Հա

Համայնք

25/06/2022 - 12:10

Գրիգոր արք. Չիֆթճեանի Ատրպատականի պատմութեան նւիրւած Բ հատորի շնորհանդէսը Թաւրիզում

Հինգշաբթի, 23 յունիսի 2022 թ.-ի երեկոյեան ժամը 7:30-ին, իր տեսակի մէջ իւրայատուկ հանդիսութիւն տեղի ունեցաւ Թաւրիզի ազգային առաջնորդարանի «Համազասպ Ոսկանեան» սրահում, հայ մշակոյթի գանձարկղին մէջ տեղադրելու համար թեմակալ առաջնորդի հեղինակութիւնը եղող եւ թեմի պատմութիւնը ներկայացնող «Ուղեւորութիւն Ատրպատականի հայոց թեմում հայկական յուշարձանների հետքերով» մատենաշարի Բ հատորը, նւիրւած Ղարադաղի վեց գաւառակներին: 

«alikonline.ir» - Հինգշաբթի, 23 յունիսի 2022 թ.-ի երեկոյեան ժամը 7:30-ին, իր տեսակի մէջ իւրայատուկ հանդիսութիւն տեղի ունեցաւ Թաւրիզի ազգային առաջնորդարանի «Համազասպ Ոսկանեան» սրահում, հայ մշակոյթի գանձարկղին մէջ տեղադրելու համար թեմակալ առաջնորդի հեղինակութիւնը եղող եւ թեմի պատմութիւնը ներկայացնող «Ուղեւորութիւն Ատրպատականի հայոց թեմում հայկական յուշարձանների հետքերով» մատենաշարի Բ հատորը, նւիրւած Ղարադաղի վեց գաւառակներին: Տեղեկացնում է Ատրպատականի ազգային առաջնորդարանը:

Ծրագիրը վայելում էր Թեմական խորհրդի հովանաւորութիւնը, եւ կազմակերպւել էր «Ալիք» հաստատութեան Թաւրիզի մասնաճիւղի միջոցով, նախագահութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի: Հանդիսութեան ներկայ գտնւեցին հոգեւորականաց դասի անդամներ, Պատգամաւորական ժողովի, Թեմական խորհրդի, Ուրմիայի Գործակալական խորհրդի, ազգային կազմակերպութիւնների եւ միութիւնների անդամներ, ինչպէս նաեւ հիւրեր՝ ազգային բարերարներ Ուրմիայից՝ Էդիկ Մեջլումեան, Թեհրանից՝ Էլպիս Գասպարեան-Արզումանեան եւ դոկտ. Շերլի Աւետեան՝ Իրանի Հայկական եկեղեցիների պահպանման պետական հիմնարկի տնօրէն:

Սրբազան Հայրը 2017 թ.-ին հրատարակելով վերոյիշեալ մատենաշարի հսկայածաւալ Ա հատորը, որը ընդգրկում է Թաւրիզը իր շրջակայքով, Ուրմիան իր գիւղերով, Սալմաստ գաւառը եւ յարակից տարածքները իրենց հայկական յուշարձաններով, 2021 թւին լոյս ընծայեց Բ հատորը, աւելի ընդարձակ, որը իր մէջ ամփոփում է Փայտակարան պատմական նահանգը, կամ Ղարադաղը, այսօրւան Քալէյբարի ամբողջ շրջանը, իր հայկական նախկին բազմաթիւ գիւղերով, եկեղեցիներով ու գերեզմանատներով:

Բացման խօսքը կատարեց Փաթրիշիա Դանղեանը, շեշտադրելով Ատրպատականի թեմի համար իւրայատուկ այս օրը, երբ պատմութիւնը միանգամ եւս գրւում է եւ յանձնւում պատմութեան. «Շնորհաւորելով բոլորիս նման աշխատութեան հաղորդակից լինելու մեծ պատիւը, մեր խորին շնորհակալութիւնն ենք յայտնում գերաշնորհ Սրբազան Հօրը, այսքան դժւարին աշխատանքը նախաձեռնելու, եւ սեփական բոլոր յարմարութիւններով, անցեալի մեր պատմութիւնը մեզ շնորհելու կապակցութեամբ»,- ասաց Փ. Դանղեանը:

Հաղորդավար Մոնթէ Դիլանեան բեմ հրաւիրեց «Ալիք» հաստատութեան Թաւրիզի մասնաճիւղի ներկայացուցիչ Արմոնդ Բադալեանին, օրւայ առիթով ուղերձ ընթերցելու. «Գրքերը մտքերի նաւեր են, որոնք թափառելով ժամանակի ալիքների մէջ, խնամքով տանում են իրենց թանկարժէք բեռը սերնդից սերունդ, եւ այսօր մեր սեղաններին է դրւած Ատրպատականի հայոց թեմի հայաբնակ Ղարադաղի շրջանի առեղծւածը բացող, սերունդներին նրա պատմութեան խորքերը առաջնորդող գիրքը, որը արդիւնքն է գերշնորհ Սրբազան Հօր անկոտրում կամքի, հետեւողականութեան, ամբողջական նւիրումի, տքնաջան աշխատանքի, մտաւոր անսահման հարստութեան եւ այնքան սահուն, դիւրահաղորդ գրչի, որի հեղինակման համար Սրբազան Հայրը իր անձնական հնարաւորութիւնները ի սպաս դնելով մեզ է պարգեւում մեր նախնիների կեանքին, ու դրանց անցած ճանապարհին հաղորդակից լինելու սքանչելի հնարաւորութիւնը»:

Հեղինակ Սրբազան Հօր կենսագրական տւեալները հաղորդելու հրաւիրւեց Սեդա Ֆարմանեան: Նա անդրադարձաւ մտաւորական այն կեանքին, որը անցած երեսուներկու տարիների հոգեւորական սպասաւորութեան ընթացքին ունեցել էր Սրբազան Հայրը, որպէս խմբագիր եւ աւելի քան 30 գրքերի հեղինակ:

Ազգային իշխանութեան անունից շնորհաւորանքի խօսք արտասանեց Պատգամաւորական ժողովի Ա ատենադպրուհի Անահիտ Յակոբեանը, անդրադառնալով անցած աւելի քան 10 տարիների նւիրեալ ծառայութեան, որը նոյն թափով ու եռանդով շարունակում է Սրբազան Հայրը Ատրպատականի հայոց թեմում. «Այսօր, ի զարմանս բոլորի, վերակենդանացել են բոլոր յիշողութիւնները, շնորհիւ մի անձնաւորութեան, որը Աստծու ծառան լինելու իր հոգեւոր կերպարի ներքոյ ունի հերոսի նկարագիր, եւ եղել է այն անձնուրաց ֆիդային, որ չի՛ բաւարարւել թղթերով ու վկայութիւններով: Այլ անձնապէս, իր վրայ առնելով բազմաթիւ դժւարութիւններ եւ անցնելով վտանգ սպառնացող բազում արգելքներ, նպատակադրել է իր աչքով տեսնել, ու գրի առնել բոլոր այն վայրերի մանրամասները, որոնք ժամանակին թեմի պատմութեան մաս են կազմել: Այսօր մենք մեզ շնորհաւորում ենք մեր քաջարի առաջնորդի կատարած հիասքանչ աշխատանքի արդիւնքը տեսնելով»,- ասաց Անահիտ Յակոբեան:

Իր խօսքի աւարտին, Անահիտ Յակոբեան ի լուր հանդիսականներին ընթերցեց Թեհրանի եւ Սպահանի հայոց թեմերի գերաշնորհ առաջնորդներ՝ Տ. Սեպուհ արք. Սարգսեանի եւ Տ. Սիփան եպս. Քէչէճեանի շնորհաւորանքի ուղերձները: Սեպուհ Սրբազանի ուղերձում յատկապէս ասւել էր. «Գրքի հեղինակ Սրբազան Հայրը նախանձախնդրօրէն եւ մեծ ջանասիրութեամբ հետապնդելով ուսումնասիրութեան տակ եղած շրջանը, իւրաքանչիւր վայրի, գիւղի, աւանի առնչւած նւիրական վայրերի բացայայտման, յայտնաբերման իր ճիգին մէջ, հողին ու քարին էլ կարծես հոգի ու ոգի է տւել: Երկարաշունչ եւ համբերատարութեամբ իրագործւած սոյն պատկառելի գիրքը մեր ժողովրդի պատմութեան որոշ շրջանի կեանքի պատմութիւնն է եւ հետեւաբար լրացուցիչը՝ նաեւ հայոց պատմութեան մի ժամանակահատւածին»: Սիփան Սրբազան վեր հանելով առաջնորդ Սրբազան Հօր կատարած պատմաբանասիրական աշխատանքը, շեշտում էր ասելով. «Սոյն գրքի լոկ թղթատումը, առաջին իսկ պահից, ակնբախ է դարձնում երախտարժան մի գործի հսկայածաւալ աշխատանքը՝ իր ուղեւորութիւններով, դժւարութիւններով, մարտահրաւէրներով ու մանաւանդ մանրամասն, հարուստ եւ փրկւած տեղեկութիւններով»:

Ատրպատականի նւիրւած մատենաշարի Բ հատորի մասին հանգամանօրէն անդրադարձաւ Նայիրի Դիլանեան: Կենտրոնանալով Ղարադաղի վեց գաւառակների վրայ, բանախօսը հարազատօրէն ներկայացրեց հեղինակի ուսումնասիրական եւ դաշտային աշխատանքի արդիւնք հանդիսացած հաստափոր գիրքը, ճոխացւած նորագոյն լուսանկարներով եւ արխիւային նիւթերի մատուցմամբ եւ հնագոյն փաստաթղթերից վերցւած թանկարժէք յուշերի պատկերներով. «Սոյն գիրքը մի խոր հետազօտութիւն է, որը դրւում է հայոց պատմութիւնը հետազօտողների սեղանի վրայ: Ղարադաղի գաւառակների մասին գրութիւնները միայն այնտեղերը այցելելով գրի առնւած տեղեկութիւնների: Իւրաքանչիւր գաւառակի եւ դրանց իւրաքանչիւր գիւղի ներկայացումը կատարւել է նախ եւ առաջ արխիւային նիւթերի, տեղանունների բառարանների եւ Ղարադաղի մասին եղած գրականութեան, ժամանակի մամուլի եւ քարտէզների մանրակրկիտ ուսումնասիրութեամբ, 1800-ականներից մինչեւ մեր օրերը: Գիրքը ինքնին տեղագրական, ազգագրական եւ հետազօտական մի աննախադէպ աշխատութիւն է, որը իր մեծ նպաստը պիտի բերէ հետազօտողների, պատմագրութեամբ եւ ազգագրութեամբ զբաղւող մասնագէտներին: Գիրքը մեզ առաջնորդում է մեր պատմական հայրենիքի տասնմէկերորդ նահանգը՝ Փայտակարան, եւ Ղարադաղի վեց գաւառակները՝ Քէյւան, իր 19 գիւղերով, Մեշափարա, իր 11, Մնջեւան 6, Հասանով 10 Դզմար 23, եւ Արաքսպար 13 գիւղերով, խիստ լեռնային եւ խիտ անտառային շրջանները, որտեղ հարիւրամեակներ ապրել եւ արարել են մեր ղարադաղցի նախահայրերը», ասաց Նայիրի Դիլանեանը, նշելով, որ հայկական հետքերը շատ քիչ են մնացել յիշեալ շրջաններում, աւերակների տեսքով: Ակնարկելով գիւղանուններին, բանախօսը ասաց, որ դրանք վերցւել են յիշեալ գիւղերի աշխարհագրական դիրքից, որոնք այսօր թրքերէնում նոյն իմաստը ունին թարգմանաբար: Դիլանեան գրքի կարեւորութիւնը շեշտեց նաեւ այն առումով, որ այնտեղ պատմական հին գիւղերի մասին նոր յայտնաբերումներ են կատարւել, որոնց մասին արխիւներում իսկ տեղեկութիւններ չկան: Գիւղերում բնակւող տեղացիների հետ զրոյցները եւս բացառիկ երեւոյթներ համարեց բանախօսը, դրանց արժէքը բարձր գնահատելով: «Կենցաղային կեանքի մասին գաղափար կազմելու օժանդակում է գրքում տեղ գտած հայկական տների նկարագրականները»,- ասաց բանախօսը, նաեւ խօսելով դրանց եւ եկեղեցիների ու սրբավայրերի ճարտարապետական կառոյցի մասին, ինչպէս նաեւ գերեզմանատների անյոյս իրավիճակին:

Նայիրի Դիլանեան եզրափակելով իր լայն ուսումնասիրութիւնը սոյն գրքի ներկայացման համար, ասաց. «Այն ինչ որ մեր թեմակալ առաջնորդն է կատարել մեր թեմի համար, երեւի պէտք է արձանագրել ոսկէ տառերով եւ քանդակել, մնայուն դարձնելու համար, որ այս թեմը իրենց հովւական բարձր նախագահութիւնը վայելելով, կարողացել է նաեւ վերակենդանանալ, իրենց հրատարակած գրքերի միջոցով»:

Պատգամաւորական ժողովի Բ ատենապետ Սարինէ Մեջլումեանը յանուն ուրմիահայութեան շնորհաւորանքի ուղերձ ընթերցեց, որտեղ յատկապէս ասւում էր. «Այս թեմը իր փառաւոր անցեալով, խելամիտ եւ գիտակից Առաջնորդի գլխաւորութեամբ պիտի յաջողի հասնել իր արժանավայել վերելքներին», ասաց նա, նորանոր յաջողութիւններ մաղթելով Սրբազան Հօր, նրա աստւածահաճոյ առաքելութեան ճամբի վրայ:

Շնորհաւորանքի յատուկ խօսքով ելոյթ ունեցաւ Իրանի Հայկական եկեղեցիների պահպանման պետական հիմնարկութեան տնօրէն դոկտ. Շերլի Աւետեանը, վկայելով այն նւիրեալ աշխատանքին, որը ոչ միայն սիրայօժար, այլեւ մեր պատմական ժառանգութեանց հանդէպ ունեցած իւրայատուկ սիրով կատարում է Սրբազան Հայրը: Նա յատկապէս ասաց. «Սրբազան Հօր Ատրպատականի նւիրւած երկու հատորները, ինչու չէ նաեւ բարոյագիտական թեմաներով գրքերը իմ աշխատանքի ընթացքին ինձ լինում են ուղեկից: Գիտահետազօտական հսկայական աշխատանք է այս նոր գիրքը, որը նաեւ հոգեբանական ազդեցութիւն է ունենում հայ մարդու հայրենասիրութեան վրայ»,- ասաց Շերլի Աւետեանը, խնդրելով Սրբազանից, որ ինչպէս անցեալում, նոյնպէս եւ ապագային միշտ զօրավիգ լինեն իր եւ իր աշխատակիցների աշխատանքին:

Շնորհանդէսի տպաւորիչ մասերից հանդիսացաւ սահիկների ցուցադրումը, երաժիշտ Սեւան Գասպարեանի միջոցով «Կեանք ու կռիւ» երգի զգայացունց ներդաշնակւած երաժշտութեան ուղեկցութեամբ: Լուսանկարները ներկայացնում էին Ղարադաղի գիւղերում մնացած յուշարձաններ եւ բացատրում էին այն դժւարին գործը, որը Ղարադաղում իր աւարտին էր հասցրել Սրբազան Հայրը:

Հանդիսութեան երկրորդ մասի ընթացքին եղան նաեւ շնորհաւորական այլ ուղերձների ընթերցումներ Նայիրի Դիլանեանի միջոցով, որոնք յղւել էին՝ ՀՕՄ-ի Թաւրիզի մասանճիւղ, Հ.Մ.Ա.Կ.-ի Թաւրիզի մասանաճիւղ, Թաւրիզի Հայ Համալսարանականների միութիւն, «Ռոստոմ-Գասպար» գրադարան, «Ակունք» եւ ՀՕՄ-ի «Տաթեւ» պարային համոյթների գեղարւեստական ղեկավար-բեմադրիչ՝ Կարինէ Մանուչերեանի կողմից: Նոյն առիթով եղաւ նաեւ յուշանւէրների յանձնում թեմակալ առաջնորդին, առ ի յուշ սոյն բացառիկ օրւան: Յուշանւէրներ յանձնեցին Թեմական խորհուրդը՝ ձեռամբ Հենրիկ Աբրահամեանի, որը այս առիթով արտայայտւեց Սրբազան Հօր անձի եւ նւիրեալ ծառայութեան: Նոյնպէս յուշանւէրներ յանձնեցին ազգային բարերարներ՝ Էդիկ Մեջլումեանը, Էլպիս Գասպարեանը, ՀՕՄ-ի Թաւրիզի մասնաճիւղի ներկայացուցիչ Քարմէն Աբրահամեանը, Հ.Մ.Ա.Կ.-ի Թաւրիզի մասնաճիւղի վարչութեան նախագահ Նժդիկ Աբրահամեանը, «Ալիք» հաստատութեան Թաւրիզի մասնաճիւղի ներկայացուցիչ՝ Արմոնդ Բադալեանը, «Տաթեւ» պարախմբի ներկայացուցիչ՝ Մարիա Գասպարեանը, դոկտ. Շերլի Աւետեանը եւ Սեդա Ֆարմանեանը:

Գեղարւեստական յագեցնող ծրագիր գործադրւեց, որի ընթացքին երգերով ելոյթ ունեցան Վարդան Սարգսեան եւ Ռեբեկա Սարգսեան, երգեհոնի ընկերակցութեամբ Կարէն Սարգսեանի: Վահագն Դաւթեանից երկու հատւածներով ասմունք ներկայացրեց Արսինէ Ենովքեանը, իսկ երրորդ հատւածը ասմունքեց Նայիրի Դիլանեան: ՀՕՄ-ի Թաւրիզի մասնաճիւղի «Տաթեւ» պարախումբը, ղեկավարութեամբ պարուսոյց Կարինէ Մանուչերեանի, աղջկանց առանձին եւ ամբողջ խմբի թնդացնող «Կակաչ» եւ «Եռագոյն» պարերով ելոյթ ունեցաւ, ներշնչելով բոլոր հանդիսականներին, իսկ անւանի երաժիշտ գիթառահար Սեւան Գասպարեան, մատների մոգական հպումներով նւագեց իր իսկ ներդաշնակած հայրենասիրական նւագները, հմայելով ներկաներին:

Առաջնորդ Սրբազան Հայրը սրտի խօսքը ասելու հրաւիրւելով, խորապէս յուզւած բովանդակալից ծրագրի համաչափ կշռոյթից եւ սիրազեղ մատուցումից, փառք ու գոհութիւն վերառաքեց առ Աստւած, որ իրեն տւել է ուժ ու կարողութիւն, սոյն գործը ի կատար ածելու: Սրբազան Հայրը բարձր գնահատեց բոլորի ներկայութիւնը, ազգային իշխանութեան հովանաւորութիւնը, «Ալիք» հաստատութեան կազմակերպչական աշխատանքը, եւ իւրաքանչիւր ելոյթ ունեցողի պատրաստակամութիւնը: Սրբազան Հայրը եղբայրական սիրով իր երախտիքը յայտնեց քոյր թեմերի առաջնորդ Սրբազաններին, նրանց անկեղծ ու սիրալիր խօսքերի համար, իր աշխատանքին առնչւած: Երախտիքի յատուկ խօսքով, Սրբազան Հայրը շնորհակալութիւն յայտնեց գրքի մեկենաս՝ ազգային բարերար տէր եւ տիկին Համազասպ եւ Սեդա Ոսկանեանին, «որոնք առաջին հատորի մեկենասները լինելուց յետոյ, նոյն նւիրումով եւ սիրով յանձն առին այս երկրորդ հատորի ծախսալից հրատարակութեան մեկենասութիւնը»,- ասաց Սրբազան Հայրը շեշտելով, որ շա՜տ հեղինակների գրքեր անտիպ մնացել են նրանց դարակներում, իսկ նրանց մահից յետոյ արխիւներում հանգրւանել: Նա շեշտեց, որ ինք բախտաւոր է, իր կենդանութեան օրոք հրատարակւած տեսնել իր աչքերի լոյսը խլած աշխատութիւնները: Հեղինակ Սրբազան Հայրը չմոռացաւ շնորհակալութիւն յայտնել այն անձերին, որոնք ընկերակցել էին իրեն սոյն վտանգալից ճանապարհորդութիւնների ընթացքում, նրանց շարքին՝ Արթուր Գէորգեանին, Գագիկ Յարութիւնեանին, Ռազմիկ Օրդուխանեանին, Ռազմիկ Խալաֆեանին, Դաւիթ Աբդիշոյեանին, որոնք ի գին ամէն զոհողութեան փոխն ի փոխ եւ երբեմն միշտ ներկայ էին եղել իր կողքին, չմոռանալով նրանք, ովքեր օժանդակել էին գրքի հրատարակման աշխատանքներին՝ իր եղբօրը՝ Իշխան Չիֆթճեանին, տէր եւ տիկին Համլետ եւ Ռիտա Նազարբէգեաններին: Վերջապէս նա իր որդիական շնորհակալութիւնը յայտնեց իր մօր՝ Շուշանին, որ սոյն աշխատանքի վտանգալից ճանապարհորդութիւնների յաջող ընթացման համար ծնրադիր աղօթել էր, մինչեւ Ղարադաղից իր վերադարձը, վաղ առաւօտեան ժամերին:

Սրբազան Հայրը անդրադառնալով թեմի ժամանակակից պատմութեան ընթացքում, նոյնպէս իրենց ներդրումը ունեցած նւիրեալներին, յատկապէս ասաց. «Այս պահին անուններ են տողանցում մտքումս, որոնք ինչքա՜ն նեղութիւն են քաշել մեր թեմի հայկական հետքերը ուսումնասիրելու եւ պահպանելու գործում. Ներսէս Արք. Մելիք-Թանգեան, դոկտ. Արմէն Հախնազարեան, գնդ. Էմիլ Յակոբեան, որոնց հոգին այսօր առաւել լոյս է զգենում անդենականում, տեսնելով իրենց գործի շարունակութիւնը: Դրանցից բացի կան նաեւ այս կեանքում դեռեւս ճիգ ու ջանք չխնայող անձեր, ինչպէս Ճարտարապետ Վարուժան Առաքելեան եւ դրանց ամենանորագոյնը՝ դոկտ. Շերլի Աւետեանը, որոնք ամէն գնով պատնէշի վրայ են կանգնած մեր պատմական սրբավայրերը պահպանելու գործում: Իրօք երախտապարտ պիտի լինենք բոլորին, որոնք հայի պատմութիւնը խնամում են իրենց աչքի բիբի նման»,- ասաց Սրբազան Հայրը, յաւելելով, որ մեր ազգի հակառակորդները միշտ փորձել են մեր պատմութիւնը սրբել աշխարհի երեսից. «Թշնամին մեզ ֆիզիկապէս կոտորելուց բացի, թիրախաւորում է մեր պատմութիւնը եւ դրա շօշափելի գանձերը՝ խաչքար, եկեղեցի, գերեզմանատուն:

Ատրպատականի այս լայնատարած թեմում, երբ մէկ ծայրից միւս, եթէ հեշտութեամբ կարողանանք գնալ տաս ժամ մեքենայի ճանապարհ է, մենք չենք կարող ամէն տեղ լինել, երբ այնքան ընդհանրացած են գանձախուզութեան կործանարար աշխատանքները: Սակայն, նման հրատարակութիւններով մենք կարող ենք փրկել մեր պատմութիւնը, անհերքելի փաստ դնելով աշխարհի պատմաբանների եւ քաղաքագէտների ձեռքերում: Գիրով, թուղթով, լուսանկարով փրկենք մեր ժառանգութիւնը»,- ասաց Սրբազան Հայրը:

Իր խօսքի վերջին մասում նա ասաց. «Սոյն մատենաշարը իմ կտակն է լինելու ո՛չ միայն Ատրպատականի հայոց թեմին, այլեւ ամբողջ հայոց պատմութեան: Դա ոչինչ է, բաղդատած այն անձերի կատարած աշխատանքին, որոնք եկել են ու անցել, իսկ ես փոշեհատիկ իսկ չեմ, որ արժանի լինեմ Ատրպատականի այս անգին գանձերի վրայ նստելու: Սակայն իմ կարողութեան ներած չափով շարունակելու են Գ հատորի աշխատանքը, աւարտին հասցնելու համար մատենաշարի համար նկատի առնւած գրքերը, եւ ամբողջացնելու մեր թեմի բոլոր շրջանների ուսումնասիրութիւնը»,- եզրակացրեց Սրբազան Հայրը:

Աւարտին տեղի ունեցաւ գինեձօն, երբ Սրբազան Հայրը իր կողքին ունենալով ազգային իշխանութեան ներկայացուցիչներին, ազգային բարերարներ Էդիկ Մեջլումեանին, Էլպիս Գասպարեանին, եւ գրքի մեկենաս Համազասպ եւ Սեդա Ոսկանեանի անձնական ներկայացուցիչ Ալէն Սայեադեանին, Թեմական խորհրդի ատենապետ Գագիկ Ջորջեանին, Պատգամաւորական ժողովի Ա. ատենադպիր Անահիտ Յակոբեանին եւ «Ալիք» հաստատութեան ներկայացուցիչ Արմոնդ Բադալեանին, օրհնութեան գինին լցրեց գրքի օրինակին վրայ: Գինեձօնի ոգեշնչող արարողութեան ընթացքին լսւեց «Կիլիկիա» մաղթերգը, արժ. Տ. Մարտիրոս քհնյ. Ղուկասեանի կատարմամբ եւ Սեւան Գասպարեանի ներդաշնակմամբ, գիթառի բազմաձայն նւագով:

«Պահպանիչ» աղօթքով փակւեց շնորհանդէսի տպաւորիչ ծրագիրը, որի ազդեցիկ տպաւորութեան տակ ընդերկար մնալու է իւրաքանչիւր հանդիսական:

 

Յարակից լուրեր

  • Եռօրեայ կարօտի ուխտագնացութիւն դէպի Սուրբ Թադէի վանք
    Եռօրեայ կարօտի ուխտագնացութիւն դէպի Սուրբ Թադէի վանք

    Բարձր հովանաւորութեամբ Ն.Ս.Օ.Տ.Տ. Արամ Ա կաթողիկոսի Մեծի Տանն Կիլիկիոյ եւ հանդիսապետութեամբ Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանի, 68-րդ տարին լինելով, Ատրպատականի հայոց թեմի Թեմական խորհրդի նախաձեռնութեամբ եւ կազմակերպութեամբ Վանքերի ուխտագնացութեան գործադիր յանձնախմբի, սոյն ուխտագնացութիւնը տեղի ունեցաւ 28-30 յուլիսի 2022 թ.-ին: 

  • Իրանահայ երեք թեմերի հոգեւոր առաջնորդների այցը Լիբանանում Իրանի Իսլ. Հանրապետութեան դեսպանութիւն
    Իրանահայ երեք թեմերի հոգեւոր առաջնորդների այցը Լիբանանում Իրանի Իսլ. Հանրապետութեան դեսպանութիւն

    Իրանահայ երեք թեմերի առաջնորդներ՝ գերշ. Տ. Սեպուհ Ս. արք. Սարգսեանի, գերշ. Տ. Գրիգոր արք. Չիֆթճեանի եւ գերշ. Տ. Սիփան եպս. Քէչէճեանի գլխաւորութեամբ, շաբաթ թւականիս յուլիսի 2-ին, Անթիլիասի մայրավանքում տեղի ունեցող Սրբալոյս Միւռոնի օրհնութեանը մասնակից ուխտաւորներ՝ Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, Թ.Հ.Թ. Թեմական խորհրդի ներկայացուցիչ Արմէն Նազարեանը, Թեհրանի համայնքի ազգային-բարերարներից Յովսէփ Աւետեանը, ինչպէս նաեւ Սպահանի հայոց թեմի Կրօնական խորհրդի ատենապետ Զաւէն Սիմոնեանը, Լիբանանում Իրանի Իսլ. Հանրապետութեան դեսպանութիւն կատարած այցի ընթացքում հանդիպում են ունեցել Լիբանանում ԻԻՀ դեսպան Մոհամմադ Ջալալ Ֆիրուզնիայի հետ:

  • «Ես եմ, ես կամ» պատկերագրքի շնորհանդէս
    «Ես եմ, ես կամ» պատկերագրքի շնորհանդէս

    Երէկ՝ յուլիսի 12-ին ՀՅԴ Գիւմրիի «Շիրակ Շիրւանեան» կենտրոնում տեղի ունեցաւ Համազգային հայ կրթական եւ մշակութային միութեան Երեւանի գրասենեակի կողմից հրատարակւած «Ես եմ, ես կամ» պատկերագրքի շնորհանդէսը։

  • «Արցախեան հիմնախնդիրը եւ Արցախի Հանրապետութեան արտաքին քաղաքականութիւնը» գրքի շնորհանդէսն Արցախում
    «Արցախեան հիմնախնդիրը եւ Արցախի Հանրապետութեան արտաքին քաղաքականութիւնը» գրքի շնորհանդէսն Արցախում

    Յուլիսի 6-ին Ստեփանակերտում կայացել է ԱՀ արտաքին գործերի նախարարութեան կողմից հրատարակւած «Արցախեան հիմնախնդիրը եւ Արցախի Հանրապետութեան արտաքին քաղաքականութիւնը» գրքի շնորհանդէսը: Գրքի արցախեան շնորհանդէսին ներկայ էին ԱՀ Ազգային ժողովի նախագահ Արթուր Թովմասեանը, ԱՀ պետական նախարար Արտակ Բեգլարեանը, քաղաքական, հասարակական գործիչներ: 

  • Շնորհահանդէս` Քրիստափոր Միքայէլեանի, Ռոստոմի եւ Նիկոլ Դումանի նամակներու հատորներուն
    Շնորհահանդէս` Քրիստափոր Միքայէլեանի, Ռոստոմի եւ Նիկոլ Դումանի նամակներու հատորներուն

    ՀՅԴ Լիբանանի Կեդրոնական կոմիտէի Քարոզչական յանձնախումբին կազմակերպութեամբ, երէկ` երկուշաբթի, 4 յուլիս 2022-ին, երեկոյեան ժամը 7:30-ին, «Ազդակ»-ի «Փիւնիկ» սրահին մէջ տեղի ունեցաւ պատմաբան եւ մտաւորական Երուանդ Փամպուքեանի խմբագրած «Ռոստոմի անտիպ նամակները», «Նիկոլ Դումանի նամականի» եւ «Քրիստափոր Միքայէլեանի անտիպ նամակները» հատորներուն, որոնք «Վէմ» մատենաշարին մաս կը կազմեն, շնորհահանդէսը:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։