Հա

Համայնք

28/08/2021 - 14:30

Ատրպատականի հայոց թեմը գումարեց իր Պատգամաւորական ժողովի հերթական նիստը

Նորընտիր Թեմական խորհրդի գործունէութեան առաջին եռամսեակի աւարտին, ուրբաթ, 27 օգոստոսի 2021 թ.-ի առաւօտեան ժամը 10.30-ին, նախագահութեամբ Ատրպատականի հայոց թեմի առաջնորդ գերշ. Տ. Գրիգոր Ս. արք. Չիֆթճեանի, Թաւրիզի ազգային առաջնորդարանում գումարւեց Պատգամաւորական ժողովի 21-րդ նստաշրջանի հերթական 8-րդ նիստը:

«alikonline.ir» - Նորընտիր Թեմական խորհրդի գործունէութեան առաջին եռամսեակի աւարտին, ուրբաթ, 27 օգոստոսի 2021 թ.-ի առաւօտեան ժամը 10.30-ին, նախագահութեամբ Ատրպատականի հայոց թեմի առաջնորդ գերշ. Տ. Գրիգոր Ս. արք. Չիֆթճեանի, Թաւրիզի ազգային առաջնորդարանում գումարւեց Պատգամաւորական ժողովի 21-րդ նստաշրջանի հերթական 8-րդ նիստը: Տեղեկացնում է Ատրպատականի ազգային առաջնորդարանը:

Սրբազան Հօր միջոցով կատարւած բացման աղօթքից յետոյ, Պատգամաւորական ժողովի ատենապետուհի Արմինէ Վահրամեանը բարի գալուստ մաղթեց ժողովականութեան, ազգային գործունէութեան նոր յոյսերի եւ նորանոր ծրագրաւորումների բարեմաղթանք ներկայացնելով: Ատենապետուհին յատկապէս շեշտեց միասնական գործունէութեան անհրաժեշտութիւնը, յատկապէ ներկայ ժամանակներին:

Ապա, Սրբազան Հայրը իր խօսքը ուղղելով ներկայ ժողովականութեան, նախ ողջունեց նորընտիր Թեմական խորհրդի ներկայութիւնը եւ օրհնելով նրանց աշխատանքի ուղին ասաց. «Անձնապէս վկայում եմ այն դրական ուժականութեան մասին, որը նորընտիր Թեմական խորհուրդը ներարկում է ազգային մեր կեանքի, հակառակ համավարակի այս դժւարին ժամանակահատւածի սահմանափակումներին»,- ասաց Սրբազան Հայրը, վկայելով Թեմական խորհրդի առաջին շուրջ չորս ամիսների հեւքոտ աշխատանքին եւ վերակազմակերպական ջանքերին. «Համայնական մեր կեանքում, ազգային մակարդակի վրայ, իւրաքանչիւր անհատ սպասումներ ունի: Ոմանք նիւթական, ոմանք բարոյական՝ քաջալերական: Մեր կեանքը շարժման մէջ դնող եւ աշխուժութիւն բերող կառոյցները, մեր միութիւններն ու կազմակերպութիւններն են, որոնք հակառակ նիւթական դժւարին պայմաններին, շարունակում են պատնէշի վրայ կանգնել: Անցնող ամիսներին Թեմական խորհուրդը յատուկ կարեւորութիւն ընծայեց մեր ազգի կեանքում գործող բոլորր կառոյցներին, այցելութիւններ տալով, խրախուսելով, հարկ եղած դէպքում օժանդակելով, որպէսզի կանգուն մնան նրանք, եւ որպէսզի կանգուն մնանք մենք բոլորս, հաւաքաբար»,- շեշտեց Սրբազան Հայրը: Ապա, անդրադառնալով Պատգամաւորական ժողովի անդամների հոգածու եւ սրտցաւ մասնակցութեան, շեշտեց լինել կարելի եղածի չափ անսխալական, թոյլ չտալու, որ հաւաքական մեր շահերը ոտնահարւեն:

Նախկին նիստի ատենագրութեան ընթերցումից եւ վաւերացումին յաջորդեց Թեմական խորհրդի կողմից նշանակւած նորընտիր կազմերի ներկայացման եւ վաւերացման օրակարգը, ինչպէս նաեւ ազգային առաջնորդարանի պաշտօնէութեան ներկայ պատկերը ամբողջութեան մէջ վաւերացնելու աշխատանքը, ներառեալ Ուրմիայի պաշտօնէութիւնը: Օրակարգի սկզբնաւորութեան խօսք առաւ Թեմական խորհրդի ատենապետ Գագիկ Ջորջեանը, շնորհակալութիւն յայտնելով այն վստահութեան, որը գաղտնի քւէարկութեամբ տրւել էր Թեմականի նոր կազմի անդամներին: Նա, իր համագործակիցների անունից խոստացաւ արդարացնել իրենց վրայ դրւած յոյսերը: Ապա, Ընտրական յանձնախմբի անդամ Նայիրի Դիլանեան ներկայացրեց նախորդ ժողովի ընթացքում Թեմական խորհրդի եւ Հաշւեքննիչ մարմնի ընտրական պատկերը, վերաթարմացնելով բոլորի յիշողութեան մէջ քւէարկութեան ժողովրդավար ընթացքը, որով կեանքի էին կոչւել Ազգային իշխանութեան սոյն երկու մարմինները:

Թեմական խորհրդի դիւանը ներկայացրեց իր եռամսեայ գործունէութեան զեկոյցը, որը ընթերցեց ատենադպիր Վարդան Կարապետեանը, իսկ ատենապետը ներկայացրեց յառաջիկայ գործունէութեան նախահաշիւը: Ժողովը գնահատեց ցարդ կատարւած աշխատանքը, յատկապէս շեշտելով մարդուժի այնքան փնտռւած ճիգը, որը ներկայ Թեմական խորհուրդը ի սպաս է դնում ազգային ծառայութեան գործին:

Վերոյիշեալ օրակարգի ուղղակի շարունակութիւնը եղաւ Թեմական խորհրդի յառաջիկայ գործունէութեան ներկայացումը, իր հոգեւոր, ազգային, կրթական, մշակութային, համայնքային, կալւածային եւ շինարարական բազմաբնոյթ բնագաւառներով, որոնք լայնածաւալ աշխատանք են ենթադրում:

Դիւանը, ժողովավարութեամբ Ա. եւ Բ. ատենապետների՝ Արմինէ Վահրամեանի եւ Սաքօ Մեջլումեանի, ինչպէս նաեւ մասնակցութեամբ Ա. եւ Բ. ատենադպիրների՝ Անահիտ Յակոբեանի եւ Սարինէ Մեջլումեանի, ներկայ ժողովականութեան մտքերը ամփոփեցին, լաւագոյն ուղեցոյց հանդիսանալով Թեմական խորհրդի յառաջիկայ գործունէութեան պատկերի բիւրեղացման: Վերջին՝ հաշւական օրակարգում, նախահաշիւի պարզաբանման ծիրից ներս քննարկւեցին նախորդ Թեմականից առկախ մնացած բաց հաշիւներ: Մասնաւոր զեկուցումով հանդէս եկաւ Պատգամաւորական ժողովից յատկապէս ընտրւած հաշւեխոյզ մարմնի անդամ Գագիկ Յարութիւնեան, որ իր համագործակիցների՝ Սերժիկ Մովսէսեանի, Սաքօ Մեջլումեանի եւ Արմոնդ Բադալեանի անունից ներկայացրեց իրենց կատարած քննարկումի արդիւնքը, որը դեռեւս պարզաբանման աշխատանք է պահանջում: Ժողովականները լայնօրէն քննարկեցին օրակարգի սոյն բաժինը, նկատի ունենալով, որ շինարարական աշխատանքների հաշւական պատկերը առաւել յստակեցում է պահանջում: Ուստի սոյն աշխատանքը հետապնդելու պարտականութիւնը միասնաբար կատարելու են վերոյիշեալ յանձնախումբը եւ նորնըտիր Թեմական խորհուրդը:

Եզրափակիչ եւ օրհնութեան խօսքով, Սրբազան Հայրը գնահատեց այն նոր ու շինիչ մթնոլորտը եւ փոխադարձ վստահութեան նոր շունչը, որը բացայայտօրէն զգալի է բոլոր մասնակիցների մօտ, որոնցից իւրաքանչիւրը ջանք չի խնայում ի շահ Ատրպատականի հայոց թեմին եւ ընդհանրապէս մեր ազգին իր ծառայութիւնը մատուցելու: Ժողովը փակւեց երեկոյեան ժամը 5-ին Սրբազան Հօր «Պահպանիչ» աղօթքով: Կէսօրին, սրահի ընդունարանում բոլոր ժողովականները միասնաբար ճաշեցին, սիրոյ սեղանի շուրջ:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։