Հա

Համայնք

16/05/2022 - 13:20

Համազգայինի Թորոնթոյի մասնաճիւղի հրաւէրով «Ատրպատականի հայոց թեմի յուշարձանները» նիւթով առցանց բանախօսեց, առաջնորդ՝ Գրիգոր արք. Չիֆթճեանը

Շաբաթ, 14 մայիսի 2022 թ.-ին, Իրանի ժամով գիշերւայ 8.30-ից մինչեւ ժամը 11-ը, առցանց բանախօսութիւն ներկայացրեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը, նիւթ ունենալով «Ատրպատականի հայոց թեմի յուշարձանները», հրաւէրով Համազգայինի Թորոնթոյի «Գլաձոր» գրական յանձնախմբի վարչութեան, Կանադա: 

«alikonline.ir» - Շաբաթ, 14 մայիսի 2022 թ.-ին, Իրանի ժամով գիշերւայ 8.30-ից մինչեւ ժամը 11-ը, առցանց բանախօսութիւն ներկայացրեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը, նիւթ ունենալով «Ատրպատականի հայոց թեմի յուշարձանները», հրաւէրով Համազգայինի Թորոնթոյի «Գլաձոր» գրական յանձնախմբի վարչութեան, Կանադա: Տեղեկացնում է Ատրպատականի ազգային առաջնորդարանը:

Սոյն եթերազրոյցին իրենց մասնակցութիւնը բերեցին սոյն գրական յանձնախմբի անդամներ, հայ մտաւորականներ, նաեւ տարբեր երկրներից: «Գլաձոր» գրական յանձնախմբի անունից բարի գալստեան եւ ողջոյնի խօսք ուղղեց Թամար Տօնապետեանը, միաժամանակ ներկայացնելով Սրբազան Հօր ամփոփ կենսագրականը: Նա միաժամանակ պատմական ներածական կատարեց Ատրպատականի շրջանի մասին, յիշելով հայոց պատմութեան յիշարժան դէպքերից մի քանիսը, ինչպէս Աւարայրի ճակատամարտը, որի աշխարհագրական վայրը այսօր Ատրպատականի հայոց թեմի տարածքում է գտնւում:

Առցանց դասախօսութեան ելոյթով, Սրբազաբ Հայրը նախ ընդհանուր ակնարկով աշխարհագրական դիրքը եւ շուրջ 800 տարւայ հնութիւն ունեցող թեմի այսօրւայ նշանակութիւնը բացատրեց ունկնդիր հասարակութեան, յատկապէս Հայաստանի անկախացումից յետոյ, դրա հետ առաջին հարեւանութեան բացառիկ իմաստը ներկայացնելով:

Անցնելով նշանակեալ նիւթին, Սրբազան Հայրը թեմի մշակութային ժառանգութիւնը հանդիսացող անշարժ գոյքի՝ չորս վանքերի՝ Ս. Թադէ, Ս. Ստեփանոս, Ծոր-Ծորի Ս. Աստւածածին եւ Դերիկի Ս. Աստւածածին վանքերի ամփոփ պատմականը ներկայացրեց, ճարտարապետական առանձնայատկութիւններից բացի, նաեւ խօսելով հայոց ազատագրական պայքարի ուղղու վրայ դրանց ունեցած կարեւորութեան:

Թանձրացեալ այս գանձերի յատկապէս ներկայի վերանորոգեալ եւ ծաղկուն իրավիճակին անդրադառնալով, Սրբազան Հայրը բարձր գնահատեց եւ հրապարակաւ իր երախտագիտութիւնը յայտնեց Իրանի պետութեան, որը Մշակութային ժառանգութեան յատուկ հիմնարկութեան եւ Իրանի հայկական եկեղեցիների պետական գրասենեակի միջոցով մասնաւոր ուշադրութիւն է դարձնում դրանց անեղծ պահպանման: Նոյն ծիրից ներս, Թաւրիզի եւ շրջակայքի, ինչպէս նաեւ Ուրմիայի եւ դրա շրջակայ հայկական գիւղերի, Սալմաստի եւ ի վերջոյ Ղարադաղի լեռնային շրջանի հայկական եկեղեցիների մասին ականատեսի թանկարժէք տեղեկութիւններ հաղորդեց Սրբազան Հայրը, որոնք բոլորը նորութիւններ էին ունկնդիր հասարակութեան համար:

Առցանց հանդիպումը վարող Թամար Տօնապետեան ընդմիջելով զրոյցը յայտնեց, որ Սրբազան Հայրը արդէն իսկ երկու հսկայածաւալ հատորների հրատարակութեամբ հայագիտութեան եւ բոլոր հետաքրքրւողների տրամադրութեան տակ է դրել Թաւրիզի, Ուրմիայի, Սալմաստի եւ Ղարադաղի ընդարձակածաւալ տարածքի բոլոր հայկական մշակութային հնութիւնները: Տօնապետեան նաեւ յայտնեց, որ սոյն մատենաշարի Գ. հատորով, որը շուտով լոյս կը տեսնի, Սրբազան Հայրը բոլորի ձեռքերում է դնելու Սալմաստից վերեւ՝ Սոմա եւ Բրադուստ գաւառների հայկական հնավայրերի պատմութիւնը եւ ներկայ իրավիճակը:

Առցանց հանդիպման երկրորդ մասը յատկացւեց հարց-պատասխանի, որի աւարտին փափագ յայտնւեց, որ Սրբազան Հօր հետ հանդիպումները կրկնւեն, աւելի եւս ծանօթանալու համար Ատրպատականի հայոց թեմի անցեալի եւ ժամանակակից պատմութեան:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։