Հա

Համայնք

16/01/2022 - 11:50

Ս. Ծննդեան եւ Աստւածայայտութեան տօնը Ռահւա գիւղի Ս. Աստւածածին հնադարեայ եկեղեցում

Ուրբաթ, 14 յունւարի 2022-ին սուրբ պատարագով, ջրօրհնէքով եւ ժողովրդական հաւաքով նշւեց Սուրբծննդեան եւ Աստւածայայտնութեան տօնը Ռահւա գիւղի հնադարեայ Սուրբ Աստւածածին եկեղեցում: Առաւօտեան ժամը 10.30-ին, գիւղ ժամանեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը, եւ գիւղի աւանդութեան համաձայն աղ ու հացով ընդունւեց եկեղեցու մուտքին, Հոգաբարձութեան եւ Խնամակալ մարմնի անդամների կողմից:

«alikonline.ir» - Ուրբաթ, 14 յունւարի 2022-ին սուրբ պատարագով, ջրօրհնէքով եւ ժողովրդական հաւաքով նշւեց Սուրբծննդեան եւ Աստւածայայտնութեան տօնը Ռահւա գիւղի հնադարեայ Սուրբ Աստւածածին եկեղեցում: Առաւօտեան ժամը 10.30-ին, գիւղ ժամանեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը, եւ գիւղի աւանդութեան համաձայն աղ ու հացով ընդունւեց եկեղեցու մուտքին, Հոգաբարձութեան եւ Խնամակալ մարմնի անդամների կողմից: Սրբազան Հայրը սուրբ պատարագը մատոյց, իսկ խորանին սպասարկեց արժ. Տ. Մարտիրոս քհնյ. Ղուկասեանը: Պատարագի երգեցողութիւնը կատարեց Ուրմիայի «Նարեկացի» երգչախումբը, ղեկավարութեամբ երգեհոնահար Արտեմիս Բայրամեանի: Տեղեկացնում է Ատրպատականի ազգային առաջնորդարանը:

Ս. պատարագին ներկայ գտնւեց Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, ինչպէս նաեւ հաւատացեալներ Ռահւա եւ Գեարդաբադ գիւղերից եւ Ուրմիա քաղաքից, ինչպէս նաեւ Թաւրիզից, հակառակ մառախլապատ եւ ձիւնոտ եղանակին:

«Հայր Մեր»-ից անմիջապէս առաջ, Սրբազան Հայրը Սրբալոյս Միւռոնով օծումը կատարեց Քրիստոսի ներկայացնող սրբանկարի, որը եկեղեցուն էր նւիրաբերւել ռահւացի տէր եւ տիկին Սամուէլ եւ Սեդա Բադալեանների կողմից: Ապա, Սրբազան Հայրը իր պատգամը տւեց ներկայ հաւատացեալ ժողովրդին, Աստծու յայտնութեան խորհուրդը մեկնաբանելով. «Աստւած երբ յայտնել է ինք իրեն մարդուն, մարդը վախենալու պատճառ չունի, որովհետեւ Փրկիչը իր փրկարար զօրութիւնն է յայտնում իր Ծնունդով: Այս մասին գուշակել էին մոգերը, որոնք Արեւելքից եկան, տեսած լինելով նրա աստղը երկնքում: Իսկ հրեշտակները նոյնիսկ նրա խորհրդանշական անունը տւել էին՝ «Էմմանուէլ», որը նշանակում է «Աստւած մեզ հետ»: Եթէ միշտ մեր դէմքը խաչակնքում ենք գործի սկսելուց առաջ, եւ ճանապարհ գնալուց առաջ ասում են «Աստւած մեզ հետ», ինչո՞ւ ենք դեռ վախենում: Վախենալը քրիստոնէական մեր զօրեղ հաւատքին հակառակ զգացում է»,- ասաց Սրբազան Հայրը: Իր քարոզի ընթացքին, Սրբազան Հայրը գնահատեց գիւղի Հոգաբարձութեանը, Խնամակալ մարմնին, ինչպէս նաեւ գիւղում բնակւող հաւատացեալ ժողովրդին, որոնք իրենց հաւատաւոր ներկայութեամբ եւ աղօթակցութեամբ զօրացնում են Տիրոջ հաւատացեալների խումբը:

Ջրօրհնէքից առաջ, Կարէն Մկրտիչեանը գիւղի հոգաբարձութեան անունից յայտարարեց օրւայ խաչքաւորի անունը, որ վիճակահանութեան շնորհիւ վիճակւեց փոքրիկն Քրիստեան Չարլուեանին: Ուստի եկեղեցու խորանի ծառայողական շապիկը հագնելով Քրիստեանը բարձրացաւ խորան եւ իր ձեռքին պահեց օրհնւած ջրից դուրս բերւած խաչը:

Ս. պատարագից անմիջապէս յետոյ, Սրբազան Հայրը եւ խորհրդարանի պատգամաւորը, իր ընկերակիցներով այցելութիւն տւեցին հայոց եկեղեցու հարեւանութեան մէջ գտնւող ասորական Ս. Գէորգ եկեղեցին, որտեղ Սրբազան Հայրը կատարեց կանոնական աղօթք:

Ապա եկեղեցու հոգաբարձութիւնը եւ Խնամակալ մարմինը եկեղեցու կողքի սրահում ճաշկերոյթով պատւեցին ներկայ բոլոր հաւատացեալներին: Գեղարւեստական սրտաբուխ ծրագրին մասնակցեցին Արտեմիս Բայրամեանը, Արմէն Բադալեանը եւ Հայկազ Խոշբախտեանը, որին այս առիթով Սրբազան Հայրը շնորհեց «Աշուղ Հայկազ» կոչումը: Սրբազան Հայրը իր բարձր գնահատանքը յայտնեց բոլորին, մաղթելով որ Սուրբ Ծնունդը Փրկչին օրհնի գիւղի համայն բնակչութեանը: Այս առիթով Սրբազան Հայրը նւէրներ եւ իր գրքից օրինակներ բաշխեց եկեղեցու հոգաբարձութեան ատենապետ Համօ Մկրտիչեանին, Հայկազ Խոշբախտեանին, դպրաց դասի անդամներ Արտեմիս Բայրամեանին, Օֆելիա Սայեադեանին, եւ յատկապէս գնահատեց գիւղի աւագանիի անդամ Նաթօ Չարլույեանին:

Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը խօսք առնելով, մեծ ուրախութիւն արտայայտեց Ռահւայի հայ համայնքի հետ լինելու առիթով, եւ իր պատրաստակամութիւնը յայտնեց կարելի բոլոր միջոցներով օգտակար հանդիսանալու պատմական գիւղի հայութեան, որոնք բոլորւած իրենց եկեղեցու շուրջը, քրիստոնէական իրենց կեանքն են ապրում: Պատգամաւորը շնորհաւորեց բոլորի Ամանորն ու Քրիստոսի Ս. Ծննդեան տօնը, ներկայ համավարակից շուտով փրկւելու առողջական բարեմաղթութիւններ կատարելով:

Նոյն առիթով իրենց բարեգալստեան խօսքերով հանդէս եկան եկեղեցու հոգաբարձութեան ատենապետ Համօ Մկրտիչեանը եւ գիւղի աւագանիի անդամ Սամուէլ Բադալեանը: Նա գիւղի բնակչութեան անունից իր խոր շնորհակալութիւնը յայտնեց, որ Սրբազան Հայրը 11-րդ անգամ լինելով Ս. Ծննդեան պատարագ է մատուցում գիւղում, իր օրհնանքը բաշխելով հաւատացեալներին: Համօ Մկրտիչեանը ցաւով յիշեց, որ գիւղը շատ սիրելի անձնաւորութիւններ զոհ է տւել վերջին համավարակին, որոնք այնքան գործօն դերակատարութիւն ունէին համայնական կեանքում:

Եկեղեցու հոգաբարձութեան կազմակերպութեամբ ամէն տարի Սուրբծննդեան յաջորդող շաբաթւայ ուրբաթ օրը Ռահւա գիւղում տեղի ունեցող եկեղեցական արարողութիւնը առիթ է հանդիսանում, մէկ անգամ եւս ողջունելու մեր Տիրոջ եւ Փրկչի Ծնունդը եւ Մկրտութիւնը, ինչպէս նաեւ շնորհաւորելու Նոր տարին:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։