Հա

Համայնք

25/12/2021 - 11:20

Ատրպատականի հայոց թեմի առաջնորդը ընդունեց Ղոմի կրօնագիտական կենտրոնի փոխ-տնօրէնի այցը

Հինգշաբթի, 23 դեկեմբերի 2021 թ.-ի առաւօտեան ժամը 10-ին, Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը ազգային առաջնորդարան «Էմիլ Յակոբեան» դահլիճում ընդունեց Ղոմի կրօնագիտական կենտրոնի տնօրէն այաթ. Ահրաֆի փոխանորդ՝ այաթ. Ամինդինի այցը: 

«alikonline.ir» - Հինգշաբթի, 23 դեկեմբերի 2021 թ.-ի առաւօտեան ժամը 10-ին, Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը ազգային առաջնորդարան «Էմիլ Յակոբեան» դահլիճում ընդունեց Ղոմի կրօնագիտական կենտրոնի տնօրէն այաթ. Ահրաֆի փոխանորդ՝ այաթ. Ամինդինի այցը: Բարձրաստիճան հիւրին ընկերակցում էին նրա երկու օգնական կրօնաւորները, Թաւրիզի ուրբաթօրեայ աղօթապետ այաթ. Ալէ-Հաշեմի ներկայացուցիչ կրօնաւորը, Արեւելեան Ատրպատականի Իսլամական մշակոյթի կենտրոնի ընդհ. տնօրէն դոկտ. Սէյէդ Նազեմի եւ փոքրամասնութիւնների գրասենեակի պատասխանատուները: Տեղեկացնում է Ատրպատականի ազգային առաջնորդարանը:

Սրբազան Հօր կողքին սոյն հանդիպմանը ներկայ գտնւեցին Թաւրիզի հոգեւոր հովիւ արժ. Տ. Մարտիրոս Քհնյ. Ղուկասեանը, Թեմական խորհրդի անդամները՝ ատենապետ Գագիկ Ջորջեանը, Ալէն Սայեադեանը, Հենրիկ Աբրահամեանը եւ Վարդան Կարապետեանը:

Ողջոյնի խօսքով հանդէս եկաւ Սրբազան Հայրը, անդրադառնալով աստւածային կրօնների իւրայատուկ դերակատարութեան, որոնք կոչւած են յատկապէս ներկայ աշխարհի մարտահրաւէրները դիմագրաւելու եւ մարդկութեան ճիշտ ուղղութիւն ցոյց տալու. «Համաշխարհայնացումը ամէն տեսակի ցանկապատ քանդել էր մարդկային հաւաքականութեան կեանքում: Այն նոյնիսկ սպառնում էր ազգային խոր արմատներ եւ կրօնական անշրջելի հաւատալիքներ դաւանող ժողովուրդներին: Սակայն պատահեց անսպասելին: Համավարակը եկաւ վերստին կառուցելու ցանկապատեր, ոչ միայն երկրների, քաղաքների եւ թաղամասերի միջեւ, այլեւ միեւնոյն ընտանիքի անդամների միջեւ»: Սրբազան Հայրը նոյն մտածումը շարունակելով ասաց, որ հաւատացեալ մարդիկ, բոլոր կրօններից հարցնում են, թէ ի՞նչ է լինելու վերջը: Այս հարցի պատասխանը հիմնաւորելով, «Այստեղ է շեշտւում յատկապէս աստւածային կրօնների առաջնորդողի դերակատարութիւնը, ընդգծելու մարդու սահմանափակ կարողութիւնը եւ Ամենակալի անսահման զօրութիւնը»,- ասաց Սրբազան Հայրը:

Այաթ. Ամինդին, իր հերթին խօսք առնելով, կրօնների միջեւ երկխօսութեան կարեւորութիւնը շեշտեց, յատկապէս ներկայ դժւար պայմաններում ապրող մարդկութեան ուղղութիւն ցոյց տալու համար: Նա ասաց, որ աշխարհը հասկացաւ, թէ գիտութիւնը մենակ անզօր է: Այաթ. Ամինդին նաեւ յայտնեց, որ նոյնիսկ աստւածային կրօններից դուրս են եկել աղանդաւորական շարժումներ, ինչպէս Իսլամութիւնից Բոքօ Հարամի եւ ԴԱԷՇ-ի նման կազմակերպութիւններ, կամ քրիստոնէական բազմաթիւ աղանդներ,  որոնք  վնասում  են յիշեալ կրօնների վարկին: Այաթ. Ամինդին շեշտեց, թէ Ղոմի կրօնագիտական կենտրոնը այնպէս ինչպէս Իրանի Իսլամական Հանրապետութիւնում, նոյնպէս եւ աշխարհի տարբեր երկրներում կապեր է հաստատում քրիստոնեայ եկեղեցիների հետ: Այս առիթով նա կանխաւ շնորհաւորեց յունւարի 6-ի՝ Հայ Եկեղեցու Ս. Ծննդեան տօնը, մաղթելով որ ցանկալի խաղաղութիւնը եւ համերաշխութիւնը տիրապետի աշխարհին:

Նոր տարւայ եւ յառաջիկայ Սուրբ Ծննդեան տօնի առիթով շնորհաւորանքի եւ հայ համայնքի նկատմամբ զօրակցութեան արտայայտութիւններով հանդէս եկաւ Իսլամական մշակոյթի տարածման կենտրոնի տնօրէն դոկտ. Նազեմի, որը արդէն վաղուց ծանօթութիւն եւ բացառիկ յարգանք է տածում հանդէպ Արեւելեան Ատրպատականում ապրող հայութեան:

Թեմական խորհրդի ատենապետ Գագիկ Ջորջեան խօսք առնելով ողջունեց կրօնաւոր դասի եւ քաղաքական պատասխանատուների ներկայութիւնը, երախտագիտութիւն յայտնելով այն ուշադրութեան համար, որը ցուցաբերում է Իրանի պետութիւնը, յատկապէս Ատրպատականում ապրող հայերի նկատմամբ. «Ուրբաթօրեայ աղօթապետը, իր հանգուցեալ հօր օրինակով մնայուն հոգածութիւն է ցուցաբերում մեզ նկատմամբ, առիթներով այցելում հայ նահատակների ընտանիքներին: Միւս կողմից պետութեան պատասխանատուներ տարեկան եւ այլ առիթների նիւթական նպաստներով աջակցութիւն են ցուցաբերում Ատրպատականի հայոց թեմին, որոնց համար անհուն շնորհակալութիւն եւ երախտագիտութիւն ենք յայտնում»,- ասաց Ջորջեան:

Թեմական խորհրդի անդամ Հենրիկ Աբրահամեանը իր հերթին շեշտեց նահատակների եւ յատկապէս նրանց ընտանիքների հանդէպ այն բացառիկ յարգանքը, որը ցուցաբերում է Իրանի պետութիւնը, գլխաւորութեամբ երկրի Կրօնական առաջնորդի:

Հանդիպման աւարտին տեղի ունեցաւ յուշանւէրների փոխանակում: Սրբազան Հայրը այս առթիւ Ղոմի կրօնագիտական կենտրոնի մատենադարանին նւիրեց իր հեղինակած «Ուղեւորութիւն Ատրպատականի հայոց թեմում» մատենաշարի Ա եւ Բ հատորներից օրինակներ: Ապա, ներկաները միասնաբար այցելեցին ազգային առաջնորդարանի շէնքում գտնւող փոքրիկ թանգարանը եւ հնատիպների բաժանմունքը, ծանօթանալով դրանց հնադարեայ պատմութեան, ինչպէս նաեւ Թաւրիզում հրատարակւած հայերէն գրքերի բովանդակութեան:

 

Յարակից լուրեր

  • Սրբապատկերի օծում Ուրմիայի Ս. Ստեփանոս եկեղեցում
    Սրբապատկերի օծում Ուրմիայի Ս. Ստեփանոս եկեղեցում

    Ուրբաթ, 14 յունւարի 2022 թ.-ին, կէսօրից յետոյ ժամը 4-ին, Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը սրբապատկերի օծում կատարեց Ուրմիայի Ս. Ստեփանոս ծխական եկեղեցում, յընթացս երեկոյեան ժամերգութեան:

  • Ս. Ծննդեան եւ Աստւածայայտութեան տօնը Ռահւա գիւղի Ս. Աստւածածին հնադարեայ եկեղեցում
    Ս. Ծննդեան եւ Աստւածայայտութեան տօնը Ռահւա գիւղի Ս. Աստւածածին հնադարեայ եկեղեցում

    Ուրբաթ, 14 յունւարի 2022-ին սուրբ պատարագով, ջրօրհնէքով եւ ժողովրդական հաւաքով նշւեց Սուրբծննդեան եւ Աստւածայայտնութեան տօնը Ռահւա գիւղի հնադարեայ Սուրբ Աստւածածին եկեղեցում: Առաւօտեան ժամը 10.30-ին, գիւղ ժամանեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը, եւ գիւղի աւանդութեան համաձայն աղ ու հացով ընդունւեց եկեղեցու մուտքին, Հոգաբարձութեան եւ Խնամակալ մարմնի անդամների կողմից:

  • Ս. Ծննդեան եւ Աստւածայայտնութեան տօնը Ատրպատականի հայոց թեմում
    Ս. Ծննդեան եւ Աստւածայայտնութեան տօնը Ատրպատականի հայոց թեմում

    Համայն աշխարհի մարդկութեան դիմագրաւած ներկայ առողջական, հասարակական ու մանաւանդ հայ ազգի առջեւ ծառացած դժւարին պայմաններում Սուրբծննդեան տօնի խորհուրդը վերլուծելով, Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը իր պատգամը ուղղեց թեմի ժողովրդին, աշխարհի խաղաղութեան եւ համայն մարդկութեան առողջութեան համար աղօթք բարձրացնելով առ Աստւած: 

  • Ծնւեց, ուրեմն փրկելու է…
    Ծնւեց, ուրեմն փրկելու է…

    Աստծու փրկագործական ծրագիրը մարդկային սովորական մտքի ծրագրի նման չէ, որը անկայուն է եւ միշտ փոփոխութիւնների ենթակայ, մարդու յեղյեղուկ նկարագրի պատճառով: Յատուկ նպատակով ծնւած եւ մարդացեալ Աստւածը անպայման փրկելու էր իր իսկ ստեղծած մարդկութիւնը: Փրկչի ծննդեան թւականից մինչ այսօր քիչ չեն եղել պատերազմներ, աւերածութիւններ, կոտորածներ, հիւանդութիւններ, նոյնիսկ համաճարակներ, որոնց ժայթքող լաւան իր հրաշունչ որովայնի մէջ էր կլանել եւ ածխացրել բիւրաւորներին:

  • «Իրանը օրինակելի օրինակ է փոքրամասնութիւնների նկատմամբ յարգանքի եւ սիրոյ». Գրիգոր արք. Չիֆթճեան
    «Իրանը օրինակելի օրինակ է փոքրամասնութիւնների նկատմամբ յարգանքի եւ սիրոյ». Գրիգոր արք. Չիֆթճեան

    Կիրակի, 2 յունւարի 2022 թ.-ի երեկոյեան ժամը 4.30-ին, Ուրմիայի քրիստոնեայ համայնքներին ի պատիւ կազմակերպւած Ս. Ծննդեան ընդունելութեան մասնակցեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը: Հանդիսութիւնը տեղի ունեցաւ նեստորական ասորիների «Ս. Մարիամ» եկեղեցու հանդիսասրահում

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։