Բուն Բարեկենդանի կիրակիին յաջորդող չորեքշաբթի օրը, 22 փետրւարի 2023թ.-ին, մեր եկեղեցական օրացոյցի տւած հրահանգի համաձայն, Ատրպատականի հայոց թեմի եկեղեցիներում սկսւեցին Մեծի պահոց քառասնօրեակի ժամերգութիւնները:
«alikonline.ir» - Բուն Բարեկենդանի կիրակիին յաջորդող չորեքշաբթի օրը, 22 փետրւարի 2023թ.-ին, մեր եկեղեցական օրացոյցի տւած հրահանգի համաձայն, Ատրպատականի հայոց թեմի եկեղեցիներում սկսւեցին Մեծի պահոց քառասնօրեակի ժամերգութիւնները: Տեղեկացնում է Ատրպատականի ազգային առաջնորդարանը:
Լիլաւայի հայաշատ թաղամասի Ս. Սարգիս եկեղեցում կատարւեց առաջին արարողութիւնը, նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր արք. Չիֆթճեանի, եւ ժամարարութեամբ Թաւրիզի հոգեւոր հովիւ` արժ. Տ. Մարտիրոս քհնյ. Ղուկասեանի: Սաղմոսները կատարում էր բարշ. Սեւան սրկ. Ենովքեանը: «Նայեաց սիրով»-ի բոլոր երգեցողութիւնները կատարւեցին «Կոմիտաս» երգչախմբի միջոցով, ղեկավարութեամբ երաժիշտ խմբավար Վարդան Վահրամեանի:
Մեծ պահոց հոգեւոր ճանապարհորդութեան ընթացքում երգւող շնորհալիական հոգեթով երգերն ու ինքնադաստիարակչութեան մղող աղօթքները, ինչպէս նաեւ հայ եկեղեցու ինքնանւէր եւ աղօթանւէր հոգեխօս Սուրբ Գրիգոր Նարեկացու աղօթամատեանի բառերը, անգնահատելի արժէք են քրիստոնէական մեր կեանքը առաւել եւս լուսաւորող, որոնք իւրաքանչիւր տարւայ այս ժամանակահատւածում բարոյագիտութեան դասարան են հանդիսանում հետեւողի համար:
Արեւագալի ժամերգութեան ընթացքում «Լոյս»-ի փառաբանութեան նւիրւած երգերը, իսկ «Հանգստեան» ժամերգութեան ընթացքում «Հաւատով Խոստովանիմ» աղօթքի իւրաքանչիւր հատւածն ու Նարեկացու տողերը, մարդ էակի հոգում վառում են հաւատքի այն լոյսը, որը կարեւոր դերակատարութիւն կարող է ունենալ, անհատին մղելով, որ վերատեսութեան ենթարկի իր կեանքը: Օրւայ աւարտին երգւող գոհաբանական «Փառք քեզ Տէր Աստուած մեր» աղօթքը, իւրաքանչիւր հաւատացեալի սրտից ամէն րոպէ պարտադիր բխելու է, որովհետեւ ներկայ տագնապահար աշխարհում, պատերազմների եւ տեղ-տեղ պատահող ահաւոր երկրաշարժների ընթացքում մեր գոյութիւնը պահպանելու հրաշալի երեւոյթը, Աստծուն պարտական ենք մենք, որի համար փառք ենք տալու միշտ եւ ամէն րոպէ:
Եկեղեցական արարողութիւններին մասնակցեցին հաւատացեալներ, որոնք Թաւրիզի եկեղեցիների Կանանց Խնամակալ մարմնի կողմից փոքրիկ ժամագրքեր ստացան եկեղեցու մուտքին, որպէսզի կարողանան արարողութեան հետեւել եւ հասկանալ ընթերցւող աղօթքներն ու երգւող շարականները՝ աշխարհաբար լեզւով:
