Հինգշաբթի, 26 յունւարի 2023թ.-ի կէսօրին, Թաւրիզում գործող բոլոր միութիւնների եւ կազմակերպութիւնների վարչութեանց ներկայացուցիչները ժողովական հանդիպում ունեցան ազգային առաջնորդարանի «Էմիլ Յակոբեան» դահլիճում, նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանի:
«alikonline.ir» - Հինգշաբթի, 26 յունւարի 2023թ.-ի կէսօրին, Թաւրիզում գործող բոլոր միութիւնների եւ կազմակերպութիւնների վարչութեանց ներկայացուցիչները ժողովական հանդիպում ունեցան ազգային առաջնորդարանի «Էմիլ Յակոբեան» դահլիճում, նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանի: Տեղեկացնում է Ատրպատականի ազգային առաջնորդարանը:
Թեմական խորհրդի հրաւէրով տեղի ունեցած սոյն հանդիպումը նպատակ ունէր առաջիկայ ամսւայ ընթացքին տօնական առիթների աշխատանքային բաժանում կատարել, միասնական ծրագրով ներկայանալու համայնքին:
Սրբազան Հայրը ողջունելով ներկաներին, անդրադարձ կատարեց այն գեղեցիկ երեւոյթին, որը բացայայտւում է ազգային առաջնորդարանից իւրաքանչիւր անգամ հնչած կոչի դիմաց, երբ բոլոր միութիւններն ու կազմակերպութիւնները պատրաստակամ ընդառաջում են եւ ազգային միասնականութիւնը արտայայտութիւն է գտնում. «Մի երեւոյթ, որը ընդհանրապէս բացակայում է այսօր մեր ազգի կեանքում: Ամէն գլխից մի ձայն է դուրս գալիս, մինչդեռ այսօր մեր բոլորի համար էական է միասնականութիւնը»,- ասաց Սրբազան Հայրը:
Հանդիպման ընթացքին խօսք առաւ Թեմական խորհրդի ատենապետ Գագիկ Ջորջեանը, ներկայացնելով այն երկու կարեւոր ծրագրերը, որոնք մօտիկ ապագային իրականացւելու են թեմում: Առաջինը Իրանի Իսլամական Հանրապետութեան յեղափոխութեան տօնի առնչւած ձեռնարկները, որոնք ե'ւ համագաղութային հանդիսութեամբ ե'ւ իւրաքանչիւրի առանձնակի ներքին ծրագրերով տեղի են ունենալու, նախանցեալ տարիների աւանդութեան համաձայն: Երկրորդ, կարեւորութեամբ նշւեց, որ Ատրպատականը լինելով Աւարայրի ճակատամարտի աշխարհատարածքը, թեմի հին աւանդութեան համաձայն Սրբոց Վարդանանց Զօրավարաց տօնը եւս համամիութենական եւ ժողովրդային լայն խաւի մասնակցութեամբ նշւելու է, յատկապէս այս օրերին օգտւելու համար դրա ազգային միասնականութեան պատգամից: Յայտնենք, որ անցած տարի, սոյն ծրագիրը տեղի չէր ունեցել համաճարակի պատճառով, բաւարարւելով միայն եկեղեցում, սուրբ պատարագից յետոյ, ժողովրդին մատուցւած գեղարւեստական ամփոփ ծրագրով, մասնակցութեամբ Թաւրիզի հայոց «Թամարեան-Սահակեան» դպրոցի եւ Հ.Օ.Մ.-ի «Ծերունի Գասպարեան» մանկապարտէզ-նախակրթարանի աշակերտութեանց, ինչպէս նաեւ անհատ արւեստագէտների:
Ժողովական հանդիպման ընթացքին գործերի բաժանում կատարելով, միութիւնների եւ կազմակերպութիւնների վարչական ներկայացուցիչները որոշ աշխատանքներ համադրեցին տեղի վրայ, իսկ որոշ աշխատանքներ խոստացան ծրագրել իրենց միութենական առաջիկայ ժողովների ընթացքին, եւ ներկայացնել Թեմական խորհրդին:
Սրբազան Հօր «Պահպանիչ»-ով եզրափակւեց ժողովական սոյն հանդիպումը:
