Հա

Համայնք

12/01/2022 - 08:10

Ամանորի խանդավառ ծրագիր Թաւրիզի հայոց ազգային դպրոցում

Թաւրիզի հայոց ազգային դպրոցը երեքշաբթի, 28 դեկտեմբերի 2021-ի կէսօրին, պետական կրթական խորհրդի ներկայացուցիչների մասնակցութեամբ դիմաւորեց Ամանորը եւ Քրիստոսի Սուրբ Ծննդեան տօնը: Ըստ սովորութեան, ծրագրում ընդգրկւած էր նաեւ Ձմեռ պապի այց, որը իր սովորութեան համաձայն տարեկան այցելութիւն տւեց դպրոց, ուրախացնելու մեծերին ու փոքրերին:

«alikonline.ir» - Թաւրիզի հայոց ազգային դպրոցը երեքշաբթի, 28 դեկտեմբերի 2021-ի կէսօրին, պետական կրթական խորհրդի ներկայացուցիչների մասնակցութեամբ դիմաւորեց Ամանորը եւ Քրիստոսի Սուրբ Ծննդեան տօնը: Ըստ սովորութեան, ծրագրում ընդգրկւած էր նաեւ Ձմեռ պապի այց, որը իր սովորութեան համաձայն տարեկան այցելութիւն տւեց դպրոց, ուրախացնելու մեծերին ու փոքրերին: Տեսչութիւնը, հոգաբարձական, ուսուցչական եւ ծնողական խորհրդի կազմերը, ինչպէս նաեւ աշակերտութիւնը, գեղեցիկ ծրագիր էին նախատեսել այս առիթով: Տեղեկացնում է Ատրպատականի ազգային առաջնորդարանը:

Սոյն ամանորեայ հանդիսութեան նախագահեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը: Հանդիսութեանը ներկայ էին նաեւ Թեմական խորհրդի անդամները, գլխաւորութեամբ ատենապետ Գագիկ Ջորջեանի: Պետական հիւրերը մեծաթիւ խմբով ներկայացել էին, գլխաւորութեամբ կրթական խորհրդի պատասխանատու դոկտ. Փիրիի:

Ամանորի գեղարւեստական ծրագրով հանդէս եկան աշակերտները, արտասանութիւններով, մեներգներով եւ խմբերգներով, որոնք ղեկավարում էր աշակերտական երգչախմբի խմբավար՝ Ռագնէտ Սաֆարեանը: Բացման խօսքը կատարեց եւ հաղորդավարի դերը ստանձնեց Էմելիա Աբրահամեանը: Հայերէն եւ պարսկերէն լեզուներով ելոյթ ունեցան աշակերտները, ինչպէս նաեւ զոյգ լեզուներով կատարեցին մեներգներ եւ խմբերգներ, արժանանալով ներկայ հայ եւ օտար հանդիսականների ջերմ ծափողջոյններին: Աշակերտների ծրագրի պատրաստութեանը մեծապէս նպաստել էր դպրոցի հսկիչ՝ Վահիկ Բարոյեանը:

Շնորհաւորական խօսքով հանդէս եկաւ եւ բոլոր ներկաներին բարեմաղթանքները կատարեց տեսչուհի Արմինէ Վահրամեանը: Տեսչուհին յատուկ խօսքով անդրադարձաւ Ամանորի իմաստին, Ծննդեան տօնի սկզբնական թւականին, որը զատորոշւում է արեւմտեան թւականից, բացատրութիւններ տւեց Ամանորի եւ Ս. Ծննդեան խորհրդանիշների՝ եղեւնիի, շարիկների, մսուրի եւ այլ իւրայատուկ զարդերի մասին, առնչելով դրանք Քրիստոսի ծննդեան եւ տնօրինական կեանքի դէպքերին:

Կրթական նախարարութեան Թաւրիզի շրջանի կրթա-դաստիարակչական խորհրդի նախագահ դոկտ. Փիրին խօսք առնելով, ջերմօրէն շնորհաւորեց բոլորին, Թաւրիզի հայոց դպրոցի միջոցով իր յարգանքը ընծայելով համայն իրանահայութեան, մաղթելով որ տարեսկզբի բարի խորհուրդն ու խաղաղութեան տօնը համաշխարհային առումով իրականութիւն դառնան: Դոկտ. Փիրին յատուկ գնահատանք յայտնեց տեսչուհի Արմինէ Վահրամեանին, որ հակառակ հանգստեան կոչւելու ստիպողութեան, դեռեւս շարունակում է նւիրումով կատարել իրեն ստահւած սոյն պաշտօնը:

Օրհնութեան խօսքով հանդէս եկաւ Սրբազան Հայրը: Նոր տարւայ եւ սուրբծննդեան տօների առիթով Սրբազան Հայրը բոլորի ուշադրութիւնը հրաւիրեց  Յիսուսի ծննդեան պահին հրեշտակների կողմից տրւած աւետիսին վրայ. «Ներկայ աշխարհի դժւարութիւնների գլխաւոր պատասխանատուն մարդն է: Երբ մարդիկ հաշտ չեն իրարու հետ, անպայման տուժելու ենք բոլորս: Պատերազմներ, անորոշութիւններ, հիւանդութիւններ, համավարակներ, մէկ պատճառ ունեն, որը մարդկանց միջեւ գոյութիւն ունեցող թշնամութիւնն է»,- ասաց Սրբազան Հայրը, յիշեցնելով, որ երկնքի դեսպանները՝ հրեշտակները մարդկանց միջեւ հաշտութիւն աւետեցին. «Ուրեմն, այնքան ատեն որ չենք լսում այդ աւետիսը մեր հոգու խորքում, տառապելու ենք բոլորս»,- շեշտեց նա, յորդորելով նայել Յիսուսի մսուրին, որտեղ տիրում է իսկական խաղաղութիւնը: Վերջապէս նա գնահատեց պետական կրթական խորհրդի հովանաւորութիւնը Թաւրիզի հայոց ազգ. դպրոցին, տեսչութեան, հոգեբարձութեան, ուսուցչական կազմին եւ ծնողական խորհրդին անխոնջ աշխատանքը եւ աշակերտութեան ներկայութիւնը:

Հանդիսութեան վերջին մասում, սրամ մուտք գործեց Ձմեռ պապը եւ իր շնորհաւորական խօսքը ուղղելուց եւ պարելուց յետոյ, նւէրներ բաշխեց փոքրերին եւ մեծերին, ժպիտներ քաղելով մեծերից, իսկ ցնծութեան հետաքրքիր արտայայտութիւններ՝ փոքրերից: 

Ծնողական խորհուրդը ձեռարւեստի նւէրներ էր նախատեսել բոլոր ներկաների համար, ինչպէս նաեւ հիւրասիրութեան քաղցրաւէնիքներ, որոնցով հիւրասիրւեցին բոլոր ներկաները:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։