Հա

Համայնք

28/11/2021 - 11:35

Հանգուցեալ Նուբար Աբրահամեանը յետմահու պարգեւատրւեց Մեծի Տանն Կիլիկիոյ կաթողիկոսութեան «Ս. Մեսրոպ Մաշտոց» շքանշանով

Հինգշաբթի, նոյեմբերի 25-ի, կ. յ. ժամը 4-ին, Թաւրիզի հայոց ազգային գերեզմանատան Ս. Շողակաթ եկեղեցում, կատարւեց թաւրիզահայ ազգային գործիչ եւ ՀՕՄ-ի վաստակաշատ անդամուհի՝ Նուբար Տէր-Գրիգորեան-Աբրահամեանի յուղարկաւորութեան արարողութիւնը, նախագահութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի:

«alikonline.ir» - Հինգշաբթի, նոյեմբերի 25-ի, կ. յ. ժամը 4-ին, Թաւրիզի հայոց ազգային գերեզմանատան Ս. Շողակաթ եկեղեցում, կատարւեց թաւրիզահայ ազգային գործիչ եւ ՀՕՄ-ի վաստակաշատ անդամուհի՝ Նուբար Տէր-Գրիգորեան-Աբրահամեանի յուղարկաւորութեան արարողութիւնը, նախագահութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի: Տեղեկացնում է Ատրպատականի ազգային առաջնորդարանը:

Եկեղեցական արարողութեան աւարտին, «Ալիք» հաստատութեան Թաւրիզի մասնաճիւղի խօսքը ընթերցեց եւ հանգուցեալ տկն. Նուբարի կենսագրական գծերին անդրադարձաւ վարչութեան անդամ Նայիրի Դիլանեանը, ով նշեց. «Դեռեւս երիտասարդ տարիքում, աւելի քան 60 տարիներ առաջ իր ընտանիքի կողքին նա ընտրում է առաւել մեծ մի ընտանիք եւ անցնում է Հայ Յեղափոխական Դաշնակցութեան շարքերը եւ դրանից յետոյ այդ երկուսը շաղկապւած միմեանց դառնում է ընկեր Նուբարի կեանքի նւիրական սկզբունքը եւ կազմակերպական կեանքում իր կարելին չի խնայում ու միեւնոյն ոգով էլ դաստիարակում է իր զաւակներին, որոնք եւս դառնում են ազգային-հասարակական եւ միութենական կեանքի գործուն անդամներ: Նա նոյն թւերին անդամակցել է ՀՕՄ-ի Ատրպատականի մասնաճիւղին եւ ապա վարչական պատասխանատու անդամուհիի պաշտօնն է ստանձնել երկար տարիներ, տեղին է յիշատակել, որ ՀՕՄ-ուհի եւ գաղափարական Նուբար Աբրահամեանը ոչ միայն լոկ ներկայութիւն էր այդ կառոյցում ու դրա միջոցառումներում, այլ գործուն մասնակցութիւն»:

Սրբազան Հայրը դամբանական ճառով հանդէս եկաւ, վեր հանելով հանգուցեալ տկն. Նուբարի մարդկային, մայրական, ազգասիրական եւ ծառայական առաքինութիւնները: Սրբազան Հայրը յատկապէս նշեց, որ. «Այսօր վերջին հրաժեշտ ենք տալիս մի անձնաւորութեան, որ շուրջ 50 տարիներ իր կեանքը միախառնեց ազգային կեանքին, անսակարկ նւիրումով ու ծառայութեան բարձր գիտակցութեամբ: Նա միայն մայրը չեղաւ իր ընտանիքին, այլեւ իր պատկանած կուսակցութեան եւ ՀՕՄ-ի բոլոր երեխաները՝ նոր կազմաւորւող սերունդը իր զաւակները համարեց»: Ապա, Սրբազան Հայրը շեշտեց այն գաղափարը, որ մարդու անմահութիւնը սկսւում է այս աշխարհից, իր նմանի հանդէպ ցուցաբերած սիրոյ, հոգածութեան եւ նւիրումի գործնական արտայայտութիւններից. «Մարդիկ ինչպէ՞ս են անմահանում: Այս կեանքից միւս կեանք անցնելու պահը չէ՛ անմահութիւնը: Քրիստոնէական մեր կրօնը պայման է դնում մեր աներկբայ հաւատքը Աստւածորդու ճանաչողութեան, հասնելու անմահութեան: Սակայն առաքեալը մեկնաբանում է այս պայմանը ասելով, որ քո եղբայրը, որը տեսնում ես եւ չես սիրում, ինչպէ՞ս ասում ես, թէ աներեւոյթ Աստծուն ճանաչում ես եւ սիրում…: «Բարի վարմունքի, խնամատարութեան եւ անձնդիր ծառայութեան օրինակ հանդիսացաւ հանգուցեալ տիկին Նուբարը թաւրիզահայ մեր համայնքում, որի համար Ն.Ս.Օ.Տ.Տ. Արամ Ա կաթողիկոս ընդառաջելով մեր խնդրանքին, Մեծի Տանն Կիլիկիոյ կաթողիկոսութեան «Ս. ՄԵՍՐՈՊ ՄԱՇՏՈՑ» շքանշանով պարգեւատրելու պարտականութիւնը յանձնել էր մեզ: Դժբախտաբար իր առողջութիւնը չներեց, որ հրապարակային հանդիսութեամբ Վեհափառ Հայրապետի իրեն ընծայած պատիւը բոլորի ներկայութեամբ կատարէինք եւ անողոք մահը վրայ հասաւ: Այս պահին, առ ի մխիթարութիւն իր զաւակներին՝ Գառնիկին, Նժդիկին եւ Հենրիկին, նրանց ընտանիքներին եւ բոլոր հարազատներին, Նորին Սրբութեան ուղարկած շքանշանը յետմահու շնորհում ենք Նուբար Աբրահամեանին»,- ասաց Սրբազան Հայրը եւ շքանշանը փակցրեց հանգուցեալի դագաղի վրայ:

Նուբար Տէր-Գրիգորեան-Աբրահամեանը ծնւել էր Ղարադաղի Ղշլաղ գիւղում 1938 թ.-ին: Ղարադաղի հայաթափման պատճառով, փոքր տարիքում ընտանիքով փոխադրւել են Թաւրիզ եւ կարճ ժամանակ անց հաստատւել Թեհրանում: 1957-ին ամուսնանալով դարձեալ ղշլաղցի Հրանտ Աբրահամեանի հետ Թաւրիզ է փոխադրւում, ընտանիք կազմում Թաւրիզում եւ շատ երիտասարդ տարիքից ուխտելով, անդամագրւում ազգային ծառայութեան նւիրական աշխատանքին:

Հանգուցեալի թաղումը կատարւեց Թաւրիզի հայոց ազգային գերեզմանատնում եւ դին ամփոփւեց իր ամուսնու՝ Հրանտ Աբրահամեանի տապանաքարի կողքին, Հայ Յեղափոխական Դաշնակցութեան պանթէոնում:

 

Յարակից լուրեր

  • Սրբապատկերի օծում Ուրմիայի Ս. Ստեփանոս եկեղեցում
    Սրբապատկերի օծում Ուրմիայի Ս. Ստեփանոս եկեղեցում

    Ուրբաթ, 14 յունւարի 2022 թ.-ին, կէսօրից յետոյ ժամը 4-ին, Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը սրբապատկերի օծում կատարեց Ուրմիայի Ս. Ստեփանոս ծխական եկեղեցում, յընթացս երեկոյեան ժամերգութեան:

  • Ս. Ծննդեան եւ Աստւածայայտութեան տօնը Ռահւա գիւղի Ս. Աստւածածին հնադարեայ եկեղեցում
    Ս. Ծննդեան եւ Աստւածայայտութեան տօնը Ռահւա գիւղի Ս. Աստւածածին հնադարեայ եկեղեցում

    Ուրբաթ, 14 յունւարի 2022-ին սուրբ պատարագով, ջրօրհնէքով եւ ժողովրդական հաւաքով նշւեց Սուրբծննդեան եւ Աստւածայայտնութեան տօնը Ռահւա գիւղի հնադարեայ Սուրբ Աստւածածին եկեղեցում: Առաւօտեան ժամը 10.30-ին, գիւղ ժամանեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը, եւ գիւղի աւանդութեան համաձայն աղ ու հացով ընդունւեց եկեղեցու մուտքին, Հոգաբարձութեան եւ Խնամակալ մարմնի անդամների կողմից:

  • Ս. Ծննդեան եւ Աստւածայայտնութեան տօնը Ատրպատականի հայոց թեմում
    Ս. Ծննդեան եւ Աստւածայայտնութեան տօնը Ատրպատականի հայոց թեմում

    Համայն աշխարհի մարդկութեան դիմագրաւած ներկայ առողջական, հասարակական ու մանաւանդ հայ ազգի առջեւ ծառացած դժւարին պայմաններում Սուրբծննդեան տօնի խորհուրդը վերլուծելով, Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը իր պատգամը ուղղեց թեմի ժողովրդին, աշխարհի խաղաղութեան եւ համայն մարդկութեան առողջութեան համար աղօթք բարձրացնելով առ Աստւած: 

  • Ծնւեց, ուրեմն փրկելու է…
    Ծնւեց, ուրեմն փրկելու է…

    Աստծու փրկագործական ծրագիրը մարդկային սովորական մտքի ծրագրի նման չէ, որը անկայուն է եւ միշտ փոփոխութիւնների ենթակայ, մարդու յեղյեղուկ նկարագրի պատճառով: Յատուկ նպատակով ծնւած եւ մարդացեալ Աստւածը անպայման փրկելու էր իր իսկ ստեղծած մարդկութիւնը: Փրկչի ծննդեան թւականից մինչ այսօր քիչ չեն եղել պատերազմներ, աւերածութիւններ, կոտորածներ, հիւանդութիւններ, նոյնիսկ համաճարակներ, որոնց ժայթքող լաւան իր հրաշունչ որովայնի մէջ էր կլանել եւ ածխացրել բիւրաւորներին:

  • «Իրանը օրինակելի օրինակ է փոքրամասնութիւնների նկատմամբ յարգանքի եւ սիրոյ». Գրիգոր արք. Չիֆթճեան
    «Իրանը օրինակելի օրինակ է փոքրամասնութիւնների նկատմամբ յարգանքի եւ սիրոյ». Գրիգոր արք. Չիֆթճեան

    Կիրակի, 2 յունւարի 2022 թ.-ի երեկոյեան ժամը 4.30-ին, Ուրմիայի քրիստոնեայ համայնքներին ի պատիւ կազմակերպւած Ս. Ծննդեան ընդունելութեան մասնակցեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը: Հանդիսութիւնը տեղի ունեցաւ նեստորական ասորիների «Ս. Մարիամ» եկեղեցու հանդիսասրահում

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։