Բացւող Նոր տարւայ սեմին, Ատրպատականի հայոց թեմի եկեղեցիներում՝ Թաւրիզում եւ Ուրմիայում մատուցւեց սուրբ եւ անմահ պատարագ, կիրակի, 1 յունւարի 2023 թ.-ին:
«alikonline.ir» - Բացւող Նոր տարւայ սեմին, Ատրպատականի հայոց թեմի եկեղեցիներում՝ Թաւրիզում եւ Ուրմիայում մատուցւեց սուրբ եւ անմահ պատարագ, կիրակի, 1 յունւարի 2023 թ.-ին: Տեղեկացնում է Ատրպատականի ազգային առաջնորդարանը:
Թաւրիզի Լիլաւա թաղամասի Ս. Սարգիս եկեղեցում, երեկոյեան ժամը 6-ին, Նոր տարւայ առաջին սուրբ պատարագը մատոյց եւ իր պատգամը տւեց Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանը: Եկեղեցական երգեցողութիւնը կատարեց «Կոմիտաս» քառաձայն երգչախումբը, ղեկավարութեամբ երաժիշտ Վարդան Վահրամեանի: Խորանին սպասարկում էին Թաւրիզի հոգեւոր հովիւ՝ արժ. Տ. Մարտիրոս քհնյ. Ղուկասեանը, բարշ. Վարդան սրկ. Տէր-Մարտիրոսեանը եւ Սեւան Ենովքեանը:
Իր մատուցած հանդիսաւոր սուրբ պատարագի ընթացքին, «Հայր մեր»-ից առաջ Սրբազան Հայրը քարոզեց, տարեգլուխը բոլոր ազգերի կեանքում կարեւոր անկիւնադարձ լինելու խորհուրդը բացատրելով: Նա յատկապէս անդրադարձաւ հոգեպէս վերանորոգւելու հրամայականին. «Ժամանակը յաւիտենական իրականութիւն է. դա անվախճան է. մարդն է, որ ժամանակի մէջ ծնւում, հասակ առնում եւ հրաժեշտ է տալիս դրան: Ուրեմն, մարդուն մնուն է, իրենց սահմանւած ժամանակը ճիշտ օգտագործել: Այլապէս ժամանակի վատնումը, աստւածապարգեւ կեանքը անիմաստ կերպով ապրելու յիմարութեան համազօր է: Քիչ չէ թիւը այն մարդկանց, որոնք մսխել են իրենց կեանքը, ուրիշների կեանքերը փչացնելու, ուրիշներու կեանքերով զբաղւելու սին գործերով, մէկդի դնելով իրենց սեփական կեանքը բարեգործութիւններով հարստացնելու շինիչ աշխատանքը: Տարեգլխի խորհուրդը, այս ամէնին անդրադառնալու եւ հոգեւին վերանորոգւելու պատգամը ունի իր մէջ»,- ասաց Սրբազան Հայրը:
Սրբազան Հայրը պատգամի երկրորդ բաժնում անդրադարձաւ մեր ժողովրդի ներկայ ժամանակների ընդհանուր կացութեան, սէրը ներկայացնելով այն զօրեղ հիմքը, որի վրայ կառուցելու ենք մեր միասնականութիւնը. «Սիրոյ բացակայութեան, միասնականութեան մասին մեր տւած բոլոր քարոզները զուր տեղ խօսած կը լինենք, իսկ սիրոյ վրայ հիմնւած միասնականութիւնը, կարող է ամէն տեսակի դժւարութեանց, անհասկացողութեանց ու հակառակութեանց դարմանը լինել»,- շեշտեց Սրբազան Հայրը, մաղթելով, որ բացւող 2023 տարին սրտերի փափկացման, խղճերի արթնացման եւ զղջման տարի լինի, աշխարհի մեծամեծ ղեկավարներից սկսեալ մինչեւ մեր սովորական անձերը:
Իր պատգամի աւարտին, Սրբազան Հայրը գօտեպնդեց Ատրպատականում ապրող հայութեան, միշտ կառչած մնալու իրենց ազգային աւանդութիւններին, առաւել եւս ծաղկեցնելով թեմի միութիւնների, կազմակերրպութիւնների եւ յանձնախմբերի կեանքը, հզօրացնելու համար հայ սփիւռքը, ի խնդիր յաւերժական հայրենիքի հզօրացման: Ս. պատարագի աւարտին, Տ. Մարտիրոս քահանան պարսկերէն լեզւով ընթերցեց Իրանի Իսլամական Հանրապետութեան Փոքրամասնութիւնների գրասենեակի տնօրէնի կողմից ուղարկւած շնորհաւորագիրը, ուղղւած առաջնորդ Սրբազանին, ազգային իշխանութեան եւ համայն Ատրպատականում բնակող հայութեան, Նոր տարւայ բարեմաղթութիւններով: Նոյն հիմնարկութիւնը նաեւ ծաղկեկողովով շնորհաւորել էր Ատրպատականի հայոց թեմին:
Ուրմիայի Ս. Ստեփանոս ծխական եկեղեցում, նոյն օրը առաւօտեան ժամը 11-ին, պատարագեց արժ. Տ. Մարտիրոս քհնյ. Ղուկասեանը: Յընթացս պատարագի, Տէր հայրը ընթերցեց թեմակալ առաջնորդի Նոր տարւայ պատգամը ի լուր հաւատացեալ ժողովրդի: Սուրբ պատարագի աւարտին, ներկայ ժողովուրդը շնորհաւորանք փոխանակեց, բարի ամանոր եւ յուսալից օրեր մաղթելով միմեանց:
