Երեքշաբթի, 24 յունւարի 2023թ.-ի կէսօրւան ժամը 12-ին, նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանի, ազգային առաջնորդարանի «Էմիլ Յակոբեան» դահլիճում հանդիպում կայացաւ Թեմական խորհրդի եւ Մշակութային ժառանգութեան կազմակերպութեան Ատրպատականի արեւելեան նահանգի տնօրէն՝ դոկտ. Համզեզադէի միջեւ, թեմի «Մելիք-Թանգեան» թանգարանի շուրջ: Հանդիպմանը ներկայ էին փոխ տնօրէն Բարզեգարը, մասնագիտական խմբի անդամներ եւ Փոքրամասնութեանց գրասենեակի տնօրէնը:
«alikonline.ir» - Երեքշաբթի, 24 յունւարի 2023թ.-ի կէսօրւան ժամը 12-ին, նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանի, ազգային առաջնորդարանի «Էմիլ Յակոբեան» դահլիճում հանդիպում կայացաւ Թեմական խորհրդի եւ Մշակութային ժառանգութեան կազմակերպութեան Ատրպատականի արեւելեան նահանգի տնօրէն՝ դոկտ. Համզեզադէի միջեւ, թեմի «Մելիք-Թանգեան» թանգարանի շուրջ: Հանդիպմանը ներկայ էին փոխ տնօրէն Բարզեգարը, մասնագիտական խմբի անդամներ եւ Փոքրամասնութեանց գրասենեակի տնօրէնը: Տեղեկացնում է Ատրպատականի ազգային առաջնորդարանը:
Ողջունելով ներկաներին, առաջնորդ Սրբազան Հայրն անդրադարձաւ այն մեծ պատասխանատւութեան, որը պատմութիւնը դրել է ազգային իշխանութեան ուսերին, պահպանելու այն ժառանգը, որը սերնդից սերունդ փոխանցւել է: Նա իր գնահատանքը յայտնեց Մշակութային ժառանգութեան պետական կազմակերպութեան, եւ յատկապէս Փոքրամասնութեանց գրասենեակի տնօրէնին, որը անցած աւելի քան 40 տարիների ընթացքում, յատկապէս երկրի անապահով տարիներին ու պարտադրեալ պատերազմի շրջանին ամբողջութեամբ համագործակցելով օրւայ հոգեւոր եւ ազգային իշխանութեան հետ, ապահով վիճակում պահպանել էր թեմի մշակութային հարստութիւնը համարւող գանձերը՝ ձեռագրերից սկսեալ մինչեւ կիրառական արւեստի հազւագիւտ նմուշները:
Յայտնենք, որ արդէն չորս տասնամեակներից ի վեր փակ վիճակում գտնւող «Մելիք-Թանգեան» թանգարանի ներկայ պահեստը խոնաւ մի վայր լինելուն, այժմ Սրբազան Հօր եւ ազգային իշխանութեան տնօրինումով, իրերը ազգային այլ շէնքի պահեստ փոխադրելու ծրագիր է մշակւել: Ճիշտ այս աշխատանքին ապահով ծրագրաւորումը կատարելու համար կայացաւ սոյն խորհրդակցական հանդիպումը ազգային առաջնորդարանում:
Թեմական խորհրդի ատենապետ Գագիկ Ջորջեանը խօսք առնելով յայտնեց, որ Պատգամաւորական ժողովի դիւանի եւ Թեմական խորհրդի միջեւ եղած համաձայնութիւնը, Սրբազան Հօր օրհնութեամբ, յարմար էր նկատել ազգային «Թամարեան» դպրոցի պահեստային բաժինը տրամադրել, թանգարանի գոյքերի ամբարման իբրեւ լաւագոյն վայր: Թեմական խորհրդի անդամներ՝ Հենրիկ Աբրահամեանի, Ալէն Սայեադեանի, Վարդան Կարապետեանի եւ Քաթրին Դիլանեանի միջոցով բացատրութիւն տրւեց շէնքի սոյն հատւածի արդէն պատրաստ լինելու մասին, յայտնելով, որ փոխադրական աշխատանքները կարող են սկսւել, ապահովական բոլոր միջոցների դասաւորումից յետոյ:
Դոկտ. Համզէզադէն խօսք առնելով, շնորհաւորեց Ատրպատականի հայոց թեմի հոգեւոր եւ ազգային իշխանութիւնը սոյն որոշման համար, ողջունեց նրանց նախանձախնդրութիւնը, հնից ժառանգւած մշակութային գանձերի առողջ պահպանման նկատմամբ, խոստանալով ամենակարճ ժամանակում կատարել փոխադրական աշխատանքը, փրկելու համար դարերից ժառանգւած գանձերը: Միաժամանակ նա խոստացաւ վերանորոգչական աշխատանքներ իրականացնել մասնագէտների միջոցով, փրկելու համար հնացած գրքերը, կտաւներն ու իւղանկարները, որոնք վերանորոգումից անմիջապէս յետոյ փոխադրւելու են իրերի նոր պահեստը:
Այս գծով Սրբազան Հայրը յիշեցրեց, որ թանգարանում ի պահ դրւած գանձերը մեծաւ մասամբ յիշատակներ են թեմի անցեալ պատմութիւնից, եկեղեցական զգեստներ եւ սպասներ, ձեռագրեր եւ հնատիպ գրքեր, կիրառական արւեստի իրեր եւ իւղանկարներ, որոնք ապագային կարելի է նաեւ ցուցադրել, երբ թանգարանի վերջնական վայրը ճշտւի եւ մասնաւոր յարմարութիւններ ստեղծւեն:
Դոկտ. Համզէզադէի պաշտօնական այցի առիթով, Սրբազան Հայրը նրան յանձնեց բիւրեղեայ յիշատակի նւէր, «Բեհզիստի» հաստատութեան պատսպարեալների ձեռամբ պատրաստւած:
Աւելի քան մէկ ժամ տեւած հանդիպման աւարտին, կողմերը համաձայնւեցին հաւաքական ջանքով շուտով իր աւարտին հասցնել փոխադրութեան աշխատանքը: Յայտնենք, որ հիւրերը առիթ ունեցան նաեւ այցելելու առաջնորդարանի յարկի տակ դասաւորւած թանգարանային փոքր բաժինը, հիանալով այն խնամքին, որը տարւում է, ի պահպանութիւն հնատիպ բազմաթիւ հատորների եւ կիրառական արւեստի նմուշների:
