Հա

Համայնք

26/09/2021 - 11:40

Ատրպատականի հայոց թեմի առաջնորդը վերամուտի առիթով իր օրհնութիւնը տւեց թեմի չորս կրթօջախներին

Շաբաթ, 25 սեպտեմբերի 2021 թ.-ին, ուսումնական-կրթական վերամուտի առիթով, Ատրպատականի հայոց թեմի առաջնորդ գերշ. Տ. Գրիգոր Ս. արք. Չիֆթճեան յատուկ պատգամ յղեց Ատրպատականի հայոց թեմում գործող չորս կրթօջախների տեսչութեանց, հոգաբարձական եւ ուսուցչական կազմերին, ծնողական խորհուրդներին եւ աշակերտութեան ուղղւած, շնորհաւորելով բոլորին 2021-2022 կրթական տարեշրջանի համար մեր դպրոցների դռների վերաբացւելը:

«alikonline.ir» - Շաբաթ, 25 սեպտեմբերի 2021 թ.-ին, ուսումնական-կրթական վերամուտի առիթով, Ատրպատականի հայոց թեմի առաջնորդ գերշ. Տ. Գրիգոր Ս. արք. Չիֆթճեան յատուկ պատգամ յղեց Ատրպատականի հայոց թեմում գործող չորս կրթօջախների տեսչութեանց, հոգաբարձական եւ ուսուցչական կազմերին, ծնողական խորհուրդներին եւ աշակերտութեան ուղղւած, շնորհաւորելով բոլորին 2021-2022 կրթական տարեշրջանի համար մեր դպրոցների դռների վերաբացւելը: Տեղեկացնում է Ատրպատականի ազգային առաջնորդարանը:

Աշխարհացունց համավարակի նոր ձեւաչափերով կրթական տարին սկսւելու խիզախ քայլը գնահատելով հանդերձ, Սրբազան Հայրը պատգամում է յուսադրւել նախ Աստծու ամենազօր ու բժշկարար զօրութեամբ եւ ապա երկրի բարձրագոյն ղեկավարութեան հոգածու վերաբերմունքին. «Կրթական եւ ուսումնական տարւայ վերամուտի նորաձեւ պայմաններում ենք բացում մեր կրթական հաստատութիւնների դռները: Նախ փառք ենք տալիս Ամենակալ Աստծուն, որ առողջապահական պաշտպանութիւն է տալիս մեզ երկնային աներեւոյթ Աջը հովանի անելով մեր վրայ, եւ ապա շնորհակալ ենք Իրանի Իսլամական Հանրապետութեան հոգեւոր առաջնորդ՝ այաթ. Խամենէին եւ կառավարութեան, որ ամենադժւարին պայմաններում հովանաւորում են երկրի կրթական կառոյցներին, որպէսզի շարունակւի նոր սերնդի յառաջադիմութեան գործը»,- ասւում է Սրբազան Հօր օրհնութեան խօսքում:

Անդրադառնալով հայեցի դաստիարակութեան անփոխարինելի դերակատարութեան, Սրբազան  Հայրը գերագոյն գնահատանքով է արտայայտւում այս մասին, ասելով. «Հայոց դպրոցի միջոցով ջամբւող դաստիարակութիւնը ուղղակի շարունակութիւնն է տան մէջ մեր մայրերի կատարած դաստիարակութեան: Մեր թեմի երկու դպրոցներում՝ Թաւրիզի «Թամարեան-Սահակեան-Ասադի» եւ Ուրմիայի «Մասիհա» կրթական յարկերում, ինչպէս նաեւ Հայ Օգնութեան միութեան զոյգ մանկապարտէզ-նախակրթարաններում՝ Թաւրիզի «Ծերունի Գասպարեան» եւ Ուրմիայի «Նայիրի» կրթօջախներում քրիստոնէական կրօնը, հայոց լեզուն, հայ մշակոյթը եւ մեր ազգային աւանդութիւնները վառ են պահպանւում»,- գրել է Սրբազան Հայրը իր ուղերձում:

Վերջապէս, իր օրհնութիւն տալուց առաջ, ուրախութեամբ ու պարծանքով է մէջբերում Մեծի Տանն Կիլիկիոյ Վեհափառ Հայրապետ Ն.Ս.Օ.Տ.Տ. Արամ Ա կաթողիկոսի հայրական օրհնութիւնները կրթական վերամուտի առիթով, ինչպէս նաեւ հայոց կրթօջախների վերաբացումը ողջունում թեմի Պատգամաւորական ժողովի եւ Թեմական խորհրդի անունից:

Նոյն օր, կէսօրին, Սրբազան Հայրը անակնկալ այցելութիւն տւեց Թաւրիզի հայոց ազգային «Թամարեան-Սահակեան» դպրոցը եւ ընդունւեց տեսչուհի Արմինէ Վահրամեանի կողմից: Թէպէտ ուսուցչական կազմն ու աշակերտութիւնը առցանց էին կատարում իրենց դասընթացքները, սակայն Սրբազան Հայրը ուզեց անձամբ ներկայ գտնւել դպրոցում, իր քաջալերանքը յայտնելու տեսչութեան, ներկայ դժւարին պայմաններում:

Շուրջ մէկ ժամ տեւած զրոյցի ընթացքին, տեսչուհի Արմինէ Վահրամեանը բացատրութիւններ տւեց առցանց դասաւանդման մասին, ինչպէս նաեւ մի քանի օրինակներ ցուցադրեց հեռախօսի լուսապաստառի վրայից: Սրբազան Հօր եւ տեսչուհու զրոյցը ընդգրկեցին հայոց դպրոցի դիմագրաւած մարտահրաւէրները, ինչպէս նաեւ մի շարք գործնական խնդիրներ:

Նշենք, որ նոյն օր բացումը կատարւեց նաեւ Ուրմիայի հայոց ազգային «Մասիհա» դպրոցին, որտեղ ներկայ գտնւեց ԻԻՀ պատգամաւոր Արա Շահվերդեանը, ընկերակցութեամբ Պատգամաւորական ժողովի Բ. ատենապետ Սաքօ Մեջլումեանի եւ Գործակալական խորհրդի ատենապետ Վանիկ Յակոբեանսի, Թաւրիզի «Ծերունի Գասպարեան» մանկապարտէզ-նախակրթարանը, ներկայութեամբ Հ.Օ.Մ.-ի վարչութեան եւ Ուրմիայի Հ.Օ.Մ.-ի մասնաճիւղի «Նայիրի» մանկապարտէզը, հովանաւորութեամբ Ուրմիայի վարչութեան:

 

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։