, նոր հեռանկարներ ուրւագծեցին Թեմական խորհրդի ինչպէս նաեւ «Ալիք» հաստատութեան յառաջիկայ գործունէութեան համար, փոխադարձ պատրաստակամութիւն յայտնելով անվերապահ աջակցութեան:

Սրբազան Հայրը բարձր գնահատեց «Ալիք»-ի ծաւալած գործունէութիւնը Թաւրիզում, որի բացայայտ արտայայտութիւններից էր մանկա-պատանեկան երգչախմբի կազմութիւնը, որը իր ելոյթներով նոր յոյս էր ներշնչել թեմին, երիտասարդական աւիւնով հզօրացնելով համայնքային կեանքի մշակութային բնագաւառը: Այս գծով նա մի քանի նոր առաջարկներ ներկայացրեց, որոնք բացառապէս Ատրպատականում ապրող հայերի առանձնաշնորհը կարող են լինել, եւ ըստ այնմ արժեւորւել համայն հայութեան կողմից:

Հանդիպման մասնակցող բոլոր ազգային գործիչների մտահոգութիւնը հասարակաց գիծ ունէր՝ ամրապնդել թեմի գոյութեան պահպանումը, ի խնդիր նոր սերնդի առողջ դաստիարակութեան, հոգեւոր ու ազգային արժեչափերով կազմաւորելու համար հայ երիտասարդութիւնը:

 

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։